မိူဝ်ႈၼႆႉ ဝၼ်းတီႈ 6/7/2022 သိုၵ်း KNDF ပိုၼ်ၽၢဝ်ႇ ဝႃႈ ပၢင်တိုၵ်းဝၼ်းၸၼ်ပူၼ်ႉမႃးၼႆႉ သိုၵ်ူမၢၼ်ႈ တၢႆ 40 ပၢႆဝႃႈၼႆ။

ပၢင်တိုၵ်းပဵၼ်မိူဝ်ႈဝၼ်းတီႈ 4 ယၢမ်းၵၢင်ၼႂ် 5 မူင်း ။  တပ်ႉသိုၵ်းယၢင်းလႅင် (KA)၊ တပ်ႉသိုၵ်းၵႅတ်ႇၶႄၸိူဝ်ႉၸၢတ်ႈ ယၢင်းလႅင် KNDF ၊ ၸုမ်း PDF (ၾၢႆၶုၼ်) လႄႈ SSRY ႁူမ်ႈၵၼ် ပိုတ်းယိုဝ်းသိုၵ်းမၢၼ်ႈ ႁၢဝ်ႈႁႅင်း တီႈႁိမ်းဝၢၼ်ႈၵုင်းၸူင်လႄႈ ဝၢၼ်ႈလွႆပတႃး ၸႄႈဝဵင်းၾၢႆၶုၼ် ၸႄႈတွၼ်ႈ တူၼ်ႈတီး ၸိုင်ႈတႆးပွတ်းၸၢၼ်း ၾၢႆႇသိုၵ်းမၢၼ်ႈ လူႉတၢႆ 40 ပၢႆ မၢတ်ႇၸဵပ်း တင်းၼမ် ဝႃႈၼႆ။

ၼႂ်းလိၵ်ႈပိုၼ်ၽၢဝ်ႇၼၼ်ႉ ဢွၵ်ႇဝႆႉဝႃႈ – “သွင်ၾၢႆႇလႆႈပိုတ်းယိုဝ်းၵၼ်ႁၢဝ်ႈႁႅင်းသေ ၾၢႆႇသိုၵ်းမၢၼ်ႈ ထႅမ်ႁႅင်းသိုၵ်းၶဝ်ႈၸူးတင်းၼမ် ယဝ်ႉၵေႃႈ ၸႂ်ႉမၢၵ်ႇလူင် ပိုတ်းယိုဝ်းၸွႆႈထႅင်ႈႁၢဝ်ႈႁႅင်း။ ၾၢႆႇသိုၵ်းမၢၼ်ႈတႄႉ လူႉတၢႆ 40 ပၢႆ မၢတ်ႇၸဵပ်းတင်းၼမ်။ ၾၢႆႇၸုမ်းယိပ်းၵွင်ႈၵၢင်ႇ ၸၢဝ်းၶိူဝ်းၼႆႉ သမ်ႉ လူႉတၢႆ 11 ၵေႃႉ”- ဝႃႈၼႆ။

ဢိင်ၼိူဝ် လွင်ႈပၢင်တိုၵ်းၼႆႉသေ ၾၢႆႇၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း ၸမ်ႁုပ်ႈယိုတ်းလႆႈ တပ်ႉပၢင်သဝ်း သိုၵ်းမၢၼ်ႈ တီႈႁိမ်းဝၢၼ်ႈလွႆပတႃးယဝ်ႉ ယွၼ်ႉၾၢႆႇသိုၵ်းမၢၼ်ႈ ထႅမ်ႁႅင်းသိုၵ်း ၸႂ်ႉၵွင်ႈလူင် ယိုဝ်းသႂ်ႇႁၢဝ်ႈႁႅင်း လႆႈထွႆထွၼ်ပၼ်သေ သဵင်ၵွင်ႈၸင်ႇတေယဵၼ်လူင် ဝႃႈၼႆ။