မိူဝ်ႈၼႆႉ ဝၼ်းတီႈ 6/7/2022 ယၢမ်းၵၢင်ၼႂ် မီးၸုမ်းဢမ်ႇႁူႉၾၢႆႇ ၶဝ်ႈယိုဝ်းႁူင်းပလိၵ်ႈမၢၼ်ႈ တီႈပၢင်ႁႆး ဝဵင်းၼမ်ႉတူႈ ၸႄႈ တွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။
ၵူၼ်းၼမ်ႉတူႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ မိူဝ်ႈၼႆႉ ယၢမ်းၵၢင်ၼႂ် တီႈႁူင်းပလိၵ်ႈပၢင်ႁႆးၼၼ်ႉ မီးၵူၼ်းဢမ်ႇႁူႉ ၾၢႆႇမႃးယိုဝ်း။ ပဵၼ်ပၢင်တိုၵ်းယႂ်ႇလူင်ၵၼ်တႄႉၵေႃႈ ဢမ်ႇၸႂ်ႈၼင်ႇၵဝ်ႇ။ ၶဝ်ယူႇတီႈၵႆသေ ပိုတ်းယိုဝ်းလွၵ်ႇငိုတ်ႈ ၵူၺ်း။ ၸုမ်းမႃးယိုဝ်းၼၼ်ႉ ပဵၼ်ၽႂ် ၸုမ်းလႂ် ဢမ်ႇႁူႉ”- ဝႃႈၼႆ။
မိူဝ်ႈဝၼ်းတီႈ 4 ယၢမ်းၵၢင်ၼႂ်ၼၼ်ႉၵေႃႈ တီႈႁူင်းပလိၵ်ႈမၢၼ်ႈ ပၢင်ႁႆးၼႆႉၵူၺ်းၼင်ႇၵဝ်ႇ ထုၵ်ႇၸုမ်းဢမ်ႇ ႁူႉၾၢႆႇ ယိုဝ်းမၢၵ်ႇလူင်သႂ်ႇလႄႈ သွင်ၾၢႆႇ လႆႈပဵၼ်ပၢင်တိုၵ်းၵၼ်ၵမ်းၼိုင်ႈဝႃႈၼႆ။
လွင်ႈႁူင်းပလိၵ်ႈမၢၼ်ႈ တီႈပၢင်ႁႆး ၺႃးမၢၵ်ႇလူင်ပွႆႇသႂ်ႇ 2 ပွၵ်ႈ 2 ၵမ်းၼႆႉ ၵူၼ်းမိူင်း ဢမ်ႇမီးလွင်ႈတုမ်ႉတိူဝ်ႉ မၢတ်ႇၸဵပ်း လူႉတၢႆၸွမ်းၼင်ႇၵဝ်ႇ ဝႃႈၼႆ။
ပူၼ်ႉမႃး မိူဝ်ႈလိူၼ်မၢတ်ႉၶျ်ၼၼ်ႉတႄႉ သိုၵ်းမၢၼ်ႈတင်း သိုၵ်းၶၢင် KIA ပဵၼ်ပၢင်တိုၵ်းၵၼ် တီႈလွႆရတ်ႉသျႃး ၸႄႈဝဵင်းၼမ်ႉတူႈ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ