ဝၼ်းတီႈ 5/7/2022 မိူဝ်ႈၼႆႉ ႁွင်ႈၵၢၼ်ၾၢႆႇၵႃႉၶၢႆမိူင်းမၢၼ်ႈ ပိုၼ်ၽၢဝ်ႇဝႃႈ ၵၢၼ်ၵႃႉၶၢႆလႅၼ်လိၼ်ၶႄႇၼၼ်ႉ ႁႂ်ႈၸႂ်ႉငိုၼ်းတေႃႇလႃႇတႅၼ်းတၢင် ငိုၼ်းၶႄႇ ၼႆလႄႈ ၵူၼ်းၵႃႉၶၢႆတီႈလႅၼ်လိၼ် ၶႄႇ တႆး ယၢပ်ႇၽိုတ်ႇ။
လွင်ႈၼႆႉ ႁွင်ႈၵၢၼ်ၾၢႆႇၵၢၼ်ၵႃႉၶၢႆလႆႈဢုပ်ႇၵၼ်မိူဝ်ႈဝၼ်းတီႈ 20/6/2022 သေ တႄႇမၵ်းမၼ်ႈၸႂ်ႉတိုဝ်းၵႂႃႇဝၼ်းတီႈ 1/7/2022။
ဢိင်ၼိူဝ်ၶေႃႈပိုၼ်ၽၢဝ်ႇၼႆႉသေယၢမ်းလဵဝ် ၵူၼ်းၵႃႉၶၢႆလႅၼ်လိၼ် လႆႈၵိုတ်းဝႆႉတႃႇသူင်ႇၶူဝ်းၵုၼ်ႇဢွၵ်ႇမိူင်းၶႄႇ ၸူဝ်ႈၶၢဝ်း။ ၾၢႆႇၵႃႉၶၢႆၶိုၼ်းပိုၼ်ၽၢဝ်ႇလူတ်းယွၼ်ႇပၼ် ၵၢၼ်ၵႃႉၶၢႆၶဝ်ႈသၢၼ်လႄႈၶဝ်ႈပဵမ်တႄႉ ပၼ်ၸႂ်ႉၸၢႆႇၵၼ်တင်းငိုၼ်းၶႄႇယူႇဝႃႈၼႆ။
ၵူၼ်းၵႃႉတီႈမူႇၸေႊၵေႃႉၼိုင်ႈလၢတ်ႈၽူႈတွႆႇႁွၵ်ႈဝႃႈ – “ဝၼ်းတီႈ 20 ပူၼ်ႉမႃးၶဝ်ပိုၼ်ၽၢဝ်ႇဝႃႈ ဝၼ်းတီႈ 1/7/2022 ၼႆႉမၵ်းမၼ်ႈၸႂ်ႉတိုဝ်းၵႂႃႇၼႆဢေႃႈ။ ၶဝ်ႈသၢၼ်လႄႈၶဝ်ႈပဵမ်တႄႉ ပၼ်ၸႂ်ႉၸၢႆႇတင်းငိုၼ်းၶႄႇယူႇၼႆဢေႃႈ။ ၸိူဝ်းပဵၼ်မွၵ်ႇမၢၵ်ႇႁၢၵ်ႈႁူဝ်ဢၼ်ၸၢင်ႈဢိတ်ႇပဵၼ်ၼမ်ႉမၼ်းတႄႉတၵ်းလႆႈၼပ်ႉသွၼ်ႇၸႂ်ႉၸၢႆႇၵၼ်တင်းငိုၼ်းတေႃႇလႃႇၵူၺ်းၼႆဢေႃႈ ” – ဝႃႈၼႆ။
ပေႃးၸႂ်ႉၵၼ် ၸႂ်ႉၸၢႆႇတၢင်းငိုၼ်းတေႃႇလႃႇတႄႉတႄႉၼႆ ၵူၼ်းၵႃႉၵူႈၸၼ်ႉထၢၼ်ႈ ယၢပ်ႇၽိုတ်ႇလိူဝ်ႁႅင်း ၸၢင်ႈသုမ်းၵွတ်းလူးၵွၼ်ႇ ၵူၼ်းၵႃႉ ၽူႈယိင်းၵေႃႉၼိုင်ႈၵေႃႈလၢတ်ႈၼင်ႇၼႆ။
“ပေႃးလႆႈၸႂ်ႉငိုၼ်းတေႃႇလႃႇတႄႉ ႁဝ်းၶႃႈ သုမ်းသွင်ၵမ်းၶႃႈဢေႃႈ။ ၵွပ်ႈဝႃႈ ဢဝ်ငိုၼ်းၶႄႇ သွၼ်ႇပဵၼ်ငိုၼ်းမၢၼ်ႈသေ ၸင်ႇတေဢဝ်ငိုၼ်းမၢၼ်ႈသွၼ်ႇပဵၼ်ငိုၼ်းတေႃႇလႃႇၶႃႈလူး။ ၶၼ်ငိုၼ်းမၢၼ်ႈသမ်ႉတူၵ်းႁႅင်းဢႃးလႃးႁေၼႆ တႃႇႁဝ်းၶႃႈတႄႉ သုမ်းယဝ်ႉသုမ်းထႅင်ႈဢေႃႈ။ တိူဝ်ႉထိုင် ၵေးလၢင်းပုၼ်ႉၵွၼ်ႇဢေႃႈ” ဝႃႈၼႆ။
ယၢမ်းလဵဝ် ယူႇတီႈ ယေးငိုၼ်းငဝ်ႈငုၼ်းမိူင်းမၢၼ်ႈသေ လႅၵ်ႈပၼ် 1 တေႃႇလႃႇ 1850 ပျႃး။ သိုဝ်ႉၶၢႆၵၼ်တၢင်းၼွၵ်ႈသမ်ႉ 1 တေႃႇလႃႇတူၵ်း 2200 ပျႃး။ ဢၼ်လိူဝ်ၸႂ်သုတ်းသမ်ႉ သိုၵ်းမၢၼ်ႈပိုၼ်ၽၢဝ်ႇဝႆႉဝႃႈ ငိုၼ်းဢၼ်လႆႈမႃးတီႈၵၢၼ်သူင်ႇၶၢႆဢွၵ်ႇၼွၵ်ႈမိူင်းၸိူဝ်းၼၼ်ႉတေလႆႈဢဝ်မႃးလႅၵ်ႈတီႈယေးငိုၼ်း လႅၵ်ႈပဵၼ်ငိုၼ်းမၢၼ်ႈမူတ်းမူတ်းၼႂ်းၶၢဝ်းတၢင်း 45 ဝၼ်း ၾၢႆႇသိုၵ်းမၢၼ်ႈပိုၼ်ၽၢဝ်ႇဝႆႉၼင်ႇၼႆ။
