သိုၵ်းဝႃႉ  UWSA  တေဢိုတ်းၽၵ်းတူၶၢမ်ႈလႅၼ်လိၼ် ပၢင်သၢင်း (လၢၼ်ႇမူင်ႇဢႃး) ဢၼ်တိတ်းၸပ်းၵၼ်ဝႆႉတင်း မိူင်းၶႄႇ    တေၵိုတ်း ၵၢၼ်ၵႃႉၶၢႆ တေႃႉၶူဝ်းၵုၼ်ႇၶၢမ်ႈၽၵ်းတူလႅၼ်လိၼ်ၸူဝ်ႈၶၢဝ်းၼႆ ႁွင်ႈၵၢၼ်ၶၢဝ်ႇ ၶွင်ၸုမ်းသိုၵ်းဝႃႉ ပိုၼ်ၽၢဝ်ႇၵႂႃႇ  မိူဝ်ႈဝၼ်းတီႈ 20 လိူၼ်ဢွၵ်ႉထူဝ်ႊပိူဝ်ႊၼႆႉ ၼႆယဝ်ႉ။

ၽၵ်းတူၶၢမ်ႈလႅၼ်လိၼ် မိူင်းၶႄႇ လႄႈ ပၢင်သၢင်းၼႆႉ တေဢိုတ်း တႄႇလိူၼ်ၼႃႈ လိူၼ်ၼူဝ်ႊဝႅမ်ႊပိူဝ်ႊ 1 ဝၼ်းၵႂႃႇ ႁိုင်ၶၢဝ်းတၢင်း 2 ထိုင် 3 လိူၼ်သေ တေမႄးၵေႃႇသၢင်ႈ ႁဵတ်းၵၢၼ်မူၼ်ႉမႄး ႁႂ်ႈၶိုတ်းၸၼ်ႉလိူဝ်ၵဝ်ႇ ၼႆယဝ်ႉ။

ၾၢႆႇၸဝ်ႈၼႃႈတီႈသိုၵ်းဝႃႉ (UWSA) ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႆႉဝႃႈ “ ၼႂ်းၶၢဝ်းတၢင်းမူၼ်ႉမႄးၵဵၵ်ႉလၢၼ်ႇတီႈၽၵ်းတူၶၢမ်ႈ လႅၼ်လိၼ်ယူႇၼႆႉ ၵၢၼ်ၵႃႉၶၢႆၸွမ်းၶၢမ်ႈလႅၼ်လိၼ်တႄႉ တေလႆႈၵိုတ်းလိုဝ်ႈဝႆႉၸူဝ်ႈၶၢဝ်း။ ၵူၺ်းၵႃႈ ၶၵ်ႉၵၢၼ်တေႃႉသူင်ႇၶူဝ်းၵုၼ်ႇ ဢၼ်ၸဝ်ႈၵၢၼ်ပၢႆးမၢၵ်ႈမီးၶဝ် ႁဵတ်းဝႆႉယူႇၼၼ်ႉလႄႈ ၵူၼ်းၸိူဝ်းႁဵတ်းၵၢၼ်ယူႇတီႈႁူင်းၵၢၼ်လူင်ၸိူဝ်းၼၼ်ႉတႄႉ  တေပၼ် ၶဝ်ႈဢွၵ်ႇယူႇ” ၼႆယဝ်ႉ။

လႆႈႁူႉဝႃႈ ၵူၼ်းၸိူဝ်းၵဵဝ်ႇၶွင်ႉၵၼ်တင်း ႁွင်ႈၵၢၼ်ၾၢႆႇၵၢၼ်ၵႃႉၶၢႆ ၸွမ်းလႅၼ်လိၼ်ၼၼ်ႉ တေလႆႈၵႂႃႇသိုပ်ႇႁဵတ်းၵၢၼ် တီႈသဵၼ်ႈတၢင်း မၢႆ 200 ဢွင်ႈတီႈဢၼ်သိုၵ်းဝႃႉ မၵ်းမၼ်ႈ တမ်းဝၢင်းဝႆႉပၼ် ၼႆယဝ်ႉ။

ၸဝ်ႈၵႃးဝဵင်းသႅၼ်ဝီ တေႃႉတၢင်ႇၵူၼ်း လႄႈ ၶူဝ်းၵုၼ်ႇ လတ်းၵႂႃႇမႃးတႃႈၶီႈလဵၵ်း – မိူင်းလႃး- ပၢင်သၢင်း-ၵုၼ်လူင်-သႅၼ်ဝီ လၢတ်ႈၼႄတီႈၽူႈတွႆႇႁွၵ်ႈဝႃႈ –  “သဵၼ်ႈတၢင်းၶဝ်ႈဢွၵ်ႇ တီႈပၢင်သၢင်းၼႆႉ မၼ်းၼမ်ၼႃႇ။ မၢင်သဵၼ်ႈၼႆႉ ပဵၼ်ၽွင်းၶဝ်တိုၵ်ႉမႄး သဵၼ်ႈတၢင်း။ တႃႇၵၢၼ်တေႃႉၶူဝ်းၵုၼ်ႇၶဝ်ႈဢွၵ်ႇတီႈၶဝ်တႄႉ ပေႃးပၼ်ငိုၼ်းလႆႈၸွမ်းၵဵၵ်ႉၶဝ်ၼႆႉ ၵႂႃႇမႃးလႆႈငၢႆႈယူႇ” ဝႃႈၼႆ။

ပိုၼ်ႉတီႈ ၼႃႈလိၼ်သိုၵ်းဝႃႉ ၵုမ်းၵမ်ၼႆႉ တိတ်းၸပ်းၵၼ်ဝႆႉတင်း မိူင်းၶႄႇသေ မီးၽၵ်းတူၶၢမ်ႈလႅၼ်လိၼ်ယူႇ 4 ဢွင်ႈတီႈ။ ၽၵ်းတူၶၢမ်ႈလႅၼ်လိၼ် (လၢၼ်ႇမူင်ႇဢႃး) ၼႆႉၵေႃႈ ယၢမ်ႈၺႃးၾၢႆႇမိူင်းၶႄႇ ႁၢမ်ႈဢမ်ႇပၼ်တေႃႉၶူဝ်းၵုၼ်ႇ ၶဝ်ႈဢွၵ်ႇသေ ဢိုတ်းဝႆႉ ပွၵ်ႈၼိုင်ႈ။

ပူၼ်ႉမႃး မိူဝ်ႈလိူၼ်ၵျုၼ်ႊ ဝၼ်းတီႈ 8 ၼၼ်ႉၵေႃႈ ၾၢႆႇသိုၵ်းဝႃႉ ယၢမ်ႈဢဝ်ယႃႈမဝ်းၵမ် ဢၼ်တီႉလႆႈၼၼ်ႉ သူင်ႇပၼ်တီႈပလိၵ်ႈ မိူင်းၶႄႇ ၽၢၼ်ႇၽၵ်းတူၶၢမ်ႈလႅၼ်လိၼ် မိူင်းၶႄႇ- မိူင်းမၢၼ်ႈ (လၢၼ်ႇမူင်ႇဢႃး) ၼႃႈတီႈၶဝ်ၵုမ်းၵမ်ဝႆႉၼၼ်ႉမႃး ပွၵ်ႈၼိုင်ႈ ၼႆယဝ်ႉ။