ဝၼ်းတီႈ 28/6/2022 ယၢမ်းၵၢင်ၶိုၼ်း မွၵ်ႈ 10 မူင်း သဵင်ၵွင်ႈတႅၵ်ႇ ၾၢႆႇလဵဝ် ဢမ်ႇယွမ်း 4 ၵမ်း ႁိမ်းလႅၼ်လိၼ်ပၢင်ၵၢတ်ႇၵႃႉၶၢႆ 105 လၵ်း မိူင်းယု ၼႂ်းၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ ၼႆယဝ်ႉ။
ၸဝ်ႈၵႃးလူင် 12 လေႃႉ ၽူႈၸၢႆး ဢႃယု 40 ပၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ႁဝ်းၶႃႈ လႆႈငိၼ်းသဵင်ၵွင်ႈတႅၵ်ႇ တီႈႁိမ်းၵဵၵ်ႉ တၢင်းၶဝ်ႈ 105 လၵ်း ဢၼ်လုၵ်ႉတၢင်းမူႇၸေႊမႃး သဵင်ၵွင်ႈတႅၵ်ႇၾၢႆႇလဵဝ် မွၵ်ႈ 4-5 ၵမ်းၼႆႉ။ ၵူၺ်းၵႃႈ ပဵၼ်ၸုမ်းလႂ် ယိုဝ်းတႄႉ ဢမ်ႇႁူႉၶႃႈ”- ဝႃႈၼႆ။
ၼႂ်းၶၢဝ်းတၢင်း ဝူင်ႈၼႆႉ သိုၵ်းၶၢင် KIA တင်း သိုၵ်းတဢၢင်း TNLA ထႅမ်ႁႅင်းသိုၵ်း မုင်ႈၸူးတၢင်းမိူင်းယု 105 လၵ်း တင်းၼမ် ၵူၼ်းပိုၼ်ႉတီႈ လၢတ်ႈ။
“ဝၢႆးသေ ပၢင်တိုၵ်းတၢင်းၼမ်ႉတဝ်းယဝ်ႉၼၼ်ႉ ယၢမ်းလဵဝ် လႆႈငိၼ်းသဵင်ၵွင်ႈတႅၵ်ႇထႅင်ႈ ၵူၺ်းၵႃႈ ဢမ်ႇပေႃးႁိုင် တႅၵ်ႇၵမ်းၼိုင်ႈၵူၺ်း။ ယၢမ်း လဵဝ် တီႈႁိမ်းႁွမ်းၼၼ်ႉ သိုၵ်း KIA တင်း TNLA တႄႉ တိုၵ်ႉထႅမ်ႁႅင်းသိုၵ်း မႃးထႅင်ႈတင်းၼမ်”- ၵူၼ်းပိုၼ်ႉတီႈ 105 လၵ်း ၽူႈၸၢႆး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈၼင်ႇၼႆ။
ၼႂ်းပိုၼ်ႉတီႈ ပွတ်းတွၼ်ႈၼႆႉ ၵမ်ႈၼမ် မီးၸုမ်းယိပ်းၵွင်ႈၵၢင်ႇၸၢဝ်းၶိူဝ်းလႄႈ သိုၵ်းမၢၼ်ႈႁူမ်ႈတင်း ၸုမ်းပျီႇတူႉၸိတ်ႉ တူင်ႉၼိုင်ၵႂႃႇမႃးႁၢဝ်ႈႁႅင်း ၼႆယဝ်ႉ။
တီႈပၢင်ၵၢတ်ႇၵႃႉၶၢႆလႅၼ်လိၼ် ၼႂ်းၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇၼႆႉ ဢမ်ႇလိူၵ်ႈတီႈလိူၵ်ႈယၢမ်း ၵႆႉငိၼ်းသဵင်ၵွင်ႈတႅၵ်ႇ မၢၵ်ႇလူင် ၸိူဝ်း ၼႆႉ ႁဵတ်းႁႂ်ႈၵူၼ်းပိုၼ်ႉတီႈ တူၵ်းၸႂ်ၵူဝ် ဢမ်ႇမီးလွင်ႈႁူမ်ႇလူမ်ႈ ၸိူဝ်းၼႆႉ။
