ၶွင်ႇသီႇသိုၵ်းမၢၼ်ႈတင်း သိုၵ်းၶႄႇၵဝ်ႈၵၢင်ႉ MNDAA ပဵၼ်ပၢင်တိုၵ်းၵၼ် ၼႂ်းၸႄႈဝဵင်းမူႇၸေႊ သိုၵ်းမၢၼ်ႈ ပွႆႇမၢၵ်ႇလူင် တူၵ်းႁိမ်းဝၢၼ်ႈ ၵူၼ်းမိူင်းတူၵ်းၸႂ်။
မိူဝ်ႈဝႃး ဝၼ်းတီႈ 26/6/2022 ယၢမ်းဝၢႆးဝၼ်း 2 မူင်း ၶွင်ႇသီႇသိုၵ်းမၢၼ်ႈ ယိုတ်းမိူင်းတင်း သိုၵ်းၶႄႇၵဝ်ႈၵၢင်ႉ MNDAA ပဵၼ်ပၢင်တိုၵ်းၵၼ် ႁိမ်းဝၢၼ်ႈၼမ်ႉတဝ်း ဝဵင်းပၢင်ႇသၢႆး ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ သိုၵ်းမၢၼ်ႈ ယိုဝ်းမၢၵ်ႇလူင်သႂ်ႇ တူၵ်းႁိမ်းဝၢၼ်ႈ ။
ၵူၼ်းမူႇၸေႊ ၽူႈၸၢႆး ဢႃယု 30 ပၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈပႆႇပဵၼ်ပၢင်တိုၵ်းၵၼ် ၵွၼ်ႇ 2 မူင်းဝၢႆးဝၼ်းၼၼ်ႉ သိုၵ်း မၢၼ်ႈယိုဝ်းၵွင်ႈလူင်သႂ်ႇ 4 လုၵ်ႈ။ ဝၢႆးၶဝ်ယိုဝ်းၵွင်ႈလူင်သႂ်ႇယဝ်ႉ ပဵၼ်ပၢင်တိုၵ်းၵၼ် တေႃႇထိုင်ဝၢႆးဝၼ်း 4 မူင်း သဵင်ၵွင်ႈၸင်ႇယဵၼ်။ ထိုင်မႃးယၢမ်းၵၢင်ၶိုၼ်း 11 မူင်း သိုၵ်းမၢၼ်ႈ ဢၼ်မီးတီႈ 105 လၵ်းၼၼ်ႉ ယိုဝ်းၵွင်ႈလူင်ၵႂႃႇထႅင်ႈ ဢမ်ႇယွမ်း 7 လုၵ်ႈ”- ဝႃႈၼႆ။
ဢိင်ၼိူဝ် လွင်ႈသိုၵ်းမၢၼ်ႈ လၢမ်းလိမ်းယိုဝ်းၵွင်ႈလူင် ၵႂႃႇတူၵ်းႁိမ်းဝၢၼ်ႈ ၸိူင်ႉၼႆၼႆႉ ႁဵတ်းႁႂ်ႈၵူၼ်းဝၢၼ်ႈ တိုၼ်ႇသၢၼ်ႈတူၵ်းၸႂ်ၵူဝ် ဝႃႈၼႆ။
“ ၶဝ်ယိုဝ်းမၢၵ်ႇလူင် မႃးတူၵ်းတႅၵ်ႇႁိမ်းဝၢၼ်ႈ ဢေႃႈ။ လွင်ႈၶဝ် ယိုဝ်းမၢၵ်ႇသႂ်ႇႁိမ်းဝၢၼ်ႈ ၸိူင်ႉၼႆၼႆႉ မၼ်းဢမ်ႇၵိုင်ႇလီပဵၼ်။ ယူႇတီႈႁဝ်းၶႃႈ ၵူၼ်းဝၢၼ်ႈ တႃႇတေၵႂႃႇႁဵတ်းသူၼ်ႁႆႈၼႃးၵၼ်တႄႉ ပဵၼ်ဢၼ်ယၢပ်ႇၽိုတ်ႇဝႆႉၶႃႈ။ ယဝ်ႉၵေႃႈ ဢွၼ်ၵၼ် တူၵ်းၸႂ်ၵူဝ် ပဵၼ်တၢင်းတုၵ်ႉၶၶၢၼ်ၸႂ်ၵူၼ်းပိုၼ်ႉတီႈတႄႉၶႃႈ”- ၵူၼ်းမူႇၸေႊ ၽူႈၸၢႆး ဢႃယု 30 ပၢႆ လၢတ်ႈၼႄၼင်ႇၼႆ။
ၸုမ်းယိပ်းၵွင်ႈၵၢင်ႇၸၢဝ်းၶိူဝ်းလႄႈ သိုၵ်းမၢၼ်ႈ ၵႆႉပိုတ်းယိုဝ်းၵၼ်ႁိမ်းဝၢၼ်ႈသူၼ်ႁိူၼ်းၵူၼ်းၼႆႉတုမ်ႉတိူဝ်ႉလွင်ႈႁူမ်ႇလူမ်ႈပၢႆးတူဝ်လႄႈပၢႆးၸႂ်ၵူၼ်းမိူင်းႁၢဝ်ႈႁႅင်း။ ၵူၼ်းမိူင်းဢွၼ်ၵၼ်တုၵ်းယွမ်းႁႂ်ႈၸဵဝ်းၵိုတ်းယိုဝ်းၵၼ် ဝႃႈၼႆ။
ယၢမ်းလဵဝ် ၸွမ်းသဵၼ်ႈတၢင်းလူင် မူႇၸေႊ – ၵူတ်ႉၶၢႆ – သႅၼ်ဝီ ၸိုင်ႈတႆးပွတ်းႁွင်ႇ ၼႆႉ ၶွင်ႇသီႇသိုၵ်းမၢၼ်ႈတင်း သိုၵ်း ၶႄႇၵဝ်ႈၵၢင်ႉ MNDAA ၊ သိုၵ်းၶၢင် KIA လႄႈ သိုၵ်းတဢၢင်း TNLA ၸိူဝ်းၼႆႉ ၵႆႉပိုတ်းယိုဝ်းၵၼ်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ