ၸၢႆးၵျၢၼ်ႇဢွင်ႇ (ႁွင်ႉ) ၸၢႆးသိူဝ်လႅင်း ၵူၼ်းၼုမ်ႇတႆးလႅင် ဢၼ်ထုၵ်ႇၸုမ်းၵႅတ်ႇၶႄၵူၼ်းမိူင်း PDF တီႉၵႂႃႇၼၼ်ႉ ယၢမ်းလဵဝ် ပူၼ်ႉလွတ်ႈမႃးၶိုၼ်းထိုင်ႁိူၼ်း လူၺ်ႈႁွႆးၸဵပ်းၸမ်ႉ ထုၵ်ႇပေႃႉထုပ်ႉထဵတ်ႈထၢမ်ဝႆႉ ။

ဝၼ်းတီႈ 23/6/2022 ယၢမ်းဝၢႆးဝၼ်းမွၵ်ႈ 3 မူင်း ၸၢႆးၵျၢၼ်ႇဢွင်ႇ(ႁွင်ႉ) ၸၢႆးသိူဝ်လႅင်း ၵူၼ်းၼုမ်ႇတႆးလႅင် ဢၼ်ထုၵ်ႇ PDF တီႉၺွပ်းၵႂႃႇၼၼ်ႉ ထုၵ်ႇပွႆႇတူဝ်မႃးၶိုၼ်း  ယၢမ်းလဵဝ် ၵႂႃႇယူတ်းယႃတူဝ်ဝႆႉတီႈႁူင်းယႃ  ။

ႁူဝ်ပဝ်ႈ ၵူၼ်းၼုမ်ႇတႆးလႅင် ၸႄႈဝဵင်းမၢၼ်ႈမွၵ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ၶဝ်ပွင်ႇၶၢဝ်ႇမႃး တေပွႆႇတူဝ်ၸၢႆးၵျၢၼ်ႇဢွင်ႇ ၼႆသေ ႁဝ်းၶႃႈ ဢွၼ်ၵၼ်ၵႂႃႇႁပ်ႉမၼ်းၸၢႆး တီႈမၢၼ်ႈၵၢတ်ႇ။ မိူဝ်ႈၽွင်းႁဝ်းၶႃႈ ၵႂႃႇႁပ်ႉၼၼ်ႉ ၸုမ်းယိပ်းၵွင်ႈၵၢင်ႇၶဝ် မတ်ႉမိုဝ်း/ တိၼ်မၼ်းဝႆႉဢေႃႈ ”- ဝႃႈၼႆ။

ၸၢႆးၵျၢၼ်ႇဢွင်ႇ(ႁွင်ႉ) ၸၢႆးသိူဝ်လႅင်းၼႆႉ ထုၵ်ႇၸုမ်း PDF ၶဝ်တီႉၵႂႃႇလႆႈၶၢဝ်းတၢင်း 5 ဝၼ်းယဝ်ႉ ၸင်ႇပွႆႇတူဝ်။ ၼႂ်း ၶၢဝ်းတၢင်း 5 ဝၼ်းၼၼ်ႉ မၼ်းၸၢႆးထုၵ်ႇၶၢႆႉတီႈ 4 ပွၵ်ႈ။   ၼႂ်းဝၼ်းထူၼ်ႈ 3   PDF  ပေႃႉထုပ်ႉထဵတ်ႈထၢမ်  မၼ်းၸၢႆး။

ၸုမ်းသိုၵ်းၵႅတ်ႇၶႄၵူၼ်းမိူင်း PDF ဢမ်ႇထၢမ်သင်သေ ၼႄးဝႃႈမၼ်းၸၢႆးၵဵဝ်ႇၶွင်ႈတင်းၸုမ်းသိုၵ်းတႆးလႅင် SNA ၼႆသေ မႃးတီႉၺွပ်းၵႂႃႇပေႃႉထုပ်ႉထဵတ်ႈထၢမ် တူင်ႇဝူင်းၵူၼ်းတႆးလႅင်လၢတ်ႈ။

ပီႈၼွင်ႉၸမ်ၸႂ် မၼ်းၸၢႆးၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၶဝ်ၸႅတ်ႈထၢမ် မၼ်းၸၢႆးဝႃႈ ၸွင်ႇၸႂ်ႈၵူၼ်းပၼ်ၶၢဝ်ႇ SNA ၊    ၵဵဝ်ႇ ၶွင်ႈၸုမ်းတႆးလႅင် SNA ၸိူင်ႉႁိုဝ်ၼႆသေ ၸႅတ်ႈထၢမ်ပေႃႉထုပ်ႉ။  သင်ဝႃႈ  လၢတ်ႈပႅတ်ႉလႅၼ်ၸိုင် တေၺႃးႁႅင်းလိူဝ်ၼႆႉထႅင်ႈဝႃႈၼႆၶႃႈ ဢေႃႈ။  ”- ဝႃႈၼႆ။

ၸၢႆးၵျၢၼ်ႇဢွင်ႇ( ၸၢႆးသိူဝ်လႅင်း ) ၼႆႉ ပဵၼ်ၽူႈတူင်ႉၼိုင် ၵၢၼ်ႁုၼ်ႈမုၼ်း ၵေႃလိၵ်ႈလၢႆး/ ၾိင်ႈငႄႈတႆးလႅင် ၼႂ်းတိူင်းၸႄႈၵႅင်း ၸႄႈဝဵင်းမၢၼ်ႈ မွၵ်ႇ ၵေႃႉၼိုင်ႈ။ မၼ်းၸၢႆး ထုၵ်ႇၸုမ်းသိုၵ်းၵႅတ်ႇၶႄၵူၼ်းမိူင်း ၶဝ်ႈတီႉၺွပ်းဢဝ်တူဝ်ၵႂႃႇ မိူဝ်ႈဝၼ်းတီႈ 19/6/2022 ယၢမ်းႁူဝ်ၶမ်ႈ တီႈၼႂ်းဝတ်ႉ/ ၵျွင်းမၢၼ်ႈၵၢတ်ႇ။

ဝၼ်းတီႈ 21 ပူၼ်ႉမႃးၼႆႉ ယူႇတီႈၸုမ်းတူင်ႉၼိုင်တူင်ႇဝူင်းတႆးလႄႈ ၸုမ်းၵူၼ်းၼုမ်ႇတႆး ၼွၵ်ႈမိူင်း/ ၼႂ်းမိူင်း ႁူမ်ႈၵၼ် 14 ၸုမ်းသေ ဢွၵ်ႇၶေႃႈ ပိုၼ်ၽၢဝ်ႇ တုၵ်းယွၼ်းႁႂ်ႈ ပွႆႇတူဝ်ၸၢႆးၵျၢၼ်ႇဢွင်ႇ ဝႆးဝႆး ၼႆယဝ်ႉ။