တီႈဝဵင်းသီႇပေႃႉ ၸိုင်ႈတႆးပွတ်းႁွင်ႇၼၼ်ႉ သိုၵ်းလႄႈ ၾၢႆႇၽွင်းငမ်း ဢွၵ်ႇမၢႆမီႈမႃႇသျႄႇလေႃး ႁၢမ်ႈဢွၵ်ႇၼွၵ်ႈႁိူၼ်း ယၢမ်းၵၢင်ၶိုၼ်း ဝႆႉယူႇသေတႃႉ ယၢမ်းလဵဝ် ၽူႈလၵ်ႉၵူၼ်းၸူၼ်ၼမ်သေဢမ်ႇၵႃး ဢၼ်ယိုဝ်းၵွင်ႈလူင်ၵွင်ႈဢွၼ်ႇၵေႃႈမီး။
ဝၼ်းတီႈ 19/6/2022 ယၢမ်းၵၢင်ၶိုၼ်းလိုၵ်း 11 မူင်း သဵင်ၵွင်ႈတႅၵ်ႇၾၢႆႇလဵဝ် တီႈပွၵ်ႉၸၢၼ်း ဝဵင်းသီႇပေႃႉ ၸႄႈတွၼ်ႈ ၵျွၵ်ႉမႄးၸိုင်ႈတႆးပွတ်းႁွင်ႇ။ လွင်ႈတုမ်ႉတိူဝ်ႉၵူၼ်း မၢတ်ႇၸဵပ်းလူႉတၢႆတႄႉ ဢမ်ႇလႆႈငိၼ်းၶၢဝ်ႇ ပဵၼ်ၸုမ်းလႂ် ၵေႃႉလႂ် ၾၢႆႇလႂ်ယိုဝ်းၵေႃႈ ပႆႇႁူႉ။
ၵူၼ်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ လႆႈငိၼ်းသဵင်ၵွင်ႈတႅၵ်ႇၾၢႆႇလဵဝ် တီႈပွၵ်ႉၸၢၼ်း ႁိမ်းႁဝ်းၶႃႈ ယူႇၼႆႉ။ မွၵ်ႈၵၢင်ၶိုၼ်း 11 မူင်းၼႆႉ။ ပဵၼ်ၸုမ်းလႂ်ယိုဝ်းတႄႉ ဢမ်ႇႁူႉ။ ယွၼ်ႉပဵၼ်ၵၢင်ၶိုၼ်းလႄႈ ႁဝ်းၶႃႈ ဢမ်ႇႁတ်းဢွၵ်ႇတူၺ်း။ တေႃႇထိုင်ယၢမ်းလဵဝ် ပႆႇလႆႈႁူႉၶေႃႈမုလ်း မၼ်းလီလီ ၸွင်ႇမီးလွင်ႈမၢတ်ႇၸဵပ်းလူႉတၢႆ ၸိူဝ်းၼႆႉ”- ဝႃႈၼႆ။
မိူဝ်ႈဝၼ်းတီႈ 18 ၼၼ်ႉၵေႃႈ တီႈႁၢၼ်ႉၶၢႆယႃႈယႃ တီႈႁိမ်းၵၢတ်ႇၽၵ်းၶဵဝ် ၸႄႈဝဵင်းသီႇပေႃႉၼၼ်ႉ ထုၵ်ႇၵူၼ်းၶဝ်ႈလၵ်ႉ လႆႈၵႂႃႇရူတ်ႉၶိူင်ႈ လမ်း ၼိုင်ႈလႄႈ ငိုၼ်းၼႂ်းႁၢၼ်ႉထႅင်ႈ။
ၸဝ်ႈၶွင်ႁၢၼ်ႉၶၢႆယႃႈယႃ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ယၢမ်းၵၢင်ၶိုၼ်းမွၵ်ႈ 11 မူင်းၼႆႉ ၵူၼ်းႁၢႆႉၶဝ်ႈလၵ်ႉသေ လႆႈၵႂႃႇ ရူတ်ႉၶိူင်ႈလမ်း ၼိုင်ႈ ယဝ်ႉၵေႃႈ ငိုၼ်းဢၼ်မီးၼႂ်းႁၢၼ်ႉထႅင်ႈ။ မိူဝ်ႈၽွင်းၼၼ်ႉ ႁဝ်းၶႃႈ ဢမ်ႇႁူႉၶႃႈ။ ၽိူဝ်ႇၶဝ်ၼူဝ်းရူတ်ႉၶိူင်ႈယဝ်ႉ ၸင်ႇတေႁူႉဝႃႈ ၺႃးလၵ်ႉ။ ပေႃး ဢမ်ႇၼၼ်တႄႉ တီႉလႆႈတူဝ်ၵူၼ်းလၵ်ႉၼၼ်ႉယဝ်ႉၶႃႈ”- ဝႃႈၼႆ။
ဝၢႆးသေ ၽူႈၵွၼ်းၸႄႈဝဵင်းသီႇပေႃႉ တႂ်ႈသိုၵ်းမၢၼ်ႈ ဢွၵ်ႇလိၵ်ႈမၢႆမီႈႁၢမ်ႈဢွၵ်ႇၼွၵ်ႈႁိူၼ်း ၸိူင်ႉၼႆၼႆႉ ႁဵတ်းႁႂ်ႈၵူၼ်းပိုၼ်ႉတီႈ ဢမ်ႇမီးလွင်ႈ ႁူမ်ႇ လူမ်ႈ ဢုၼ်ႇၸႂ် မႃးထႅင်ႈလိူဝ်ႇၵဝ်။
“ဝၢႆးသိုၵ်း ၶဝ်ဢွၵ်ႇလိၵ်ႈမႃႇသေႇလေႃးမႃးၸိူင်ႉၼႆ ယိုင်ႈၶႅၼ်းႁဵတ်းႁႂ်ႈမီးၽူႈလၵ်ႉၼမ်မႃးထႅင်ႈ။ ယဝ်ႉၵေႃႈ လွင်ႈသဵင်ၵွင်ႈတႅၵ်ႇၼႆႉ တေလႆႈဝႃႈ ပဵၼ်ပွၵ်ႈၵမ်းႁႅၵ်ႈ ဝၢႆးၶဝ် ဢွၵ်ႇလိၵ်ႈၼႆႉမႃး”- ၵူၼ်းသီႇပေႃႉ သိုပ်ႇလၢတ်ႈၼႄၼင်ႇၼႆ။
မၢႆမီႈႁၢမ်ႈဢွၵ်ႇၼွၵ်ႈႁိူၼ်းမႃႇသျႄႇလေႃး ၼႆႉ ယူႇတီႈ ၽူႈၵွၼ်းၸႄႈဝဵင်းသီႇပေႃႉ တႄႇၸႂ်ႉဢွၵ်ႇမႃး မိူဝ်ႈဝၼ်းတီႈ 8/6/2022 သေ တေႃႇထိုင်မိူဝ်ႈလႂ်ၼႆတႄႉ ဢမ်ႇလၢတ်ႈပႃး။