မိူဝ်ႈဝႃးဝၼ်းတီႈ 22/6/2026 လုၵ်ႈဢွၼ်ႇႁဵၼ်း သွင်ၵေႃႉ ဢႃႇယု 14 ၶူပ်ႇ တင်း 15 ၶူပ်ႇ လၢၵ်ႈၵွင်ႈယိုဝ်းသႂ်ႇ ၼႂ်းႁူင်းႁဵၼ်းၸၼ်ႉသုင်လင်ၼိုင်ႈ တီႈဝဵင်းတႅၵ်ႊလူဝ်ႊပၢၼ်ႊ မိူင်းၾိ လိပ်ႉပိၼ်ႊ လုၵ်ႈႁဵၼ်းတၢႆထင်တီႈၵႂႃႇ 3 ၵေႃႉ မၢတ်ႇၸဵပ်းၵႂႃႇႁၢဝ်ႈႁ်င်း 7 ၵေႃႉ ဝႃႈၼႆ။

ၽူႈမီးပုၼ်ႈၽွၼ်း ၼႂ်းႁူင်းပလိၵ်ႈၶဝ်လၢတ်ႈဝႃႈ – ဝၢႆးလင်ၵိူတ်ႇပဵၼ်ပၼ်ႁႃယဝ်ႉၵေႃႈ တီႉၺွပ်းဢဝ်လႆႈလုၵ်ႈဢွၼ်ႇၵေႃႉၼိုင်ႈ ဢၼ်လီထၢင်ႇထိူမ်သေ ထႅင်ႈၵေႃႉၼိုင်ႈတႄႉ မႃး ယိုၼ်ႈတူဝ်ယွမ်းႁပ်ႉတၢင်းၽိတ်းႁင်းၵူၺ်းဝၢႆးလင် – ၼႆယဝ်ႉ။

ဝဵင်း တီႈဢၼ်ပဵၼ်လွင်ႈပိုတ်းယိုဝ်းၵၼ်ၼႆႉ မီးဝႆႉၾၢႆႇ ၸဵင်ႇၸၢၼ်းဝၼ်းဢွၵ်ႇ ငဝ်ႈၸိုင်ႈဝဵင်းလူင် မၼီႇ လႃႇ ၊ မိူင်းၾိလိပ်ႉပိၼ်ႊ။

လုၵ်ႈႁဵၼ်းသွင်ၵေႃႉၼၼ်ႉ ယိပ်းဝႆႉၵွင်ႈပွတ်း ပီႊသတူဝ်ႊ၊ ပလိၵ်ႈၶဝ် ယိုတ်းသိမ်းလႆႈ ၶွၵ်ႇမၢၵ်ႇၵွင်ႈပဝ်ႇ 40 လုၵ်ႈ ႁဵတ်းႁိုဝ်သေ ဢဝ်ၵွင်ႈတီႈလႂ်မႃးဢၼ်ဝႃႈၼၼ်တႄႉ ဢမ်ႇလႆႈ လၢတ်ႈပႃးဝႆႉ။

ႁူင်းႁဵၼ်း တီႈပဵၼ်လွင်ႈပိုတ်းယိုဝ်းၼႆႉ မီးလုၵ်ႈဢွၼ်ႇႁဵၼ်းသွၼ်လိၵ်ႈဝႆႉ 1500 ၵေႃႉပၢႆ။ တီႈမိူင်းၾိလိပ်ႉပိၼ်းၼႆႉ ဢမ်ႇသူႈမီး လွင်ႈပိုတ်းယိုဝ်းၵၼ် ၼႂ်းႁူင်းႁဵၼ်း၊ ၵဵဝ်ႇလူၺ်ႈလွင်ႈပၼ်ၶႂၢင်ႉယိပ်းၶိူင်ႈၵွင်ႈၵၢင်ႇသေ မီးပၵ်းပိူင်မၢႆမီႈႁႄႉႁၢမ်ႈဝႆႉႁၢဝ်ႈႁႅင်းယူႇသေတႃႉ ၵူၼ်းၸိူဝ်းယိပ်း ၶိူင်ႈၵွင်ႈၵၢင်ႇဝႆႉ ဢမ်ႇမႅၼ်ႈတၢင်းၵၢၼ် ၵေႃႈ တိုၵ်းမီးဝႆႉ တင်းၼမ်။

တီႈမိူင်းၾလိပ်ႉပိၼ်းၼႆႉ ပိၵ်ႉဢိုတ်းႁူင်းႁဵၼ်းဝႆႉ ႁိုင်မႃးၶၢဝ်းတၢင်းလၢႆလိူၼ်ယဝ်ႉသေ တိုၵ်ႉတႄႇပိုတ်ႇႁူင်းႁဵၼ်းၶိုၼ်းၵူၺ်း။