ပူၼ်ႉမႃးဝၼ်းတီႈ 09/12/2024 ၼႆႉ လွႆၾႆး Mount Kanlaon ဢၼ်မီးၼႂ်းပိုၼ်ႉတီႈၼီႊၵရူဝ်ႊ၊ မိူင်းၾိလိပ်ႉပိၼ်းသ်ပွတ်းၵၢင်ၼၼ်ႉ တႅၵ်ႇ၊ ႁဵတ်းႁႂ်ႈၽဝ်ႇတဝ်ႈ တူၵ်းသႂ်ႇၼိူဝ်ႁိူၼ်းယေး၊ ႁိူၼ်းတိူၵ်ႈလႄႈ ၸွမ်းသဵၼ်ႈတၢင်း ၸိူဝ်းၼႆႉ။
ၼႂ်းပီ 2024 ၼႆႉ လွႆၾႆး Mount Kanlaon တႅၵ်ႇသွင်ပွၵ်ႈ ပႃးပွၵ်ႈၼႆႉယဝ်ႉ။ ၽဝ်ႇတဝ်ႈ ဢၼ်လုၵ်ႉတီႈလွႆ ၾႆးတႅၵ်ႇ ၼၼ်ႉ ပိဝ်ၶိုၼ်ႈၼိူဝ်ၵၢင်ႁၢဝ် သုင်မွၵ်ႈ 2 လၵ်းပၢႆ။
ၸုမ်းၾၢႆႇလဵပ်ႈႁဵၼ်း လွင်ႈၽႅၼ်ႇလိၼ်ဝႆလႄႈ လွႆၾႆး မိူင်းၾိလိပ်ႉပိၼ်းသ် လႆႈပိုၼ်ၽၢဝ်ႇပၼ်ၾၢင်ႉဝႆႉဝႃႈ – ငဝ်းလၢႆး လွႆၾႆးၼႆႉ ယူႇဝႆႉၼႂ်းၸၼ်ႉတီႈ 3 ၊ ပဵၼ်ၽွင်း ၼမ်ႉငႂ်ႈၵူမ်ႇၾႆးဢွၵ်ႇမႃးၼမ်၊ ၼႂ်းၶၢဝ်းတၢင်းလၢႆ ဝၼ်းၼႆႉ လွႆၾႆး ၸၢင်ႈတႅၵ်ႇ ထိုင်တီႈပဵၼ်ၽေးလႆႈ ဝႃႈၼႆ။
ၵွပ်ႈၼၼ်လႄႈ ၵူၼ်းမိူင်းၸိူဝ်းယူႇႁိမ်းၸမ် လွႆၾႆး ႁူဝ်ၵူၼ်းမွၵ်ႈ 54,000 လႆႈဢွၼ်ၵၼ်ၶၢႆႉပၢႆႈ ႁႃဢွင်ႈတီႈလွတ်ႈ ၽေးဝႆႉထႃႈ။
တီႈမိူင်းၾိလိပ်ႉပိၼ်းသ်ၼႆႉ လွႆၾႆးဢၼ်တူင်ႉၼိုင် တင်းမူတ်းမီး 20 ပၢႆ။ ၼႂ်းၼၼ်ႉပႃး လွႆၾႆး Mount Kanlaon ဢၼ်ၼိုင်ႈ။ မိူင်းၾိလိပ်ႉပိၼ်းသ်ၼႆႉ ပဵၼ်မိူင်းဢၼ်မီး ၼႂ်းပိုၼ်ႉတီႈပႄႊသိၾိၵ်ႊ (Pacific) သေ မီးလွႆၾႆးလွမ်ႉႁွပ်ႈဝႆႉ၊ လိူဝ်ၼၼ်ႉၵေႃႈ ၵႆႉပဵၼ်ဢိင်ႇသၼ်ႇလႄႈ လွႆၾႆးတႅၵ်ႇ – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။
