လွႆၾႆး တီႈၵုၼ်ပႃႊလီႊ တႅၵ်ႇလႄႈ တင်ႈတႄႇဝၼ်းတီႈ 13/11/2024 မႃး သၢႆၵၢၼ်မိၼ် ဢၼ်တေလုၵ်ႉတၢင်းမိူင်း ဢေႃႊသတြေးလျႃး(Australia)၊ ႁွင်ႊၶွင်ႊ(Hong Kong)၊ ဢိၼ်ႊတီႊယိူဝ်ႊ(India)၊ မလေးသျႃး(Malaysia) လႄႈသိင်ႊၵႃႊပူဝ်ႊ(Singapore) ၸိူဝ်းၼႆႉမႃး လႆႈၵိုတ်းလိုဝ်ႈ ထဵဝ်ႈမိၼ်လၢႆလၢႆဢၼ်။

လွႆၾႆး တႅၵ်ႇၼၼ်ႉ ပဵၼ်လွႆ ဢၼ်မီးၸိုဝ်ႈဝႃႈ လိဝ်ႊဝူဝ်ႊတူဝ်ႊပီႊ လႃႊၵီႊလႃႊၵီႊ ၼႆၼၼ်ႉ။ ႁဵတ်းႁႂ်ႈၵႂၼ်းၾႆး ၼမ်ႉငႂ်ႈၵူမ်ႇၾႆးၽူင်ႉၶိုၼ်ႈသုင်လႄႈ ၶိူင်ႈမိၼ်ဢမ်ႇၸၢင်ႈၶိုၼ်ႈၸၢင်ႈလူင်း။ ၵႂၼ်းၸိူဝ်းၼၼ်ႉ ၸၢင်ႈၶဝ်ႈၼႂ်းၶိူင်ႈၸၢၵ်ႈၶိူင်ႈမိၼ်၊ ၸၢင်ႈၶဝ်ႈထိုင်လႆႈၼႂ်းၶိူင်ႈမိၼ်လႄႈ ႁဵတ်းႁႂ်ႈပဵၼ် ၽေးတေႃႇၵူၼ်းၶီႇၶိူင်ႈမိၼ်။ 

လွႆလိဝ်ႊဝူဝ်ႊတူဝ်ႊပီႊၼႆႉ သုင် 1,703 မီႊတႃႊ။ တီႈၸိၵ်းလွႆၼၼ်ႉ ၾႆးလႄႈတဝ်ႈၽဝ်ႇ ၽူင်ႉဢွၵ်ႇမႃး 2 ႁူး။ တႄႇတႅၵ်ႇ ၸဵမ်မိူဝ်ႈႁူဝ်လိူၼ်ၼူဝ်ႊဝႅမ်ႊပိူဝ်ႊ။ ၵူၼ်းပိုၼ်ႉတီႈပၢႆႈဢမ်ႇတၼ်းပူၼ်ႉ တၢႆယွၼ်ႉလွႆၾႆး 9 ၵေႃႉ မၢတ်ႇၸဵပ်း 30 ပၢႆ။ ၵူၼ်းမိုၼ်ႇပၢႆ လႆႈၶၢႆႉပၢႆႈတီႈယူႇ။ ၸုမ်းၸွႆႈထႅမ် မိူင်းဢိၼ်ႊတူဝ်ႊၼီးသျႃႊ(Indonesia) ႁပ်ႉပုၼ်ႈၽွၼ်းၸွႆႈထႅမ်ဝႆႉ သိုဝ်ႇၶၢဝ်ႇ EPA ဢွၵ်ႇဝႆႉၼင်ႇၼႆ။