ၵူၼ်းမိူင်းဢိၼ်ႊတူဝ်ႊၼီးသျႃး ၵႂႃႇၶုတ်းဢဝ်ၵူၼ်းတၢႆယွၼ်ႉၶူဝ်ႊဝိတ်ႉ 19 ၶိုၼ်းမႃးႁဵတ်းပၢင်မႃႇသႃႇၸွမ်းၾိင်ႈၸွမ်းထုင်းလႄႈႁဵတ်းႁႂ်ႈ တိတ်းၸပ်းၸိူဝ်ႉမႅင်း ပဵၼ်မူႇပဵၼ်ၾုင်။
လူင်ပွင်ၸိုင်ႈ ၾၢႆႇပၢႆးယူႇလီမိူင်းဢိၼ်ႊတူဝ်ႊၼီးသျႃး ပိုၼ်ၽၢဝ်ႇပဵၼ်တၢင်းၵၢၼ်မိူဝ်ႈဝၼ်းတီႈ 17/5/2020 ဝႃႈ ဝၼ်းလဵဝ်ၵူၺ်းမီးၵူၼ်းတိတ်းၸပ်းၸိူဝ်ႉမႅင်း ၶူဝ်ႊဝိတ်ႉ 19 ၼမ်ၶိုၼ်ႈ 489 ၵေႃႉ၊ ဝၼ်းၼၼ်ႉႁူမ်ႈၵူၼ်းတိတ်းၸပ်းတၢင်းပဵၼ်မီး 17514 ၵေႃႉ။ ၼႂ်းၼၼ်ႉ တႃႉ 15 ၵေႃႉၼႆႉပဵၼ်ၵူၼ်းဢၼ်ၵႂႃႇၶုတ်းဢဝ်တူဝ်တၢႆ ပီႈၼွင်ႉၶဝ် ဢၼ်တၢႆယွၼ်ႉၶူဝ်ႊဝိတ်ႉ 19 သေ ၸဝ်ႈၼႃႈတီႈဢဝ်ၵႂႃႇၾင်ပႅတ်ႈ- ဝႃႈၼႆ။
“ၸိူဝ်းၶဝ်ၼႆႉ ၸဵမ်မိူဝ်ႈ ပီႈၼွင်ႉၶဝ် ဢၼ်ၸပ်းၶူဝ်ႊဝိတ်ႉသေတၢႆၵႂႃႇတီႈႁူင်းယႃ ၸဵမ်မိူဝ်ႈ 2 ဝူင်ႈပူၼ်ႉမႃး ၸဵမ်မိူဝ်ႈၸဝ်ႈၼႃႈတီႈ ပႆႇလႆႈၾင်ၼၼ်ႉ ၶဝ်မႃးယွၼ်းတူဝ်တၢႆ ပီႈၼွင်ႉၶဝ်တီႈႁူင်းယႃ။ ၶဝ်ၶႂ်ႈႁဵတ်းပၢင်မႃႇသႃႇ ၸွမ်းၼင်ႇၾိင်ႈထုင်း သေၸင်ႇၾင်ၼႆ။ ၾၢႆႇႁူင်းယႃဢမ်ႇဢၼုယၢတ်ႈပၼ်ၶဝ် ယွၼ်ႉၵူဝ်ၶဝ်တိတ်းၸပ်းတၢင်းပဵၼ်တီႈၵူၼ်းတၢႆ ။ ၵွပ်ႈၼႆ ၾၢႆႇႁူင်းယႃလႆႈဢဝ်ပလပ်ႉသတိၵ်ႉ ဝဵၼ်းတူဝ်တၢႆသေဢဝ်ၾင်ပႅတ်ႈ။ၶဝ်ယင်းဢွၼ်ၵၼ်ၵႂႃႇၶုတ်းဢဝ်မႃးၶိုၼ်းယူႇ ” ၾၢႆႇပၢႆးယူႇလီ ပိုၼ်ၽၢဝ်ႇၼင်ႇၼႆ။
ၸတ်းပၢင်မႃႇသႃႇ ၸွမ်းၾိင်ႈထုင်းဢိၼ်ႊတူဝ်ႊၼီႊသျႃးၼႆႉ -ဢဝ်ၵူၼ်းတၢႆ မႃးဢၢပ်ႇၼမ်ႉ တႃးမုၼ်ႈတႃးၽွင်သေၶိုၼ်းၾင်လိၼ်ၶိုၼ်း- လႆႈႁူႉၼင်ႇၼႆ။
ဝၢႆးလင်လႆႈႁူႉၶၢဝ်ႇယဝ်ႉ ၸုမ်းၽဵဝ်ႈမူၺ်ႉတၢင်းပဵၼ်ၶူဝ်ႊဝိတ်ႉ 19 ႁွတ်ႈထိုင်ႈတီႈဝၢၼ်ႈ ၵျႃႇတီႇ ဢၼ်ၶဝ်ယူႇသဝ်းၼၼ်ႉသေ ၵူတ်ႇထတ်းပၼ်ပၢႆးယူႇလီ ၵူၼ်း 15 ၵေႃႉ ဢၼ်ၵႂႃႇၶုတ်းၵူၼ်းတၢႆမႃးၼၼ်ႉ လႆႈထူပ်းႁၼ်တိတ်းၸပ်းၸိူဝ်ႉမႅင်း တင်း 15 ၵေႃႉ။
လိူဝ်ၼၼ်ႉ ယင်းလႆႈသင်ႇႁႂ်ႈၵူၼ်း100 ပၢႆ ၸိူဝ်းလႆႈႁူပ်ႉထူပ်းတင်း 15 ၵေႃႉၼၼ်ႉ ႁႂ်ႈၵုမ်းၶင်တူဝ်ၽႂ်မၼ်း၊ လႆႈပိၵ်ႉဢိုတ်းဝၢၼ်ႈဢိူင်ႇတီႈၸိူဝ်းၶဝ်ယူႇ။
ဝၢႆးၼၼ်ႉ ၼႂ်းထုင်ႉဝၢၼ်ႈၵျႃႇတီႇၼၼ်ႉထူပ်းႁၼ်ၵူၼ်းၸပ်းတၢင်းပဵၼ် ထႅင်ႈ 45 ၵေႃႉလႄႈ ထိုင်တီႈလႆႈသင်ပိၵ်ႉပႃး ဝတ်ႉၵျွင်းဝႆႈၽြႃး (ပလီႇ) ၼၼ်ႉဝႃႈၼႆ။
ၼႂ်းဝၼ်းမိူဝ်ႈၼႆႉ 20/5/2020 တီႈမိူင်းဢိၼ်ႊတူဝ်ႊၼီႊသျႃး မီးၵူၼ်းၸပ်းတၢင်းပဵၼ်ၶူဝ်ႊဝိတ်ႉ တင်းမူတ်း 18496 ၵေႃႉ လူႉတၢႆ 1221 ၵေႃႉ ယူတ်းယႃသေၶိုၼ်းၶႅၼ်းၸိုၼ်ႈမႃးမီး 4467 ၵေႃႉ လႆႈႁူႉၸွမ်း ဝႅပ်ႉသၢႆႉ Worldometer ဝႆႉၼင်ႇၼႆ။
ဢၢင်ႈဢိင်ၶၢဝ်ႇတီႈ -Asia One, The Jakatarpost
