မေႃသွၼ် ၼႂ်းႁူင်းႁဵၼ်းလူင်ပွင်ၸိုင်ႈမၢၼ်ႈ တႂ်ႈသိုၵ်းမၢၼ်ႈ ၵုမ်းၵမ် တီႈဝဵင်းလႃႈသဵဝ်ႈ တဵၵ်းႁႂ်ႈလုၵ်ႈဢွၼ်ႇ ႁဵၼ်းလိၵ်ႈ ၶၢဝ်းယၢမ်းလိူဝ်  (အချိန်ပို) သေ သွၼ်ႇပဵၼ်ၵၢၼ်ႁဵၼ်းၽိသဵတ်ႇ (ၵိဝ်ႇသိၼ်ႇ/ ကျူရှင်)   ၵဵပ်းငိုၼ်းၵႃႈႁဵၼ်း 1 ၵေႃႉလႂ် 2 မိုၼ်ႇပျႃး။

တႄႇဢဝ် ႁူဝ်လိူၼ်ၵျုၼ်ႊ 2022 ၼႆႉမႃး ႁူင်းႁဵၼ်းလူင်ပွင်ၸိုင်ႈမၢၼ်ႈ တႄႇပိုတ်ႇႁူင်းႁဵၼ်းၶိုၼ်း ။မေႃသွၼ်ၼႂ်းႁူင်းႁဵၼ်း ၼႂ်းၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ တဵၵ်းၸႂ်ႉလုၵ်ႈဢွၼ်ႇ  ႁဵၼ်းလိၵ်ႈၼွၵ်ႈၶၢဝ်းယၢမ်းႁူင်းႁဵၼ်းသေ ၵဵပ်းငိုၼ်းလိူဝ်ထႅင်ႈ  ပေႃႈမႄႈလုၵ်ႈဢွၼ်ႇၵိၼ်းၸႂ်။

ၵူၼ်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ -“မေႃသွၼ် မၢင်ၵေႃႉ ၶႂ်ႈပိုတ်ႇသွၼ်ၵိဝ်ႇသိၼ်ႇ ဢမ်ႇမီးဢွင်ႈတီႈသွၼ် ယွၼ်ႉၶဝ်ၶၢတ်ႈယူႇ ၸွမ်းႁွင်ႈ ၶၢတ်ႇ ပိုၼ်ႉတီႈၵႅပ်ႈႁႅင်း။  ၵမ်းၼႆႉ ဢဝ်တိုဝ်ႉတၢင်းၼႆႉသေ ဝၢႆးဝၼ်းၶၢဝ်းလူင်းႁူင်းႁဵၼ်းၵေႃႈ ဢမ်ႇပၼ်လုၵ်ႈဢွၼ်ႇ ပွၵ်ႈႁိူၼ်း ၊ ၸႂ်ႉသိုပ်ႇႁဵၼ်းထႅင်ႈ။ သမ်ႉသွၼ်ႇပဵၼ်ၵၢၼ် ႁဵၼ်းၼွၵ်ႈၶၢဝ်းယၢမ်း  ။ ဝႃႈပဵၼ်ၵိဝ်ႇသိၼ်ႇ  ႁဵတ်းၼၼ်ၶႃႈဢေႃႈ။ လုၵ်ႈဢွၼ်ႇၼိုင်ႈၵေႃႉ တေလႆႈပၼ် 2 မိုၼ်ႇပျႃး တေႃႇ လိူၼ် ႁဵတ်းၼႆဢေႃႈ။ လၢတ်ႈသိုဝ်ႈသိုဝ်ႈတႄႉ လွင်ႈၶဝ်ႁဵတ်းၼႆႉ ဢမ်ႇၸႂ်ႈတြႃးဝၢင်ႇၶႃႈလူင်”- ဝႃႈၼႆ။

ဢိင်ၼိူဝ် လွင်ႈၼႆႉ ပေႃႈမႄႈ လုၵ်ႈဢွၼ်ႇႁဵၼ်းမၢင်ၵေႃႉ ဢွၼ်ၵၼ်ၶၢင်း မေႃသွၼ်ဢၼ်မႃး ပူင်သွၼ်ပၼ်ၼႆႉ ဢမ်ႇမီးၸႂ်မႅတ်ႉတႃႇၼိူဝ်လုၵ်ႈ ဢွၼ်ႇလႄႈ ဢမ်ႇႁၼ်ၸႂ်လွင်ႈတုၵ်ႉယၢၵ်ႈ ပေႃႈမႄႈ လုၵ်ႈဢွၼ်ႇ ဝႃႈၼႆ။

ပေႃႈလုၵ်ႈဢွၼ်ႇႁဵၼ်း လႃႈသဵဝ်ႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “လွင်ႈၸိူင်ႉၼႆ ၶဝ်ႁဵတ်း ၸဵမ်မိူဝ်ႈပီၵၢႆ လင်သိုၵ်းမၢၼ်ႈယိုတ်းမိူင်းမႃးၼၼ်ႉၶႃႈယဝ်ႉ ။ ဢၼ်ၶဝ်ႁဵတ်းမႃးၼႆႉ လိၵ်ႈၵေႃႈ ဢမ်ႇသွၼ်တႄႉတႄႉဝႃႈဝႃႈ။  မေႃသွၼ်ဢၼ်ၵိုတ်းဝႆႉ ယူႇတေႃႈလဵဝ်ၼႆႉ ဢမ်ႇၸႂ်ႈမီးၸႂ်မႅတ်ႉတႃႇၼိူဝ်လုၵ်ႈဢွၼ်ႇ သင် ။ မၼ်းႁၼ်ငိုၼ်းမဵဝ်းလဵဝ်လႄႈ သိုပ်ႇႁဵတ်းမေႃသွၼ်ၵႂႃႇၵူၺ်း ယွၼ်ႉပိူဝ်ႈၸိူင်ႉၼၼ် လၢႆးလႆႈတေလႆႈငိုၼ်းၼႆ ၶဝ်ႁဵတ်းၵူႈမဵဝ်းယဝ်ႉ”- ဝႃႈၼႆ။

မိူၼ်ၼႆ ၼင်ႇၵဝ်ႇ တီႈၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်းၵေႃႈ သင်ဝႃႈ လုၵ်ႈဢွၼ်ႇ တီႈဢၼ်ၶိုၼ်ႈႁူင်းႁဵၼ်းမၢၼ်ႈၼၼ်ႉ တေလႆႈ ႁဵၼ်းၼွၵ်ႈၶၢဝ်းယၢမ်း (ၵိဝ်ႇသိၼ်ႇ) ၵၼ် သင်ဢမ်ႇၶိုၼ်ႈၼႆ တေဢမ်ႇပၼ်ဢွင်ႇပူၼ်ႉၸၼ်ႉ ၵူၼ်းတႃႈၶီႈလဵၵ်းလၢတ်ႈ။

လိူဝ်ၼၼ်ႉ မိူၼ်ၼင်ႇ ၼႂ်းၸႄႈဝဵင်းၵဵင်းတုင်၊ ၵျွၵ်ႉမႄးလႄႈ ဢိၵ်ႇထႅင်ႈလၢႆၸႄႈဝဵင်း ၼႂ်းၸိုင်ႈတႆးပွတ်းၸိူဝ်းၼႆႉၵေႃႈ မေႃသွၼ်ၼႂ်းႁူင်းႁဵၼ်း လူင် ပွင်ၸိုင်ႈမၢၼ်ႈ ၵမ်ႈၼမ် တဵၵ်းႁႂ်ႈလုၵ်ႈဢွၼ်ႇ ၶိုၼ်ႈႁဵၼ်းၼွၵ်ႈၶၢဝ်းယၢမ်း ၼႆယဝ်ႉ။