မိူဝ်ႈဝႃး ဝၼ်းတီႈ 17/6/2022 ယၢမ်းၵၢင်ၶိုၼ်းမွၵ်ႈ 11 မူင်းၶိုင်ႈ ႁၢၼ်ႉၶၢႆယႃႈယႃ (Win)  တီႈႁိမ်းၵၢတ်ႇၽၵ်း ၶဵဝ် ဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ၺႃးယႃႉ သွၵ်ႈတဝ် ရူတ်ႉၶိူင်ႈႁၢႆလမ်းၼိုင်ႈ  ။

ၵူၼ်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်မိူဝ်ႈဝႃး ၵၢင်ၶိုၼ်း 11 မူင်းၶိုင်ႈ   ။ ႁၢၼ်ႉၶၢႆယႃႈယႃၺႃးယႃႉ ၶဝ်ႈသွၵ်ႈ ရူတ်ႉၶိူင်ႈႁၢႆလမ်းၼိုင်ႈ ပဵၼ်ဢၼ်လူႉသုမ်းဢၼ်ၵႃႈၶၼ်ယႂ်ႇသုတ်း။ လိူဝ်ၼၼ်ႉ ဢၼ်ႁၢႆထႅင်ႈ ဢၼ်ယွႆႈဢၼ်ယႅမ်း ၊ တေမီးၵႃႈၶၼ်ဢမ်ႇႁူႉ တင်းမူတ်း”- ဝႃႈၼႆ။

ယၢမ်းလဵဝ် ၼႂ်းၸႄႈဝဵင်းသီႇပေႃႉၼႆႉ သိုၵ်းမၢၼ်ႈပိုၼ်ၽၢဝ်ႇမၢႆမီႈႁၢမ်ႈဢွၵ်ႇႁိူၼ်းၶၢဝ်းၵၢင်ၶိုၼ်း (မႃႊသျႄႊလေႃႊ) ဝႆႉ။  ၽူႈလၵ်ႉၵူၼ်းၸူၼ်  လိူင်ႇၼမ်မႃးလိူဝ်ႇၵဝ်ႇ ပူၼ်ႉမႃးဝၼ်းသွင်ဝၼ်းၼႆႉ ၼႂ်းဝၼ်း လဵဝ်ၵူၺ်း ရူတ်ႉၶိူင်ႈ ၵူၼ်းပိုၼ်ႉတီႈ ႁၢႆသၢမ်လမ်း ၵမ်းလဵဝ် ၸိူင်ႉၼႆၵေႃႈမီး ဝႃႈၼႆ။

“ၽူႈလၵ်ႉၵူၼ်းၸူၼ်ၼႆႉ မၼ်းလိူင်ႇၼမ်ၼႃႇယဝ်ႉ တီႈသီႇပေႃႉၼႆႉ ၼႂ်းဝူင်ႈၼႆႉၵူၺ်း ရူတ်ႉၶိူင်ႈၵူၼ်းမိူင်းႁၢႆ  4 လမ်း ယဝ်ႉ။ ပူၼ်ႉမႃးဝၼ်းသွင်ဝၼ်းၼႆႉ ၵူၼ်းဝၢၼ်ႈမႃးၸၢႆႇၵၢတ်ႇ။ မႃးၸွတ်ႇဝႆႉရူတ်ႉၶိူင်ႈသေ ၶဝ်ႈၵႂႃႇသိုဝ်ႉၶူဝ်း။ ၽိူဝ်ႇဢွၵ်ႇၵၢတ်ႇမႃး ရူတ်ႉၶိူင်ႈၵေႃႈ ႁၢႆယဝ်ႉ။ ၼႂ်းဝၼ်းၼၼ်ႉ ႁၢႆ 3 လမ်း ။ မိူဝ်ႈဝႃးၼႆႉထႅင်ႈ 1 လမ်း”- ၵူၼ်းသီႇပေႃႉ သိုပ်ႇလၢတ်ႈၼႄၼင်ႇၼႆ။

ဝၢႆးသိုၵ်းမၢၼ်ႈ ယိုတ်းမိူင်းမႃး ၶၢဝ်းတၢင်း ပီပၢႆၼႆႉ ၵၢၼ်မိူင်းသုၵ်ႉ ၵၢၼ်မၢၵ်ႈမီးတူၵ်း ၵၢၼ်ၽုၵ်ႇသွမ်ႈဢမ်ႇပဵၼ်ၵၢၼ် ၵူၼ်းမိူင်းႁႃၵိၼ်လဵင်ႉတွင်ႉယၢပ်ႇ၊ ၾၢႆႇၼိုင်ႈ သိုၵ်းမၢၼ်ႈၸႂ်ႉႁဵတ်းပၢင်တေႃႇလွင်းၵူႈဝဵင်း။ ပွႆႇၽူႈၸွပ်ႇ၊ ၵူၼ်းသိုၵ်းမၢၼ်ႈၶဝ်ႈဝၢၼ်ႈၶဝ်ႈဝဵင်း၊ ၵူၼ်းပႅၵ်ႇၼႃႈပႅၵ်ႇတႃၼမ်၊ ၽူႈလၵ်ႉၵူၼ်းၸူၼ်ၵေႃႈလိူင်ႇၼမ်မႃး၊ ၵူၼ်းမိူင်းဢမ်ႇမီးလွင်ႈႁူမ်ႇ လူမ်ႈ ဢုၼ်ႇၸႂ်သင်၊ ယိုင်ႈၶႅၼ်းႁဵတ်းႁႂ်ႈၽူႈလၵ်ႉၵူၼ်းၸူၼ်၊ ယႃႈမဝ်းၵမ်၊ ပၢင်တေႃႇလွင်း ၼမ်မႃးထႅင်ႈ ၼႆယဝ်ႉ။

မိူဝ်ႈဝၼ်းတီႈ 14/6/2022 ၼၼ်ႉ ႁိူၼ်းၵူၼ်းဝၢၼ်ႈ တီႈပွၵ်ႉၸၢင်ႈၶမ်းႁွင်ႇ ၸႄႈဝဵင်းသီႇပေႃႉ လင်ၼိုင်ႈ ၼၼ်ႉၵေႃႈ ထုၵ်ႇၵူၼ်းလၵ်ႉ ၶဝ်ႈႁိူၼ်း လႆႈၵႂႃႇငိုၼ်းသႅၼ်ပၢႆလႄႈ ၾူၼ်းလုၵ်ႈၼိုင်ႈ။ ၼႂ်းဝၼ်းၼၼ်ႉၵူၺ်း ႁၢၼ်ႉၶၢႆၾူၼ်း တီႈႁိမ်း ၵၢတ်ႇလူင်ၼၼ်ႉၵေႃႈ ၺႃးၽွတ်ႈယႃႉႁၢၼ်ႉၼိုင်ႈ ၼႆယဝ်ႉ။