လုမ်းတြႃးသိုၵ်းမၢၼ်ႈ ပၼ်တၢမ်ႇတၢႆၵူၼ်းၼုမ်ႇဝႃႉ ဝၢႆးတဵၵ်းၸႂ်ႉယွမ်းႁပ်ႉၽိတ်း လွင်ႈမၢၵ်ႇတႅၵ်ႇ ၼႂ်းပၢင်ၵမ်ႉထႅမ် တပ်ႉသိုၵ်းမၢၼ်ႈ မိူဝ်ႈႁူဝ်လိူၼ် ၾႅပ်ႊပိဝ်ႊရီႊ ၼႂ်းဝဵင်းတႃႈၶီႈလဵၵ်းၼႆႉ ယွၼ်ႉဢမ်ႇပဵၼ်ထမ်း မၢၼ်ႇမႅၼ်ႈလႄႈ ႁႂ်ႈပူတ်းထွၼ်ပႅတ်ႈတူတ်ႈတၢမ်ႇမၼ်းၸၢႆး တင်းမူတ်း SHRF တုၵ်းယွၼ်း။
မိူဝ်ႈၼႆႉ ဝၼ်းတီႈ 17/6/2022 ယူႇတီႈ ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး SHRF ဢွၵ်ႇၽိုၼ်တၢမ်းငဝ်းလၢႆး လွင်ႈလုမ်းတြႃးသိုၵ်းမၢၼ်ႈၸႄႈ တွၼ်ႈတႃႈၶီႈလဵၵ်း ၸိုင်ႈတႆးပွတ်းဢွၵ်ႇ တႅပ်းတတ်းပၼ်တၢမ်ႇတၢႆ ဢၢႆႈသႅင်မိူင်း ဢႃယု 24 ပီ ၵူၼ်းၼုမ်ႇဝႃႉ ႁႂ်ႈၽႅၼ်ၶေႃးတၢႆ ဝၢႆးပေႃႉထုပ်ႉ၊ ၶႃ ၸႂ်၊ တဵၵ်းၸႂ်ႉ ယွမ်းႁပ်ႉၽိတ်းဝႃႈလႆႈ ဢဝ်မၢၵ်ႇဝိုတ်ႉပွႆႇသႂ်ႇ တီႈပၢင်ၼႄၵၢင်ၸႂ်ၵမ်ႉထႅမ် လွင်ႈသိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်း ၼႂ်းဝဵင်းတႃႈ ၶီႈလဵၵ်း မိူဝ်ႈဝၼ်းတီႈ 1 လိူၼ် ၾႅပ်ႊပိဝ်ႊရီႊၼၼ်ႉ။
ၸၢႆးႁေႃသႅင် ၽူႈၶၢၼ်ပၢၵ်ႇ SHRF လၢတ်ႈတီႈၽူႈတွႆႇႁွၵ်ႈဝႃႈ – “ လွင်ႈၼႆႉ ႁဝ်းၶႃႈ တုၵ်းယွၼ်း ႁႂ်ႈထွၼ်တၢမ်ႇတၢင်းၽိတ်း ပၼ် ဢၢႆႈသႅင်မိူင်း သေ ပွႆႇမၼ်းၸၢႆး ဝႆးဝႆး။ မၼ်းၸၢႆး ဢမ်ႇမီးတၢင်းၽိတ်းသင်။ လွင်ႈၼႆႉ မိူၼ်တင်းၸဝ်ႈၼႃႈတီႈ ႁႃတၢင်းၽိတ်း ပူဝ်ႉသႂ်ႇၵူၼ်း ဢၼ်ၶဝ် ထၢင်ႇၼၼ်ႉၵူၺ်း။ ဢမ်ႇမီး လၵ်းထၢၼ်တႅတ်ႈတေႃးသင်သေ ပေႃႉထုပ်ႉ၊ ၶႃၸႂ်၊ ႁႃတၢင်းၽိတ်းသႂ်ႇ ၵၼ်ၼႆႉ ပူၼ်ႉပႅၼ်သုၼ်ႇလႆႈၵၼ်ၵူၺ်း။ လွင်ႈ လႆႈပေႃႉထုပ်ႉ ႁဵတ်းႁႂ်ႈမၼ်းၸၢႆး ၸဵပ်းသႅပ်ႇလိုမ်းတူဝ်ၼၼ်ႉ ႁဝ်းၶႃႈ တုၵ်းယွၼ်း ၸဝ်ႈၼႃႈတီႈၶဝ် ႁပ်ႉပုၼ်ႈၽွၼ်းတင်းမူတ်း။ လွင်ႈပၼ်တၢမ်ႇ တၢႆ တီႈလုမ်းတြႃးၼၼ်ႉၵေႃႈ ႁဝ်းၶႃႈ တုၵ်းယွၼ်းႁႂ်ႈထွၼ်ပႅတ်ႈၶိုၼ်းတင်းမူတ်း”- ဝႃႈၼႆ။
ဢၢႆႈသႅင်မိူင်း ဢႃယု 24 ပီၼႆႉ ၽွင်းမၢၵ်ႇတႅၵ်ႇၵၢင်ဝဵင်းတႃႈၶီႈလဵၵ်း ႁူဝ်ပီ 2022 ၼၼ်ႉ ၾၢႆႇၸွပ်ႇသွၵ်ႈၸုမ်းသိုၵ်းမၢၼ်ႈ တီႉၺွပ်း ၵုမ်းၶင်ဝႆႉ တႃႇၶၢဝ်းတၢင်းသီႇလိူၼ်။ ၼႃႈ တေပၼ်တၢမ်ႇ မိူဝ်ႈဝၼ်းတီႈ 1/6/2022 ပႃႈတႂ်ႈပၵ်းပိူင်မတ်ႉတႃ 54 ဢၼ်ဝႃႈ လူၺ်ႈပၵ်းပိူင်ႁႄႉႁၢမ်ႈၵၢၼ်ၵေႃႇၵၢၼ်ႁၢႆႉလႄႈ မတ်ႉတႃ 368 (1) ဢၼ်ဝႃႈလူၺ်ႈ ပၵ်းပိူင်တိုဝ်းၵမ်ၸွမ်း ၵၢၼ်ႁဵတ်းၽိတ်းပၵ်းပိူင်။
ဢၢႆႈသႅင်မိူင်းၼႆႉ ပဵၼ်ၵူၼ်းပၢင်သၢင်း မႃးႁဵတ်းၵၢၼ်တီႈတႃႈၶီႈလဵၵ်း။ ဢမ်ႇမီးလွင်ႈၵဵဝ်ႇၶွင်ႈၸွမ်းၸုမ်းသိုၵ်း/ ပႃႇတီႇ ၵၢၼ်မိူင်းသင် ၵူၼ်းပိုၼ်ႉတီႈလၢတ်ႈၼင်ႇၼႆ။
မၼ်းၸၢႆးၼႆႉ ဢမ်ႇပေႃးမေႃၵႂၢမ်းမၢၼ်ႈလီ၊ ယၢမ်းလဵဝ် ပီႈၼွင်ႉတင်းဢူၺ်းၵေႃႉမၼ်း တိုၵ်ႉၸွႆႈႁႃတၢင်းတၢင်ႇယွၼ်း ႁႂ်ႈပွႆႇပၼ်မၼ်းၸၢႆးၶိုၼ်းယူႇ။ လိူဝ်ၼၼ်ႉ ၸုမ်းၵပ်းသၢၼ်ၵူၼ်းၼုမ်ႇဝႃႉ (Progressive Wa Youth Network) ၶဝ်ၵေႃႈ ဢွၵ်ႇၶေႃႈပိုၼ်ၽၢဝ်ႇ မိူဝ်ႈဝၼ်းတီႈ 3/6/2022 သေ သၢၼ်ၶတ်း လွင်ႈဢၼ်ပၼ်တၢမ်ႇတၢႆၸူးမၼ်းၸၢႆးၼႆႉပဵၼ်လွင်ႈဢမ်ႇပဵၼ်ထမ်းတြႃး တိုၵ်းသူၼ်းႁႂ်ႈ ၸုမ်းတူင်ႇဝူင်းဝႃႉၶဝ် ႁႃတၢင်း ၸွႆႈထႅမ် ယူႇ – ၼႂ်းၽိုၼ်တၢမ်းငဝ်းလၢႆး SHRF ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ