ပၢင်တေႃႇလွင်း တီႈဝဵင်းလၢင်းၶိူဝ်း ပိုတ်ႇမႃး ၶၢဝ်းတၢင်းၼိုင်ႈလိူၼ် ၽွၼ်းၸႃႉ တုမ်ႉယွၼ်ႈထိုင် ၵူၼ်းပိုၼ်ႉတီႈႁၢဝ်ႈႁႅင်း ပၼ်ႁႃၼႃႈ ႁိူၼ်းၽိတ်းမေႃးၵၼ် မီးမႃးၶိူဝ်းယႂ်း။
တႄႇဢဝ် ဝၼ်းတီႈ 17/5/2022 မႃးတေႃႇထိုင် 17/6/2022 ၼႆႉ ၸုမ်းပျီႇတူႉၸိတ်ႉ S သၢမ်တူဝ် လႄႈ ၶွင်ႇသီႇသိုၵ်းမၢၼ်ႈ ယိုတ်းမိူင်း ဢိၵ်ႇလူၺ်ႈ ပလိၵ်ႈမၢၼ်ႈ ၽူႈၵွၼ်းၸႄႈတွၼ်ႈ/ ဝဵင်း ႁူမ်ႈၵၼ်တင်း ပေႃႈလဵင်ႉၵူၼ်းလွင်း ပိုၼ်ႉတီႈ ၵိုၵ်း ပိုၼ်း ဝဵင်းလၢင်းၶိူဝ်း ပိုတ်ႇပၢင်တေႃႇလွင်း တီႈဝၢၼ်ႈတၼ်ႇၸၢင်ႉ ဢိူင်ႇဝၢၼ်ႈတႃႈ ဢၼ်မီးတၢင်း ၾၢႆႇႁွင်ႇဝဵင်းလၢင်းၶိူဝ်းၼႆႉ မီးၶၢဝ်းတၢင်း 1 လိူၼ်တဵမ်။
ၵူၼ်းလၢင်းၶိူဝ်း လၢတ်ႈတီႈၽူႈတွႆႇႁွၵ်ႈဝႃႈ -“ဝၢႆးသေ လိူၼ် 7 မူၼ်းမႃးၼႆႉ ၸၢတ်ႈသႅင်းတႄႉ ဢမ်ႇမီးယဝ်ႉ ပၢင်တေႃႇလွင်းတႄႉ တေမီးဢမ်ႇမီး ဢၼ်ဝႃႈၼၼ်ႉ ပႆႇတႅတ်ႈတေႃး။ ၸၢတ်ႈသႅင်းၶဝ်ၼၼ်ႉ လႆႈတူၵ်းလူင်းၵၼ်မႃး တေႃႇထိုင်လိူၼ်မူၼ်းၼႆႉၵူၺ်းဝႃႇ။ ယၢမ်းလဵဝ် ၵူၼ်းၵႂႃႇတေႃႇ လွင်းမၼ်းၵေႃႈ ဢမ်ႇပေႃးမီးၼမ်မိူၼ်မိူဝ်ႈၵူႈပွၵ်ႈယဝ်ႉ ယွၼ်ႉပဵၼ်ၶၢဝ်းလူဝ်ႇလူင်းႁႆႈလူင်းၼႃးလႄႈဝႃႈႁိုဝ် ဢမ်ႇႁူႉ”- ဝႃႈၼႆ။
ပၢင်တေႃႇလွင်း ၼႂ်းၸႄႈဝဵင်းလၢင်းၶိူဝ်း ၶၢဝ်းတၢင်း 1 လိူၼ်မႃးၼႆႉ မၢင်ၵေႃႉ ဢဝ်ရူတ်ႉၶိူင်ႈ ၶူဝ်းႁိူၼ်းယေး ၵႂႃႇပွင်ႇ လွင်းသုမ်းပႅတ်ႈၵေႃႈ မီးမႃး တင်းၼမ်ယဝ်ႉ ဝႃႈၼႆ။
“ၸူဝ်ႈၶၢဝ်း ပိုတ်ႇပၢင်တေႃႇလွင်းမီးမႃး ၶၢဝ်းတၢင်း ၼိုင်ႈလိူၼ်ၼႆႉ ၽွၼ်းၸႃႉမၼ်း တုမ်ႉယွၼ်ႈၵူၼ်းမိူင်းႁၢဝ်ႈႁႅင်း မၢင်ၵေႃႉ ဢဝ်ရူတ်ႉၶိူင်ႈ ၶူဝ်း ႁိူၼ်းယေး၊ ၾူၼ်း၊ ရူတ်ႉထိပ်ႇ ၸိူဝ်းၼႆႉ ၵႂႃႇပွင်ႇတေႃးလွင်း သုမ်းပႅတ်ႈၵေႃႈ မီးတင်းၼမ်ယဝ်ႉ။ ပၼ်ႁႃၼႃႈႁိူၼ်းၽိတ်းမေႃးၵၼ်ၵေႃႈ မီးမႃး ၶိူဝ်း ယႂ်းယဝ်ႉ။ ၽူႈလၵ်ႉ ၸိူဝ်းၼႆႉၵေႃႈ ၼမ်ဝႃႈၼမ်။ ၵူၺ်းၵႃႈ ၸဝ်ႈတႅင်ႇမၼ်းၵူၺ်းဢိူဝ်ႈ လႆႈၼမ်ႉမႅတ်ႈၼမ်ႉတွၼ်းမၼ်း ၵူၼ်းမိူင်းတႄႉ တုၵ်ႉၶ ယၢပ်ႇၸႂ် ၵၼ်ၼၼ်ႉၼႃႇ”- ၵူၼ်းလၢင်းၶိူဝ်း သိုပ်ႇလၢတ်ႈၼႄၼင်ႇၼႆ။
ၼႂ်းပၢင်တေႃႇလွင်း တီႈဝဵင်းလၢင်းၶိူဝ်းၼႆႉ မီးဝႆႉမိူၼ်ၼင်ႇ ပၢင်ၽၢႆးၵိဝ်း၊ လေးၵွင်ႇၵျိၼ်ႇ၊ 36 မိူင်းလူင်၊ ပၢင်ၽၢႆႉ (ၵူဝ်းမီး)လႄႈ မၢၵ်ႇတူၵ်းၶိုၼ်ႈလႆ (မၢၵ်ႇၵိင်ႈလွႆ) ၸိူဝ်းၼႆႉ။
ဝၢႆးသိုၵ်းမၢၼ်ႈ ယိုတ်းမိူင်းမႃး ၶၢဝ်းတၢင်းပီပၢႆၼႆႉ ပၢင်တေႃႇလွင်းလိူင်ႇၼမ်မႃး ၼႂ်းၸႄႈဝဵင်းၼမ်ႉၸၢင်၊ လၢင်းၶိူဝ်း၊ မိူင်းၼၢႆးလႄႈ ဢိၵ်ႇထႅင်ႈ လၢႆ ၸႄႈဝဵင်း ၼႂ်းၸႄႈမိူင်းတႆး။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ