ၼႂ်းၸႄႈဝဵင်းသီႇပေႃႉ ၼမ်ႉမၼ်းၸၢၵ်ႈၶၢတ်ႇၵႂႃႇၵမ်းၼိုင်ႈသေ ႁၢၼ်ႉၶၢႆၼမ်ႉမၼ်း ၵမ်ႈၼမ် လႆႈဢွၼ်ၵၼ်ပိၵ်ႉဢိုတ်းဝႆႉ ၸူဝ်ႈၶၢဝ်း။
ၵၢင်လိူၼ်ၵျုၼ်ႊ 2022 ၼႆႉ ၼမ်ႉမၼ်းၸၢၵ်ႈ ၼႂ်းၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ လႆႈၶၢတ်ႇ ႁႃသိုဝ်ႉယၢပ်ႇ ၼႂ်းၶၢဝ်းတၢင်းဝၼ်းသွင်ဝၼ်းၼႆႉ ၵူၼ်းပိုၼ်ႉတီႈ မၢင်ၵေႃႉ ထိုင်တီႈပေႃးလႆႈၵႂႃႇသႂ်ႇၼမ်ႉမၼ်းရူတ်ႉ ဢၼ်မီတၢင်းၼွၵ်ႈဝဵင်း ပုၼ်ႉ။
ၵူၼ်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ တီႈသီႇပေႃႉၼႆႉ ၼမ်ႉမၼ်းၸၢၵ်ႈ ၶၢတ်ႇႁႃသိုဝ်ႉယၢပ်ႇၵႂႃႇ ၵမ်ႉၼိုင်ႈ ႁၢၼ်ႉၼမ်ႉမၼ်း ၵမ်ႈ ၼမ် လႆႈပိၵ်ႉဢိုတ်းၵႂႃႇ မွၵ်ႈၶၢဝ်းတၢင်းဝၼ်းသွင်ဝၼ်းၼႆႉ။ လုၵ်ႈၶႃႈ ပေႃးလႆႈၵႂႃႇသႂ်ႇၼမ်ႉမၼ်းရူတ်ႉ တၢင်းၼွၵ်ႈဝဵင်းပူၼ်ႉဢေႃႈ ယၢမ်းလဵဝ် ပိုတ်ႇ ၶိုၼ်းမိူၼ်ၵဝ်ႇယဝ်ႉ”- ဝႃႈၼႆ။
ယၢမ်းလဵဝ် ၶၼ်ၼမ်ႉမၼ်းၸၢၵ်ႈ တီႈၸႄႈဝဵင်းသီႇပေႃႉၼႆႉ သႅၼ်းထၢတ်ႈသီႇ 1 လိတ်ႊ 2,800 ပျႃးထိုင် 2,900 ပျႃး။ တီႇၸေႇသမ်ႉ 1 လိတ်ႊ 2,750 ပျႃး ထိုင် 2,850 ပျႃး ၼႆယဝ်ႉ။
“ၽွင်းၼမ်ႉမၼ်းၸၢၵ်ႈ ၶိုၼ်ႈၸိူင်ႉၼႆၼႆႉ တုမ်ႉတိူဝ်ႉၵူၼ်းပိုၼ်ႉတီႈ ၸဝ်ႈသူၼ်ႁႆႈၼႃးၸဝ်ႈၵႃးၶဝ်ဢေႃႈ။ မိူဝ်ႈလဵဝ် ပဵၼ်ၽွင်းလူဝ်ႇထႆၼႃး ၽုၵ်ႇ သွမ်ႈၵၼ်ယဝ်ႉ ၸဝ်ႈၼႃးၵေႃႈၶၢင်း ယွၼ်ႉၶၼ်ၶၼ်ၼမ်ႉမၼ်းၸၢၵ်ႈၶိုၼ်ႈ။ ၸဝ်ႈၵႃး ၸိူဝ်းတၢင်ႇၶဝ်ႈၵၢပ်ႇ ၶူဝ်းၵုၼ်ႇ ၸိူဝ်းၼႆႉ ဢမ်ႇပဵၼ်ၵၢၼ် ဢမ်ႇလႆႈၵႃႈႁႅင်း ၵႃႈရူတ်ႉသင် ၸိူဝ်းၼႆႉ”- ၵူၼ်းသီႇပေႃႉ သိုပ်ႇလၢတ်ႈၼႄၼင်ႇၼႆ။
ၽွင်းၼမ်ႉမၼ်းၸၢၵ်ႈ ၶၢတ်ႇၼၼ်ႉ ႁၢၼ်ႉၶၢႆၼမ်ႉမၼ်းမၢင်ႁၢၼ်ႉ ထိုင်တီႈပေႃးလႆႈမၵ်းတတ်းၼမ်ႉမၼ်းၸၢၵ်ႈသေ ၶၢႆပၼ် ၸိူဝ်းၼႆႉၵေႃႈမီး ၼင်ႇ ဢၼ်ၶႂ်ႈလႆႈၵႃႈႁိုဝ်သေ သိုဝ်ႉတႄႉ ဢမ်ႇလႆႈ ပေႃးပဵၼ်ရူတ်ႉၶိူင်ႈ သႂ်ႇလႆႈ 5,000 ပျႃး၊ ၵႃးသမ်ႉ 20,000 ပျႃး ၼႆယဝ်ႉ။
လိူဝ်ၼၼ်ႉ မိူၼ်ၼင်ႇ ၼႂ်းၸႄႈဝဵင်းၵူတ်ႉၶၢႆ၊ လႃႈသဵဝ်ႈ၊ ၵျွၵ်ႉမႄး၊ ၼွင်ၶဵဝ်လႄႈ သီႇပေႃႉ ၸိူဝ်းၼႆႉ ၵမ်ႈၼမ် ၼမ်ႉမၼ်းၸၢၵ်ႈ ၶႂ်ႈႁႃသိုဝ်ႉယၢပ်ႇႁႅင်းဝႆႉ ၵူၼ်းပိုၼ်ႉတီႈ သီႇပေႃႉလၢတ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ