ၽူႈလၵ်ႉၸၵ်ႉၶုတ်ႈလိူင်ႇၼမ် ၼႂ်းဝဵင်းပၢင်လူင် ၵူၼ်းပိုၼ်ႉတီႈ သူၼ်းႁူၺ်းၵၼ် ၶွတ်ႇၽွတ်ႈဝႆႉၸုမ်းၵူၼ်းၼုမ်ႇ ပွၵ်ႉယွမ်ႇၽႂ်မၼ်း ပေႃးမီးလွင်ႈသင်မႃး ႁႂ်ႈၸၢင်ႈႁွင်ႉၵၼ်ငၢႆႈ တႃႇၵႅတ်ႇၶႄႁႄႉၵင်ႈၼႂ်းပွၵ်ႉ ဝႃႈၼႆ။

ၵူၼ်းပၢင်လူင် လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် တီႈပၢင်လူင်ၼႆႉ ၽူႈလၵ်ႉၸၵ်ႉၶုတ်ႈ လိူင်ႇၼမ် ။ ၵမ်ႉရူတ်ႉၶိူင်ႈႁၢႆဝႃႇ၊ ၵမ်ႉမီးၶၢဝ်ႇလၵ်ႉတီႈၼၼ်ႈ တီႈၼႆႈဝႃႇ ပဵၼ်မႃးၶိူဝ်းယႂ်း ။ ၵွပ်ႈၼႆလႄႈ ယူႇတီႈပွၵ်ႉယွမ်ႇၽႂ်မၼ်းသေ ႁႂ်ႈ ဢွၼ်ၵၼ် ၽွတ်ႈဝႆႉၸုမ်းၵူၼ်းၼုမ်ႇၵၼ် တႃႇတေတူင်ႉတိုၼ်ႇၾၢႆႇႁူမ်ႇလူမ်ႈ ပွၵ်ႉၽႂ်မၼ်း ပေႃးပဵၼ် လိူင်ႈသင်သေၸိူဝ်ႉသေမဵဝ်းၸိုင် ႁႂ်ႈႁွင်ႉ ၵၼ်လႆႈငၢႆႈ လူဝ်ႇတူဝ်ႈတၼ်းၵၼ်ဝႆႉ တႃႇၽွမ်ႉၵၼ်ၵႅတ်ႇၶႄႁႄႉၵင်ႈၵႂႃႇ ၵူၺ်းယဝ်ႉ။ ပေႃးႁဝ်းတေၸႂ်ယႂ်ႇပိူၼ်ႈမႃးၵႅတ်ႇၶႄပၼ်ႁဝ်းတႄႉ ဢမ်ႇလႆႈ ယဝ်ႉ တေႃႈလဵဝ်ၼႆႉ”- ဝႃႈၼႆ။

ဝၢႆးသိုၵ်းမၢၼ်ႈ ယိုတ်းမိူင်းမႃး ၼႂ်းဝဵင်းပၢင်လူင် ၽူႈလၵ်ႉၸၵ်ႉၶုတ်ႈၵေႃႈလိူင်ႇၼမ်ႁႅင်း၊ ႁၢၼ်ႉၶၢႆၶူဝ်းၵုၼ်ႇ ၸိူဝ်းၼႆႉၵေႃႈ ႁႃးယႃႉသေ လၵ်ႉဢဝ်ၶူဝ်းၶွင်ၵႂႃႇၵေႃႈမီးၼမ်။ ပၢင်တေႃႇလွင်း ၸိူဝ်းၼႆႉၵေႃႈ လိူင်ႇၼမ် ႁဵတ်းႁႂ်ႈၵူၼ်းၼုမ်ႇ တၢင်းယၢမ်ႈလူႉ ။

“ပၢင်တေႃႇလွင်း ၵဵမ်းပႃၼႆႉ ၶဝ်ပိုတ်ႇ ၼမ်ၼႃႇယဝ်ႉ တီႈပၢင်လူင်ၼႆႉ ။ ၵူၼ်းၼုမ်ႇၼႆႉ ဢွၼ်ၵၼ်တေႃႇလဵၼ်ႈ ၼမ်ဝႃႈၼမ် ။ ယႃႈမဝ်းၵမ် ၸိူဝ်းၼႆႉ လိူင်ႇၼမ်ၼႃႇၶႃႈ ။ ယွၼ်ႉပၢင်တေႃႇလွင်းၼႆႉသေ လွင်ႈလၵ်ႉၸၵ်ႉၶုတ်ႈၵၼ်ၼႆႉ မီးမႃးၶိူဝ်းယႂ်း လွင်ႈႁူမ်ႇလူမ်ႈတႄႉ ဢမ်ႇမီးသင်ယဝ်ႉ။ ပေႃးၵႂႃႇတိူင်ႇၽူႈမီးပုၼ်ႈၽွၼ်း ၵေႃႈ ဢမ်ႇၺွပ်း/ ဢမ်ႇဢဝ်လိူင်ႈသင်ပၼ်ၶႃႈ”- ၵူၼ်းဝဵင်းပၢင်လူင် သိုပ်ႇလၢတ်ႈၼႄၼင်ႇၼႆ။

ၸွမ်းၶၢင်ႈတၢင်း ၼႂ်းၵိဝ်ႇ/ သွႆး ၸွမ်းပွၵ်ႉ/ ယွမ်ႇ ၸိူဝ်းၼႆႉ ၵူၼ်းသူႇသမ်းၵိၼ်ယႃႈ ၼွၼ်း ၸွမ်းၶၢင်ႈတၢင်း မီးၼမ် မိူဝ်ႈလဵဝ် ၵူၼ်းပႅၵ်ႇၼႃႈပႅၵ်ႇတႃ လုၵ်ႉတၢင်ႇတီႈသီႇလႅၼ် မႃးယူႇသဝ်း ၵေႃႈ မီးၼမ် ၵူၼ်းပၢင်လူင်လၢတ်ႈထႅင်ႈၼင်ႇၼႆ ။