သိုၵ်းမၢၼ်ႈ ယိုတ်းမိူင်း ႁွင်ႉၵူၼ်းၶၢႆၼမ်ႉမၼ်းၸၢၵ်ႈ ၵိုၵ်းႁိူၼ်း ၵႂႃႇဢုပ်ႇတီႈလုမ်းသေ ၸီႉသင်ႇပိၵ်ႉဢိုတ်း တင်းမူတ်း တီႈဝဵင်းမိူင်းပဵင်း။

မိူဝ်ႈဝႃး ဝၼ်းတီႈ 9/6/2022 ယူႇတီႈၽူႈၵွၼ်းၸႄႈဝဵင်း၊ ၾၢႆႇလိူမ်ႇလႆႇလႄႈ ပလိၵ်ႈမၢၼ်ႈ တႂ်ႈသိုၵ်းမၢၼ်ႈ ယိုတ်းမိူင်း ၵုမ်းၵမ် ၸီႉသင်ႇၵူၼ်းၶၢႆ ၼမ်ႉမၼ်းၸၢၵ်ႈ ၵိုၵ်းႁိူၼ်းလႄႈ ၸိူဝ်းပိုတ်ႇႁၢၼ်ႉၶၢႆယွႆႈ ၸွမ်းႁိမ်းၶၢင်ႈတၢင်း ၼႂ်းၸႄႈဝဵင်းမိူင်းပဵင်း ၸႄႈတွၼ်ႈၵဵင်းတုင် ၸိုင်ႈတႆး ပွတ်းဢွၵ်ႇ ၶူင်း ႁႂ်ႈပိၵ်းဢိုတ်း တင်းမူတ်း ၼႆယဝ်ႉ။

ၵူၼ်းၶၢႆၼမ်ႉမၼ်းၸၢၵ်ႈ တီႈဝဵင်းမိူင်းပဵင်း လၢတ်ႈတီႈၽူႈတွႆႇႁွၵ်ႈဝႃႈ – “ၶဝ်ႁွင်ႉႁဝ်းၶႃႈ ၵႂႃႇတီႈလုမ်းၶဝ်သေ ၶဝ်ဝႃႈၸိူဝ်းပိုတ်ႇၶၢႆၵိုၵ်းႁိူၼ်းလႄႈ ၸွမ်းၶၢင်ႈတၢင်းတင်းမူတ်း ႁႂ်ႈပိၵ်ႉဢိုတ်း။ ႁဝ်းၶႃႈတႄႉ ဢမ်ႇလႆႈၶၢႆယဝ်ႉၶႃႈ ၼမ်ႉမၼ်းတႄႉ။ ၵူၺ်းၵႃႈ ပမ်ႉၼမ်ႉမၼ်းယႂ်ႇလူင်တႄႉ ပိုတ်ႇယူႇ ဢမ်ႇ ပိၵ်ႉၶႃႈ။ လွင်ႈပိၵ်ႉဢိုတ်းၼႆႉ ၵွပ်ႈသင်လႄႈ ၶဝ်ၸႂ်ႉပိၵ်ႉဢိုတ်းဢၼ်ဝႃႈၼၼ်ႉတႄႉ ဢမ်ႇလႆႈႁူႉၶႃႈ”- ဝႃႈၼႆ။

 ဢၼ်ၶဝ်ၸႂ်ႉပိၵ်ႉဢိုတ်းတႄႉ ပဵၼ်ႁၢၼ်ႉၶၢႆၼမ်ႉမၼ်းၸၢၵ်ႈၵိုၵ်းႁိူၼ်းလႄႈ ႁၢၼ်ႉၶၢႆၸွမ်းတၢင်း ၸိူဝ်းၼႆႉ ၵူၺ်းၵႃႈ ပမ်ႉယႂ်ႇလူင် 3 ဢၼ် ၼၼ်ႉတႄႉ ဢမ်ႇပိၵ်ႉဢိုတ်း ၼႆယဝ်ႉ။

“တေႃႈလဵဝ် ပမ်ႉၼမ်ႉမၼ်းယႂ်ႇလူင် 3 ဢၼ်တႄႉ လႆႈၶႂၢင်ႉပိုတ်ႇယူႇ။ တီႈမိူင်းပဵင်းၼႆႉ မီးဝႆႉပမ်ႉၼမ်ႉမၼ်း 3 တီႈၶႃႈ။ ယွၼ်ႉဝႃႈ ၶဝ်မီးဝႂ်ၶႂၢင်ႉပိုတ်ႇ။ ၵွပ်ႈၼႆလႄႈ ၶဝ်လႆႈၶႂၢင်ႉပိုတ်ႇ ၼႆၶႃႈဢေႃႈ”- ၵူၼ်းမိူင်းပဵင်း လၢတ်ႈတီႈၽူႈတွႆႇႁွၵ်ႈၼင်ႇၼႆ။

ႁၢၼ်ႉၶၢႆၼမ်ႉမၼ်းၸၢၵ်ႈ ဢၼ်ၶၢႆၵိုၵ်းႁိူၼ်းၼႆႉ မၢင်ၵေႃႉ ပိုတ်ႇၵိုၵ်းႁိူၼ်းမႃး မီး 30 ပီပၢႆယဝ်ႉ ဢမ်ႇတွၼ်ႈယၢမ်ႈၺႃး သင်ႇပိၵ်ႉဢိုတ်းၸိူင်ႉၼႆမႃး သေပွၵ်ႈ ပွၵ်ႈၼႆႉ တေလႆႈဝႃႈ ပဵၼ်ပွၵ်ႈၵမ်းႁႅၵ်ႈယဝ်ႉ ၵူၼ်းၶၢႆၼမ်ႉမၼ်းၸၢၵ်ႇလၢတ်ႈ။

ၼႂ်းဝၼ်းတီႈ 9 ၼႆႉၵူၺ်းၼင်ႇၵဝ်ႇ ယူႇတီႈၽူႈၵွၼ်းၸႄႈဝဵင်း၊ ပလိၵ်ႈမၢၼ်ႈလႄႈ ၽူႈၵွၼ်းပွၵ်ႉ/ ဢိူင်ႇ ၸီႉသင်ႇပိၵ်ႉပမ်ႉၼမ်ႉမၼ်းၸၢၵ်ႈ ၼႂ်းၸႄႈ ဝဵင်းမိူင်းယႆ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ ဢိၵ်ႇလၢႆလၢႆဝဵင်းၼႂ်းၸိုင်ႈတႆး  ယွၼ်ႉဢမ်ႇ မီးဝႂ်မၢႆၾၢင် ဝႃႈၼႆ။