မိူဝ်ႈၼႆႉ ဝၼ်းတီႈ 7/7/2022 ယၢမ်းၵၢင်ၼႂ် မွၵ်ႈ 7 မူင်း ၶွင်ႇသီႇသိုၵ်းမၢၼ်ႈ ယိုတ်းမိူင်း လၢမ်းလိမ်းယိုဝ်းၵွင်ႈလူင်/ ဢွၼ်ႇ ၵူႈႁူး/ တၢင်း တီႈၼႂ်း ပွၵ်ႉၵုင်းၵၢတ်ႇ (စျေးကုန်းရပ်ကွက်) ဝဵင်းမိူင်းပၢႆး ၸိုင်ႈတႆး ပွတ်းၸၢၼ်း တိူဝ်ႉသႂ်ႇၵူၼ်းပိုၼ်ႉတီႈ လူႉတၢႆ 1 ၵေႃႉ မၢတ်ႇၸဵပ်း 2 ၵေႃႉ။
ၵူၼ်းမိူင်းပၢႆး လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈ ယိုဝ်းၵွင်ႈလူင်/ ဢွၼ်ႇ လူင်းတီႈပွၵ်ႉသေးၵူင်း တိူဝ်ႉၺႃးၵူၼ်းမိူင်းတၢႆ 1 ၵေႃႉ မၢတ်ႇၸဵပ်း 2 ၵေႃႉ။ ယၢမ်းလဵဝ် ဢွင်ႈတီႈတႃႇလွတ်ႈၽေးၼႆႉ ဢမ်ႇမီးယဝ်ႉ။ ၵွင်ႈၼႆႉတေႃႇထိုင်ယၢမ်းဝၢႆးဝၼ်းတိုၵ်ႉယိုဝ်းယူႇပႆႇၵိုတ်း”- ဝႃႈၼႆ။
သိုၵ်းမၢၼ်ႈ ယိုတ်းမိူင်းၼႆႉ ဢဝ်ႁိူၼ်းၵူၼ်းဝၢၼ်ႈဝႆႉပဵၼ်ပဝ်ႉမၢႆသေ လၢမ်းလိမ်းယိုဝ်းၵွင်ႈလူင်/ ဢွၼ်ႇသႂ်ႇၼႆႉ တင်ႈတႄႇ တီႈပွၵ်ႉၺွင်ႇဝၢႆး (ညောင်ဝိုင်းရပ်ကွက်) ၼၼ်ႉမႃးယဝ်ႉ တေႃႇထိုင်ယၢမ်းလဵဝ် ပိုတ်းယိုဝ်းသႂ်ႇမႃး ၶိူဝ်းယႂ်း။
ဢိင်ၼိူဝ် လွင်ႈသိုၵ်းမၢၼ်ႈ လမ်းလိမ်းယိုဝ်းၵွင်ႈလူင်/ ဢွၼ်ႇ ပိုတ်းယိုဝ်းသႂ်ႇ ၸွမ်းၼႂ်းမူႇဝၢၼ်ႈ ၸိူဝ်းၼႆၼႆႉ ယၢမ်းလဵဝ် ၵူၼ်းဝၢၼ်ႈတႄႉ ႁၢင်ႈ ႁႅၼ်းၶူဝ်းၶွင်သႂ်ႇထူင်ၵၼ်ဝႆႉ တႃႇတေပၢႆႈ ဝႃႈၼႆ။
“မၢင်ၵေႃႉ ႁၢင်ႈႁႅၼ်းဝႆႉယဝ်ႉၶႃႈ တႃႇပၢႆႈ။ တေႃႈလဵဝ်တႄႉ ပႆႇမီးၽႂ်ပၢႆႈၶႃႈ။ လွင်ႈပိုတ်းယိုဝ်းၼႆႉ ၶႂ်ႈဝႃႈ မီးၵူႈတီႈယဝ်ႉ။ ယူႇတီႈ PDF ၵေႃႈပိုၼ်ၽၢဝ်ႇ ပၼ်ၾၢင်ႉသတိထိုင် ၵူၼ်းပိုၼ်ႉတီႈယူႇ ၼင်ႇႁိုဝ် ပေႃးတေႁူမ်ႇလူမ်ႈလွတ်ႈၽေးၵၼ်ၼၼ်ႉ ၶတ်းၸႂ် ႁႂ်ႈယူႇလွတ်ႈၵၼ်”- ၵူၼ်းမိူင်းပၢႆး သိုပ်ႇ လၢတ်ႈၼႄၼင်ႇၼႆ။
ယၢမ်းလဵဝ် သိုၵ်းမၢၼ်ႈတင်း ၸုမ်းၵႅတ်ႇၶႄၵူၼ်းမိူင်းၵေႃႈ တိုၵ်ႉသိုပ်ႇပဵၼ်ပၢင်တိုၵ်းၵၼ်ယူႇ ၼႂ်းဝဵင်းမိူင်းပၢႆး ဝႃႈၼႆ။
ၽူႈၶဝ်ႈၸုမ်း PDF လၢတ်ႈတီႈၽူႈတွႆႇႁွၵ်ႈဝႃႈ -“ၸႂ်ႈၶႃႈဢေႃႈ လွင်ႈပၢင်တိုၵ်းၵၼ်တႄႉ မီးယူႇၶႃႈ။ ၵူၺ်းၵႃႈ လွင်ႈႁူဝ်ယွႆႈမၼ်းတႄႉ ပႆႇၸၢင်ႈ ပိုၼ်ၽၢဝ်ႇၶႃႈ”- ဝႃႈၼႆ။
ယၢမ်းလဵဝ် ၼႂ်းၸႄႈဝဵင်းၾၢႆၶုၼ်၊ လွႆၶေႃလႄႈ တီႇမေႃႇသူဝ်ႇ ၸိူဝ်းၼႆႉ ယူႇတီႈ သိုၵ်းမၢၼ်ႈ ယိုတ်းမိူင်း ထႅမ်ႁႅင်းသိုၵ်း မႃးထႅင်ႈတင်းၼမ် ယူႇတီႈ တပ်ႉၵႅတ်ႇၶႄ သိုၵ်းၸိူဝ်ႉၸၢတ်ႈယၢင်းလႅင် KNDF ပိုၼ်ၽၢဝ်ႇဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ