မၢၵ်ႇတႅၵ်ႇ တီႈလုမ်းပၢႆးပၺ်ႇၺႃႇ ဝဵင်းၼွင်ၶဵဝ် တႅၵ်ႇတိူဝ်ႉသႂ်ႇ ၽူႈၵွၼ်းႁူင်းႁဵၼ်းၸၼ်ႉဢွၼ် ဝၢၼ်ႈမၢၵ်ႇၶီႈၼူ လူႉတၢႆ ၵေႃႉၼိုင်ႈ မေႃသွၼ်မၢတ်ႇၸဵပ်း 8 ၵေႃႉ။
မိူဝ်ႈဝႃး ဝၼ်းတီႈ 31/5/2022 ယၢမ်းဝၢႆးဝၼ်းမွၵ်ႈ 2 မူင်း မၢၵ်ႇတႅၵ်ႇတီႈလုမ်းၾၢႆႇပၢႆးပၺ်ႇၺႃႇ ၸႄႈဝဵင်းၼွင်ၶဵဝ် ၸႄႈ တွၼ်ႈ ၵျွၵ်ႉမႄး ၸိုင်ႈ တႆးပွတ်းႁွင်ႇ တႅၵ်ႇတိူဝ်ႉသႂ်ႇ တေႃႇၸေႃးၶိၼ်ႇၶိၼ်ႇၶျဵဝ်ႇလၢႆႇ ဢႃယု 53 ပီ ၽူႈၵွၼ်းႁူင်းႁဵၼ်း ၸၼ်ႉဢွၼ် ဝၢၼ်ႈမၢၵ်ႇၶီႇၼူ လူႉတၢႆ ၊ မေႃ သွၼ် 8 ၵေႃႉ မၢတ်ႇၸဵပ်းႁႅင်း။ ယၢမ်းလဵဝ် လႆႈသူင်ႇယူတ်းယႃတူဝ်ဝႆႉတီႈ ႁူင်းယႃသိုၵ်း ဝဵင်းပၢင်ႇဢူႈလူင် ၼႆယဝ်ႉ။
ၵူၼ်းၼွင်ၶဵဝ် လၢတ်ႈတီႈၽူႈတွႆႇႁွၵ်ႈဝႃႈ – “သြႃႇမ ဢၼ်တၢႆၵႂႃႇၼၼ်ႉ ပဵၼ်ၽူႈၵွၼ်းႁူင်းႁဵၼ်းၸၼ်ႉဢွၼ် တီႈဝၢၼ်ႈ မၢၵ်ႇၶီႈၼူ ၸိုဝ်ႈႁွင်ႉ တေႃႇၸေႃးၶိၼ်ႇၶိၼ်ႇၶျဵဝ်ႇလၢႆႇ ဢႃယု 53 ပီ။ မၼ်းၼၢင်း တိူဝ်ႉမၢတ်ႇၸဵပ်းႁႅင်းသေ ၵႂႃႇတၢႆ တီႈႁူင်းယႃ။ ဢၼ် မၢတ်ႇၸဵပ်းသေ လႆႈယူတ်းယႃတူဝ်ဝႆႉ တင်းမူတ်းမီး 8 ၵေႃႉ။ ၼႂ်းၼၼ်ႉ မၢတ်ႇၸဵပ်းႁၢဝ်ႈႁႅင်း 5 ၵေႃႉ”- ဝႃႈၼႆ။
ဢၼ်မၢတ်ႇၸဵပ်း 8 ၵေႃႉၼၼ်ႉ ပဵၼ်ၸၢႆး 4 ၵေႃႉလႄႈ ယိင်း 4 ၵေႃႉ။
ၽွင်းမၢၵ်ႇတႅၵ်ႇၼၼ်ႉသမ်ႉပဵၼ်ပၢင်ၵုမ် ႁူဝ်ႁုပ်ႈလိူၼ် ၊ ပဵၼ်မၢၵ်ႇ ၸုမ်းလႂ်မႃးႁၢင်ႈၵၢင်ၼႆ ပလိၵ်ႈယင်းပႆႇ ၸွပ်ႇသွၵ်ႈ တီႉၺွပ်းလႆႈ။
ဢိင်ၼိူဝ်လွင်ႈၼႆႉသေ မေႃသွၼ်ဢၼ်ႁဵတ်း CDM ဝႆႉၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ ဝၢၼ်ႈမိူင်းပႆႇၵတ်းယဵၼ် ၊ ပေႃႈမႄႈပႆႇၵိုင်ႇသူင်ႇလုၵ်ႈၸဝ်ႈၵဝ်ႇၵႂႃႇႁူင်းႁဵၼ်း ဝႃႈၼႆ။
“ယူႇတီႈၶႃႈတႄႉ ၶႂ်ႈႁႂ်ႈလုၵ်ႈဢွၼ်ႇလႆႈႁဵၼ်းဢေႃႈ။ ၵူၺ်းၵႃႈ လွင်ႈႁူမ်ႇလူမ်ႈ တႄႉပႆႇမီး၊ ယင်းတိုၵ်ႉလႆႈမႆႈၸႂ်ယူႇ။ ယွၼ်ႉဝႃႈ PDF တင်း သိုၵ်းမၢၼ်ႈ တိုၵ်ႉပဵၼ်ပၢင်တိုၵ်းၵၼ်ယူႇၵူႈဝၼ်း။ ယုမ်ႇယမ်ဝႃႈ တေဢမ်ႇမီးလွင်ႈတုမ်ႉတိူဝ်ႉ လုၵ်ႈဢွၼ်ႇၵမ်းသိုဝ်ႈၼႆသေတႃႉ သင်ဝႃႈ ပဵၼ်ပၢင်တိုၵ်းၵၼ် မႃး ႁႅင်းၸိုင် ၵူဝ်သိုၵ်းမၢၼ်ႈ ဢဝ်လုၵ်ႈဢွၼ်ႇႁဵတ်းပဵၼ်ႁူဝ်ႉႁႄႉၶဝ်သေၶိုၼ်းပိုတ်းယိုဝ်း။ လွင်ႈၼႆႉ ပဵၼ်ဢၼ်လွင်ႈမႆႈၸႂ် ၾၢင်ႉထိုင်ၵၼ်ယႂ်ႇၼမ်ၶႃႈ”- ဝႃႈၼႆ။
ဝၢႆးသေ မၢၵ်ႇတႅၵ်ႇ တီႈလုမ်းပၢႆးပၺ်ႇၺႃႇ တီႈဝဵင်းၼွင်ၶဵဝ် ယဝ်ႉ ယူႇတီႈ သိုၵ်းမၢၼ်ႈ ယိုတ်းမိူင်းတင်း ပလိၵ်ႈမၢၼ်ႈ ဢဝ်ဢဵၼ်ႁႅင်းတင်းၼမ် ၶဝ်ႈၵူတ်ႇထတ်း ၸွမ်းႁိမ်းႁွမ်းၼၼ်ႉ ႁၢဝ်ႈႁႅင်း တေႃႇထိုင်ယၢမ်းလဵဝ် ပႆႇတီႉလႆႈ ၵူၼ်းဝၢင်းမၢၵ်ႇၼႆယဝ်ႉ။
