မိူဝ်ႈၼႆႉ ဝၼ်းတီႈ 31/5/2022 ယၢမ်းဝၢႆးဝၼ်း မွၵ်ႈ 3 မူင်း မၢၵ်ႇတႅၵ်ႇတီႈလုမ်းပၢႆးပၺ်ႇၺႃႇ ၸႄႈဝဵင်းၼွင်ၶဵဝ် ၸႄႈတွၼ်ႈၵျွၵ်ႉမႄး ၸိုင်ႈတႆး ပွတ်းႁွင်ႇ ၽူႈႁၢပ်ႇၵၢၼ် (ဝန်ထမ်း) လႆႈတိူဝ်ႉၺႃးမၢတ်ႇၸဵပ်းႁၢဝ်ႈႁႅင်း 5 ၵေႃႉ။
ၽူႈၶဝ်ႈၸုမ်းပရႁိတ ဝဵင်းၼွင်ၶဵဝ် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ မၢၵ်ႇတႅၵ်ႇ တီႈၼႂ်းလုမ်းပၢႆးပၺ်ႇၺႃႇၵမ်ႈလဵဝ်။ တႅၵ်ႉ တိူဝ်ႉသႂ်ႇ ဝုၼ်ႇထၢၼ်း မၢတ်ႇၸဵပ်း 5 ၵေႃႉ။ မိူဝ်ႈၽွင်းမၢၵ်ႇတႅၵ်ႇၼၼ်ႉ ၶဝ်တိုၵ်ႉၸတ်းပၢင်ၵုမ်ၵၼ်။ ၶဝ် 5 ၵေႃႉၼၼ်ႉ လႆႈမၢတ်ႇၸဵပ်းႁၢဝ်ႈႁႅင်း လႆႈမႆႈၸႂ်ဝႆႉၶႃႈဢေႃႈ ယၢမ်းလဵဝ်တႄႉ”- ဝႃႈၼႆ။
ၽူႈႁၢပ်ႇၵၢၼ်ၾၢႆႇပၢႆးပၺ်ႇၺႃႇ 5 ၵေႃႉ ဢၼ်လႆႈမၢတ်ႇၸဵပ်းႁၢဝ်ႈႁႅင်းၼၼ်ႉ ယၢမ်းလဵဝ် လႆႈသူင်ႇယူတ်းယႃဝႆႉ တီႈႁူင်းယႃၼွင်ၶဵဝ်ယဝ်ႉ ဝႃႈၼႆ။
ယၢမ်းလဵဝ် တီႈဝဵင်းၼွင်ၶဵဝ်ၼႆႉ လွင်ႈဢၢပ်ႈလုၵ်ႈဢွၼ်ႇ ၵႂႃႇၶိုၼ်ႈႁူင်းႁဵၼ်း(ဢၢပ်ႈၵျွင်း) တႄႉ မီးယူႇမိူၼ်ၵဝ်ႇၵူၺ်း ဝႃႈၼႆ။
ၵူၼ်းၼွင်ၶဵဝ် လၢတ်ႈတီႈၽူႈတွႆႇႁွၵ်ႈဝႃႈ – “မၢၵ်ႇတႅၵ်ႇၼၼ်ႉ ပဵၼ်တီႈလုမ်းပၢႆးပၺ်ႇၺႃႇၶဝ်ၵူၺ်း။ ဢမ်ႇၸႂ်ႈတႅၵ်ႇတီႈႁူင်းႁဵၼ်း။ လွင်ႈၵႂႃႇ ဢၢပ်ႈ လုၵ်ႈဢွၼ်ႇႁဵၼ်းတႄႉ မီးမိူၼ်ၵဝ်ႇၵူၺ်းၶႃႈ။ လုၵ်ႈဢွၼ်ႇၵေႃႈ ၵႂႃႇႁူင်းႁဵၼ်းၵၼ်ယူႇၵူၺ်း”- ဝႃႈၼႆ။
ဢိင်ၼိူဝ် လွင်ႈမၢၵ်ႇတႅၵ်ႇ တီႈလုမ်းၾၢႆႇပၢႆးပၺ်ႇၺႃႇ တီႈဝဵင်းၼွင်ၶဵဝ်ၼႆႉ ပဵၼ်ၼမ်ႉမိုဝ်းၽႂ် ၸုမ်းလႂ် မႃးႁၢင်ႈၵၢင်ဝႆႉတႄႉ တေႃႇထိုင်ယၢမ်းလဵဝ် ပႆႇ ႁူႉလၢႆးႁူဝ်ယွႆႈမၼ်း ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ