ၸုမ်းပျီႇတူႉၸိတ်ႉလႄႈ သိုၵ်းမၢၼ်ႈ/ ပလိၵ်ႈမၢၼ်ႈ(ယေး) ႁူမ်ႈၵၼ် ၼႄၶေႃႈဢၢင်ႈဝႃႈ ႁဵတ်းပွႆးတၢင်ႇထီးထၢတ်ႈၼႆသေ ၸတ်းႁဵတ်းပႃးပၢင် တေႃႇလွင်းၵိုၼ်းၶွၼ်ႈ တီႈဝဵင်းလၢင်းၶိူဝ်း ၸိုင်ႈတႆးပွတ်းၸၢၼ်း။
ပၢင်တေႃႇလွင်းၼႆႉတႄႇမႃးၸဵမ်မိူဝ်ႈဝၼ်းတီႈ 17/5/2022 ၊ ယူႇတီႈၸုမ်းပျီႇတူႉၸိတ်ႉ S သၢမ်တူဝ်လႄႈ ၶွင်ႇသီႇ သိုၵ်းမၢၼ်ႈ ယိုတ်းမိူင်း ဢိၵ်ႇလူၺ်ႈပလိၵ်ႈမၢၼ်ႈ ၽူႈ ၵွၼ်းၸႄႈတွၼ်ႈ/ ဝဵင်း ႁူမ်ႈၵၼ်တင်း ပေႃႈလဵင်ႉၵူၼ်းလွင်း ပိုၼ်ႉတီႈ ၵိုၵ်းပိုၼ်းဝဵင်းလၢင်းၶိူဝ်း ပိုတ်ႇပၢင်တေႃႇလွင်း တီႈဝၢၼ်ႈတၼ်ႇၸၢင်ႉ ဢိူင်ႇဝၢၼ်ႈတႃႈ ဢၼ်မီးတၢင်းၾၢႆႇႁွင်ႇဝဵင်းလၢင်းၶိူဝ်း ။ ပၢင်တေႃႇလွင်းၼႆႉ တေဢၢၼ်းၸတ်းႁဵတ်း 1 လိူၼ်ဝႃႈၼႆ။
ၵူၼ်းလၢင်းၶိူဝ်း လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်ၸုမ်း S သၢမ်တူဝ်မႁႃႇၵျႃႇဢွၼ်ႁူဝ်ဢေႃႈ။ သိုၵ်းမၢၼ်ႈ/ ပလိၵ်ႈမၢၼ်ႈ ၽူႈၵွၼ်းၸႄႈတွၼ်ႈ/ ဝဵင်း ပၼ်ၶႂၢင်ႉၸတ်းႁဵတ်း။ ၶဝ်ဢဝ်ၶေႃႈဢၢင်ႈဝႃႈ တေႁဵတ်းပွႆးတၢင်ႇထီးထၢတ်ႈ တီႈႁူၺ်ႈလိုၵ်ႉၼႆသေ ၸတ်းႁဵတ်းပႃးပၢင်တေႃႇလွင်းၼၼ်ႉၶႃႈၼႃႇ။ ပၢင်တေႃႇလွင်းၼၼ်ႉ ၶဝ်ပိုတ်ႇဝႆႉ 24 ၸူဝ်ႈမူင်းၶႃႈ”- ဝႃႈၼႆ။
ယင်းပႆႇတဵမ်လိူၼ် ႁဵတ်းႁႂ်ႈၵူၼ်းပိုၼ်ႉတီႈဢမ်ႇမီးလွင်ႈႁူမ်ႇလူမ်ႈ၊ တၢင်းယၢမ်ႈလူႉ၊ ၽူႈလၵ်ႈၵူၼ်းၸူၼ်လိူင်ႇၼမ် ၶူဝ်းၶွင်ၵူၼ်းမိူင်းႁၢႆၵူႈဝၼ်း။
“ ယင်းပႆႇတဵမ်လိူၼ် ၽူႈလၵ်ႉၼႆႉ လိူင်ႇၼမ်ႁႅင်းၼႃႇယဝ်ႉ တီႈလၢင်းၶိူဝ်းၼႆႉ ၵမ်ႉရူတ်ႉၶိူင်ႈႁၢႆ၊ သၢႆၾႆးႁၢႆ ၸိူဝ်း ၼႆႉ ပဵၼ်မႃးၶိူဝ်းယႂ်းယဝ်ႉ။ ယဝ်ႉၵေႃႈ ဢၵျၢင်ႉ တၢင်းယၢမ်ႈၵူၼ်းမိူင်းလူႉႁႅင်း ၸိူဝ်းလွင်းသုမ်းၼပ်ႉႁူဝ်ပၢၵ်ႇသႅၼ် မၼ်းၵေႃႈမီးၼမ်ၼႃႇယဝ်ႉ။ ၸိူဝ်း ပွင်ႇၶမ်း ၸိူဝ်းၼႆႉၵေႃႈမီး ။ ၽူဝ်မေးၽိတ်းမေႃးၵၼ် တႅၵ်ႇၵၼ် ၸိူဝ်းၼႆႉၵေႃႈမီးမႃးယဝ်ႉၶႃႈ။ ၼႂ်းဝဵင်းၵူၼ်းလုၵ်ႉတၢင်ႇတီႈသီႇလႅၼ် မႃးယူႇၵေႃႈမီးၼမ်ၼႃႇယဝ်ႉ ၽႂ်ပဵၼ်ၽႂ် ပေႃးဢမ်ႇႁူႉယဝ်ႉ”- ၵူၼ်းလၢင်းၶိူဝ်း သိုပ်ႇလၢတ်ႈၼႄၼင်ႇၼႆ။
ၼႂ်းပၢင်တေႃႇလွင်း တီႈဝၢၼ်ႈတၼ်ႇၸၢင်ႉၼၼ်ႉ တေဢၢၼ်းၸတ်းႁဵတ်းတေႃႇထိုင် ဝၼ်းလိူၼ် 7 မူၼ်း ။ ၼႂ်းပၢင်ပွႆး ၼႆႉ မီးပႃးပၢင်ႁွင်ႉၵႂၢမ်းပၢၼ်မႂ်ႇ/ ၵဝ်ႇ ၸၢတ်ႈသႅင်း မွၵ်ႇႁွမ်သုင်ဝဵင်းၵျွၵ်ႉမႄး ထႅင်ႈ။
ၵူၼ်းၼုမ်ႇ လၢင်းၶိူဝ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ဢၼ်ၶဝ်ႁဵတ်းၼႆႉ မိူၼ်မိူဝ်ႈပၢၼ်သိုၵ်း မၢၼ်ႈၼဝတၼၼ်ႉလီလီယဝ်ႉၶႃႈ။ ပၢင်လွင်းၼႆႉမၼ်းၸင်ႇႁႃႁၢႆၵႂႃႇဝၢႆးလင်လိူၵ်ႈတင်ႈ ပီ 2010 ၼႆႉမႃးၵူၺ်းၶႃႈၼႃႇ။ ဝၢႆးသိုၵ်းမၢၼ်ႈ ယိုတ်း မိူင်းမႃးၼႆႉ ၶိုၼ်းမီးမႃးယဝ်ႉၶႃႈတီႈလၢင်းၶိူဝ်း။ ၶဝ်ၶတ်းၸႂ် ႁဵတ်းႁႂ်ႈၵူၼ်းမိူင်းဢမ်ႇႁူႉၵၢၼ်မိူင်း၊ ယႃႇႁႂ်ႈသူၼ်ၸႂ်ၵၢၼ်မိူင်းၼၼ်ႉၵူၺ်း”- ဝႃႈၼႆ။
ၼႂ်းပၢင်တေႃႇလွင်းၼၼ်ႉ မီးဝႆႉမိူၼ်ၼင်ႇ ပၢင်ၽၢႆးၵိဝ်း၊ လေးၵွင်ႇၵျိၼ်ႇ၊ 36 မိူင်းလူင်၊ ပၢင်ၽၢႆႉ (ၵူဝ်းမီး)လႄႈ မၢၵ်ႇတူၵ်းၶိုၼ်ႈလႆ (မၢၵ်ႇၵိင်ႈလွႆ) ၸိူဝ်းၼႆႉ။
ဝၢႆးသိုၵ်းမၢၼ်ႈ ယိုတ်းမိူင်းမႃး ၶၢဝ်းတၢင်းပီပၢႆၼႆႉ ပၢင်တေႃႇလွင်းလိူင်ႇၼမ်မႃး ၼႂ်းၸႄႈဝဵင်းၼမ်ႉၸၢင်၊ လၢင်းၶိူဝ်း၊ မိူင်းၼၢႆးလႄႈ ဢိၵ်ႇထႅင်ႈ လၢႆၸႄႈဝဵင်း ၼႂ်းၸႄႈမိူင်းတႆး ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ