မိူဝ်ႈဝႃး ဝၼ်းတီႈ 30/5/2022 ယၢမ်းၵၢင်ဝၼ်း 11 မူင်း ၾႆးမႆႈႁိူၼ်း ၵူၼ်းဝၢၼ်ႈ လင်ၼိုင်ႈ တီႈပွၵ်ႉ 1 ဝဵင်းဢွင်ႇပၢၼ်း ၸိုင်ႈတႆးပွတ်းၸၢၼ်း တိူဝ်ႉသႂ်ႇ ၵူၼ်းၸွႆႈ ၶႄၾႆး ၼႂ်းၸုမ်းၶႂၢႆၶႃပႄလႅင် ၵေႃႉၼိုင်ႈ လႆႈမၢတ်ႇၸဵပ်းၸွမ်း ။

ၽူႈၶဝ်ႈၸုမ်းၸွႆႈၶႄၾႆး ဢွင်ႇပၢၼ်း လၢတ်ႈတီႈၽူႈတွႆႇႁွၵ်ႈဝႃႈ – “ၾႆးၼႆႉ တႄႇမႆႈတီႈၸၼ်ႉၼိူဝ်။ ႁဵတ်းႁိုဝ်လႄႈမႆႈဢၼ်ဝႃႈၼၼ်ႉတႄႉ ပႆႇႁူႉ။ ယဝ်ႉၵေႃႈ လွင်ႈလႆႈလူႉသုမ်းၵႂႃႇၵႃႈႁိုဝ်ၵေႃႈ ပႆႇႁူႉ။ ၾႆးၼႆႉ တႄႇမႆႈမိူဝ်ႈ 11 မူင်းၵၢင်ဝၼ်း ထိုင်မွၵ်ႈ 12 မူင်းၶိုင်ႈၼႆႉ ၸင်ႇတေမွတ်ႇ။ ၶူဝ်းၶွင် ဢၼ်ပႃးၵႂႃႇၸွမ်းၾႆး လႅပ်ႈၼမ်ယူႇဢေႃႈ ”- ဝႃႈၼႆ။

ဢိင်ၼိူဝ် လွင်ႈၼႆႉ ၽူႈၶဝ်ႈၸုမ်းၶႂၢႆၶႃပႄလႅင် ဝဵင်းဢွင်ႇပၢၼ်း ဢၼ်ၶဝ်ႈၸွႆႈၶႄ ၾႆးၼၼ်ႉ လႆႈပဵၼ်ၽေးၵိုင်ႉၵၢင်ႉသေ မၢတ်ႇၸဵပ်းၸွမ်းၵေႃႉ ၼိုင်ႈ ယၢမ်းလဵဝ် လႆႈသူင်ႇယူတ်းယႃတူဝ်ဝႆႉ တီႈႁူင်းယႃယဝ်ႉ။

“ႁိူၼ်း ဢၼ်ၾႆးမႆႈ ၼႆႉ ပဵၼ်ႁိူၼ်းသွင်ၸၼ်ႉ သမ်ႉသုင်ဝႆႉလႄႈ ႁဵတ်းႁႂ်ႈ ၵူၼ်း ၶႄၾႆး ၺႃးပႃးၽေးဢူးပၢတ်ႈဢေႃႈ”- ၼႆ ၽူႈၶဝ်ႈၸုမ်းၸွႆႈၶႄၾႆး သိုပ်ႇလၢတ်ႈ ၼႄၼင်ႇၼႆ။

ႁိူၼ်းၵူၼ်းဝၢၼ်ႈ ဢၼ်ၾႆးမႆႈၼႆႉ ပဵၼ်ႁိူၼ်းဢုတ်ႇ သမ်ႉပိုတ်ႇပႃး ႁူင်းလိုဝ်ႈသဝ်း (တည်းခိုခန်း) ။ ၸိူဝ်ႈတႄႉႁွင်ႉဝႃႈ တေႃႇဝုၼ်ႇဢႄႉယဵၵ်ႉတႃႇ (တော်ဝင်ဧည့် ရိပ်သာ) ၼႆယဝ်ႉ။