မုၵ်ႉၸုမ်းၸၢဝ်းၶိူဝ်းတႆး မိူင်းၵွၵ်ႇ ၸတ်းႁဵတ်းပၢင်ဢုပ်ႇလၢတ်ႈ(တၢၼ်ႈၶႆႈ) မၢႆတွင်း ဝၼ်းလုၵ်ႉၽိုၼ်ႉ ၵႅတ်ႇၶႄဢဝ်ၶိုၼ်းမိူင်းၸိုင်ႈတႆး ၶွပ်ႈၶူပ်ႇ 64 ပီ ၼိူဝ်ဢွၼ်ႊလၢႆး (Online) ပွၵ်ႈၵမ်းႁႅၵ်ႈ မီးၽူႈၶဝ်ႈႁူမ်ႈလဵပ်ႈႁဵၼ်းထွမ်ႇငိၼ်း 40 ပၢႆ။
ဝၼ်းတီႈ 21/5/2022 ယၢမ်းၵၢင်ၶမ်ႈ 8 မူင်း ထိုင် 10 မူင်းၵၢင်ၶိုၼ်း ယူႇတီႈမုၵ်ႉၸုမ်းၸၢဝ်းၶိူဝ်းတႆး မိူင်းၵွၵ်ႇ ဢွၼ်ႁူဝ်ၼမ်းၼႃႈသေ ၸတ်း ႁဵတ်းပၢင်ဢုပ်ႇၶႆႈ မၢႆတွင်း ဝၼ်းလုၵ်ႉၽိုၼ်ႉၵႅတ်ႇ ၶႄဢဝ်ၶိုၼ်းမိူင်းၸိုင်ႈတႆး ၶွပ်ႈၶူပ်ႇ 64 ပီ လွင်ႈလူၺ်ႈလၢႆးလုၵ်ႉၽိုၼ်ႉလႄႈ ၵၢၼ်မိူင်းၸိုင်ႈတႆး ၽူႈဢုပ်ႇၶႆႈ ပဵၼ်ၶူးပိုၼ်ၶမ်း ၽယၵ်ႉဝူင်း ဝဵင်းၵဵင်းတုင် မီးၵူၼ်းၼုမ်ႇမိူင်းတႆး မိူင်းႁူမ်ႈတုမ်လႄႈမိူင်းထႆး ၶဝ်ႈႁူမ်ႈထွမ်ႇငိၼ်းလဵပ်ႈႁဵၼ်းၸွမ်းတၢင်းဢွၼ်ႊလၢႆႊ ။
ၼၢင်းထူၺ်းဢိင်ႇ လွႆဢုင်း (ႁွင်ႉ) ၼၢင်းမႂ်ႇ ၽူႈၼမ်းၼႂ်း မုၵ်ႉၸုမ်းၸၢဝ်းၶိူဝ်းတႆး မိူင်းၵွၵ်ႇ လၢတ်ႈ တီႈၽူႈတွႆႇႁွၵ်ႈဝႃႈ – “ပၢင်တၢၼ်ႈၶႆႈၼႆႉ ႁဝ်း ၶႃႈ ၸတ်းႁဵတ်းတႃႇဢဝ်ၵုင်ႇမုၼ်ၽူႈႁတ်းငၢၼ် ၸိူဝ်းလႆႈလူႇၼိူဝ်ႉလိူတ်ႈၵႂႃႇ ၼႂ်းပၢင်တူင်ႉၼိုင်တိုၵ်းတေႃးႁႄႉၵင်ႈ ဢဝ်ၶိုၼ်း သုၼ်ႇလႆႈသုၼ်ႇ ပဵၼ်ၶွင် မိူင်းတႆးႁဝ်း ၼႆႉပဵၼ်ပိူင်လူင်။ ယဝ်ႉၵေႃႈ ၶႂ်ႈတုၵ်းယွၼ်း ႁႂ်ႈတပ်ႉသိုၵ်းတႆးႁဝ်း ယႃႇပေလိုမ်းၶေႃႈယိူင်းမၢႆလုၵ်ႉၽိုၼ်ႉ ဢၼ်ၽူႈဢွၼ်ႁူဝ် ႁုၼ်ႈႁႅၵ်ႈၶဝ် တမ်းဝၢင်းဝႆႉၼၼ်ႉ”- ဝႃႈၼႆ။
မၢႆတွင်းဝၼ်းလုၵ်ႉၽိုၼ်ႉၶွပ်ႈတဵမ် 64 ပီၼႆႉ မုၵ်ႉၸုမ်းၸၢဝ်းၶိူဝ်းတႆး မိူင်းၵွၵ်ႇလႄႈပီႈၼွင်ႉတႆးတီႈၸမ် တီႈၵႆဢိၵ်ႇ ႁႅင်းၵၢၼ်တႆး ႁူမ်ႈၵၼ်ၵၢပ်ႇသွမ်း သင်ၶၸဝ်ႈ တီႈဝတ်ႉမႂ်ႇတႆး သႃႇထုပရႃႇ တိတ်ႇ သွႆး44/1 ၵုင်းထဵပ်ႈ ၸိုင်ႈထႆး။
ၼွၵ်ႈလိူဝ်ၼၼ်ႉ ၸွမ်းၼင်ႇ ပိူင်မုၵ်ႉၸုမ်းၸၢဝ်းၶိူဝ်းတႆး မိူင်းၵွၵ်ႇ မီးဝႆႉၼၼ်ႉ 2 ပီ 1 ပွၵ်ႈ ၸတ်းႁဵတ်းပၢင်လိူၵ်ႈတင်ႈ ႁူဝ်ပဝ်ႈ လႄႈ ၽူႈပွင် ၵၢၼ်ၸုမ်း။ ယၢမ်းလဵဝ် ႁူဝ်ပဝ်ႈပဵၼ် ၸၢႆးဢွင်ႇၶမ်း ၶိုၵ်ႉတွၼ်း၊ ၵႅမ်ႁူဝ်ပဝ်ႈ ၸၢႆးၼၼ်ႇတေႃး၊ ၽူႈၼမ်းၼႂ်း ၼၢင်းထူၺ်းဢိင်ႇ (ႁွင်ႉ) ၼၢင်း မႂ်ႇလႄႈ ၵႅမ်ၽူႈၼမ်းၼႂ်း ၼၢင်းမႂ်ႇၶမ်းႁၢၼ် ၊ တေႁၢပ်ႇၼႃႈၵၢၼ်မူႇၸုမ်းၵႂႃႇ ပီ 2022 တေႃႇထိုင် 2024 ။
မုၵ်ႉၸုမ်းၸၢဝ်းၶိူဝ်းတႆး ၼႆႉပိုတ်ႇလုမ်းဝႆႉ ၼႂ်းၸိုင်ႈထႆး 3 တီႈ တီႈမိူင်းၵွၵ်ႇ(ၵုင်းထဵပ်ႈ)၊ ၵဵင်းမႆႇလႄႈ ရယွင်း။ လိူဝ်ၼၼ်ႉ ၵိင်ႇၽႄ မုၵ်ႉၸုမ်းၸၢဝ်းၶိူဝ်းတႆး ထႅင်ႈ 2 တီႈသမ်ႉ ၵိင်ႇၽႄ လမ်းပုၼ်း။ ၵိင်ႇၽႄ ၿထုမ်းထႃးၼီး ၊ မုၵ်ႉၸုမ်းၸၢဝ်းၶိူဝ်းတႆးၼႆႉ တူင်ႉၼိုင်ၸွႆႈထႅမ်ၵၢၼ်တူင်ႇဝူင်းၵူၼ်းတႆးယၢၼ်မိူင်း ၊ ႁႃငိုၼ်းၵွင်ၵၢင် ၸွႆႈထႅမ်ၵူၼ်းပၢႆႈၽေးသိုၵ်းၼႂ်းမိူင်းတႆးၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ