ၾႆးၾႃႉသျွတ်ႊၾႆးမႆႈႁိူၼ်းလင်ၼိုင်ႈ တီႈဝဵင်းၵုၼ်ႁဵင် မႅၼ်ႈၽွင်းၵူၼ်းထဝ်ႈ ယူႇႁိူၼ်းၵေႃႉလဵဝ် ၶူဝ်းႁိူၼ်းဢမ်ႇတၼ်းလႆႈသင် လူႉသုမ်းၼပ်ႉငိုၼ်းၸမ် 100 သႅၼ်ပျႃး။
ဝၼ်းတီႈ 14/03/2018 ၶၢဝ်းယၢမ်းဝၢႆးဝၼ်း မွၵ်ႈ 4 မူင်း သၢႆ ၾႆးၾႃႉသျွတ်ႊလႄႈ ၾႆးမႆႈ ႁိူၼ်းလုင်းပၢၼ်း ပွၵ်ႉ 4 ၸႄႈဝဵင်းၵုၼ်ႁဵင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။
ၸၢႆးဢွင်ႇၵျေႃႇဢူး ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 2 ၸႄႈဝဵင်းၵုၼ်ႁဵင် လၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈဝႃႈ – “ မိူဝ်ႈၽွင်းၾႆးမႆႈၼၼ်ႉ မီးၵူၼ်းထဝ်ႈယူႇႁိူၼ်းၵေႃႉလဵဝ်ၵူၺ်းလႄႈ ဢမ်ႇတၼ်း လႆႈသင်။ ၾႆးမႆႈပွၵ်ႈၼႆႉပဵၼ်ယွၼ်ႉ သၢႆၾႆးၾႃႉသျွတ်ႊ၊ မိူဝ်ႈလဵဝ်ပဵၼ်ၶၢဝ်းမႆႈ ၶၢဝ်းႁႅင်ႈလႄႈ ႁႂ်ႈပီႈၼွင်ႉႁဝ်းတိူဝ်းဝႆႉသတိ လွင်ႈၵၢၼ်ၸႂ်ႉၽိုၼ်း၊ ၸႂ်ႉၾႆး ပိူင်လူင်ပဵၼ်သၢႆ ၾႆးၾႃႉၸိူဝ်းၼႆႉသေၵမ်း ” ဝႃႈၼႆ။
ၾႆးမႆႈပွၵ်ႈၼႆႉ ၵူၼ်းတႄႉဢမ်ႇမီးလွင်ႈမၢတ်ႇၸဵပ်းလူႉတၢႆ – မိူဝ်ႈလဵဝ်ယူႇတီႈၽူႈတႅၼ်း ၊ ၽူႈၵွၼ်း၊ ဢိၵ်ႇၽူႈမီးပုၼ်ႈၽွၼ်း ၼႂ်းဝဵင်းၵုၼ်ႁဵင် ဢွၼ်ၵၼ်ၵဵပ်း ငိုၼ်းလူႇတီႈ ၵူၼ်းဝၢၼ်ႈသေ တေၵႂႃႇၸွႆႈ ထႅမ် ၵူၼ်းၼႂ်းၼႃႈႁိူၼ်းဢၼ်ထုၵ်ႇၾႆးမႆႈၼႆႉယူႇဝႃႈၼႆ။
ႁိူၼ်းဢၼ်ၺႃးၾႆးမႆႈၼႆႉ ပဵၼ်ႁိူၼ်းလုင်းၸၢႆးပၢၼ်း ပဵၼ်ႁိူၼ်းမႆႉ သွင်ၸၼ်ႉ ၵူၼ်းယူႇၼႂ်း ႁိူၼ်းမီးမွၵ်ႈ 5 ၵေႃႉ ယွၼ်ႉၾႆးမႆႈဢမ်ႇတၼ်းလႆႈသင် လူႉသုမ်းၼပ်ႉပဵၼ်ငိုၼ်းမႅၼ်ႈမွၵ်ႈ 100 သႅၼ် (ပၢၵ်ႇသႅၼ်) ဝႃႈၼႆ။
မိူဝ်ႈဝၼ်းတီႈ 13/03/2018 ယၢမ်းၵၢင်ၶိုၼ်း 10 မူင်း ၾႆးမႆႈဝတ်ႉဝိႁၢရ်လူင်မွၵ်ႇတွင်း ၼႂ်းၸႄႈဝဵင်း သီႇပေႃႉ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ။ ယူႇၼိူဝ်သဵၼ်ႈတၢင်းၵႃး သီႇပေႃႉ- လႃႈသဵဝ်ႈ။ မီးၼႂ်းၵႄႈၵၢင်ဝၢၼ်ႈႁၢင်ၼႃးလႄႈ ဝၢၼ်ႈၼမ်ႉမႃႉ ၸႄႈဝဵင်းသီႇပေႃႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ