ပၢင်တေႃႇလွင်းတီႈဝဵင်းသီႇပေႃႉ လိူင်ႇၼမ် ၶၢဝ်းတၢင်းႁိုင် 2 လိူၼ်ပၢႆယဝ်ႉယင်းပႆႇဝၢႆး ၶၢႆႉပိုတ်ႇတီႈၼိုင်ႈယဝ်ႉတီႈၼိုင်ႈ ၸွမ်းဝၢၼ်ႈၸွမ်းသူၼ် ၽူႈလၵ်ႉၵူၼ်းၸူၼ်လိူင်ႇၼမ် ၵူၼ်းမိူင်း ဢမ်ႇမီးလွင်ႈႁူမ်ႇလူမ်ႈ ၵူၼ်းၼုမ်ႇဢၵျၢင်ႉတၢင်းယၢမ်ႈလူႉ ။
ယၢမ်းလဵဝ် ပၢင်တေႃႇလွင်းၼႆႉမီးဝႆႉ တီႈဝၢၼ်ႈၼႃးလွႆ ၸႄႈဝဵင်းသီႇပေႃႉ ၵူၼ်းမိူင်းပိုၼ်ႉတီႈလဵၵ်ႉယႂ်ႇၼုမ်ႇထဝ် ဢွၼ်ၵၼ်ၵႂႃႇတေႃႇလဵၼ်ႈ ၵိုၼ်းၵူႈၶမ်ႈ ။
ၵူၼ်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “ပၢင်တေႃႇလွင်း တီႈသီႇပေႃႉၼႆႉ တႄႇမႃးၸဵမ်မိူဝ်ႈ ပွႆးၽြႃးၵၢင်ႉမေႃႇ လိူၼ်သီႇ ။ ၶၢႆႉတီႈသေ ၸတ်းႁဵတ်းမႃး တီႈၼိုင်ႈယဝ်ႉ တီႈၼိုင်ႈ။ ဢွၼ်တၢင်းသုတ်းတႄႉ ၸတ်းႁဵတ်းတီႈပွႆးပထၢၼ်း ဝၢၼ်ႈမူးလေး ။ ၵမ်ႈၼမ် ဢၼ်ၸတ်းႁဵတ်းၼႆႉ တေပဵၼ် ၸွမ်းၼႂ်းဝၢၼ်ႈၼွၵ်ႈ/ ၼႃးပၢင်ႇ ၸွမ်းသၢပ်ႇဝဵင်း ၸိူဝ်းၼႆႉဢေႃႈ” – ဝႃႈၼႆ။
ပၢင်တေႃႇလွင်း ၼႂ်းၸႄႈဝဵင်းသီႇပေႃႉၼႆႉ တႄႇမႃးၸဵမ်မိူဝ်ႈ ပွႆးလိူၼ်သီႇ၊ ၸတ်းႁဵတ်းမႃး ၸွမ်းပွႆးပထၢၼ်း၊ ပွႆးသၢင်ႇလွင်း၊ ပွႆးၶိုၼ်ႈၸဝ်ႈမိူင်း တီႈၼိုင်ႈယဝ်ႉ တီႈၼိုင်ႈ ။
“မႆႈၸႂ်ၶႃႈဢေႃႈ လုၵ်ႈလၢင်း ၵူၼ်းႁဝ်းၶႃႈ ပေႃးမီးပၢင်တေႃႇလွင်းၼႆႉ တိုၼ်းမီးၽွၼ်းၸႃႉမႃးယဝ်ႉ။ ယၢမ်းလဵဝ် ၽူႈလၵ်ႉၵူၼ်းၸူၼ်ၼႆႉ ၼမ်မႃးၶႃႈဢေႃႈ တီႈသီႇပေႃႉၼႆႉ။ ယဝ်ႉၵေႃႈ မႆႈၸႂ်တႃႇၵၢၼ်ႁႃၵိၼ်လဵင်ႉတွင်ႉ။ ဝူၼ်ႉတူၺ်းၶႃႈလႄႈ ၶၢဝ်းတၢင်းၶူဝ်ႊဝိတ်ႉ 2 ပီမႃးၼႆႉ ၵၢၼ်ငၢၼ်းၵေႃႈ ဢမ်ႇပဵၼ်။ သိုၵ်းသမ်ႉယိုတ်းမိူင်းထႅင်ႈ ၵၢၼ်ငၢၼ်းဢမ်ႇပဵၼ်ထႅင်ႈ၊ ၵမ်းၼႆႉ ပၢင်လွင်းသမ်ႉ မႃးႁဵတ်းသႂ်ႇထႅင်ႈၸိူင်ႉၼႆ ႁဵတ်းႁိုဝ်လႄႈ ၵူၼ်းမိူင်းၼႆႉ ဢမ်ႇလူႉလႃႇ ဝူၼ်ႉတူၺ်းလူး …… ”- ၵူၼ်းသီႇပေႃႉ သိုပ်ႇလၢတ်ႈ ၼႄၼင်ႇၼႆ။
ဢိင်ၼိူဝ် လွင်ႈပၢင်တေႃႇလွင်း ၼႂ်းၸႄႈဝဵင်းသီႇပေႃႉ လိူင်ႇၼမ်မႃးၸိူင်ႉၼႆ ယူႇတီႈၽူႈမီးပုၼ်ႈၽွၼ်း ပလိၵ်ႈ/ ယေးမၢၼ်ႈ၊ သိုၵ်းမၢၼ်ႈ ၸိူဝ်းၼႆႉၵေႃႈ ဢမ်ႇဢဝ်လိူင်ႈတီႉၺွပ်းသင်ပၼ် တင်ႈၸႂ်သေ ပွႆႇႁႂ်ႈမၼ်းလိူင်ႇၼမ် ႁႂ်ႈတၢင်းယၢမ်ႈၵူၼ်းမိူင်းလူႉၵူၺ်း ၵူၼ်းသီႇပေႃႉလၢတ်ႈ။
ပၢင်တေႃႇလွင်း တီႈၸႄႈဝဵင်းသီႇပေႃႉ ၼႆႉ ၸတ်းႁဵတ်း ၼိုင်ႈတီႈလႂ် 3 ဝၼ်း ထိုင် 5 ဝၼ်း ၊ ႁဵတ်းလူင်ၵႂႃႇတီႈၼိုင်ႈယဝ်ႉတီႈၼိုင်ႈ။ ၵူၼ်းမႃးၸၼ်ၵၼ်ႊထရႅၵ်ႊ ၵဵပ်းၶွၼ်ႇသမ်ႉပဵၼ်ၵူၼ်းမိူင်းၽၵ်းၵႃႇ တၢင်းၵျွၵ်ႉမႄး၊ ၼမ်ႉလၼ်ႈ၊ လႃႈသဵဝ်ႈလႄႈ သီႇပေႃႉ ၸိူဝ်းၼႆႉ။
ဝၢႆးသိုၵ်းမၢၼ်ႈ ယိုတ်းမိူင်းမႃးၶၢဝ်းတၢင်း ပီပၢႆၼႆႉ ပၢင်တေႃႇလွင်း လိူင်ႇၼမ်ႁႅင်းလိူဝ်ႇၵဝ်ႇ၊ ၽူႈလၵ်ႉၵူၼ်းၸူၼ်၊ ယႃႈမဝ်းၵမ်ၵေႃႈ လိူင်ႇၼမ် ။ လွင်ႈၸိူဝ်းၼႆႉ ပလိၵ်ႈ/ သိုၵ်းမၢၼ်ႈ ဢမ်ႇတွၼ်ႉတီႉၺွပ်း ဢဝ်လိူင်ႈသင်လႆႈမႃးသေပွၵ်ႈ တင်ႈၸႂ်ပွႆႇႁႂ်ႈပဵၼ် ႁႂ်ႈၵူၼ်းမိူင်း ဢၵျၢင်ႉတၢင်းယၢမ်ႈလူႉၵူၺ်း ၽူႈတူင်ႉၼိုင် ၼႂ်းတူင်ႇဝူင်းၵူၼ်း ၵေႃႉၼိုင်ႈလၢတ်ႈ။
