သိုၵ်းမၢၼ်ႈ ၽဝ် ႁိူၼ်းၵူၼ်းဝၢၼ်ႈလင်ၼိုင်ႈ တီႈဝဵင်းယႂႃႇငၢၼ်ႇ ၶူဝ်းႁိူၼ်းယေး ဢမ်ႇတၼ်းလႆႈသင် ၸဝ်ႈႁိူၼ်း တၼ်းပၢႆႈလွတ်ႈ။
မိူဝ်ႈဝႃးဝၼ်းတီႈ 16/5/2022 ယၢမ်းၵၢင်ၶိုၼ်းမွၵ်ႈ 10 မူင်း သိုၵ်းမၢၼ်ႈၽဝ်ႁိူၼ်း ဢူးမွင်ႇထေး တီႈဝၢၼ်ႈလႄႇၵၢႆး ၸႄႈဝဵင်းယႂႃႇငၢၼ်ႇ ၸိုင်ႈတႆးပွတ်းၸၢၼ်း ။ ၶူဝ်းႁိူၼ်းဢၼ်ႇတၼ်းလႆႈသင်၊ ၾႆးမႆႈမူတ်း။
ၵူၼ်းၼုမ်ႇဝဵင်းယႂႃႇငၢၼ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ သိုၵ်းမၢၼ်ႈ ၽဝ် ႁိူၼ်းၵူၼ်းဝၢၼ်ႈၶႃႈဢေႃႈ ။ ၵတ်းၵႃႈ ၵူၼ်းႁိူၼ်း တၼ်းပၢႆႈပူၼ်ႉၶႃႈဢေႃႈ။ ၶူဝ်းၶွင်ၼႂ်းႁိူၼ်းယေးတႄႉ ဢမ်ႇတၼ်းလႆႈသင်ၶႃႈ မႆႈၵႂႃႇၸွမ်းမူတ်း”- ဝႃႈၼႆ။
ဢူးမွင်ႇထေးၼႆႉ ပဵၼ်ၵူၼ်းမိူင်းၽၵ်းၵႃႇ၊ ဢမ်ႇၵဵဝ်ႇၶွင်ႈ ၸွမ်းၸုမ်းယိပ်းၵွင်ႈၵၢင်ႇၸုမ်းလႂ်။ ဢိင်ၼိူဝ်မီးၵူၼ်းဝၢၼ်ႈ ၸိူဝ်းပဵၼ်ၸႂ်သိုၵ်းမၢၼ်ႈၼၼ်ႉ ၶႃႉၸိုဝ်ႈၶၢႆသဵင်လႄႈ သိုၵ်းမၢၼ်ႈ ၼႄးဝႃႈ ၵူၼ်းဝၢၼ်ႈလႄႇၵၢႆး ၸွႆႈထႅမ်သိုၵ်းၵူၼ်းမိူင်း ၼႆသေ သွၵ်ႈတဝ်ႁိူၼ်းယေးၵူၼ်းဝၢၼ်ႈၵူႈလင် ၊ ႁိူၼ်းဢူးမွင်ႇထေး ၵေႃႈသိုၵ်းမၢၼ်ႈသွၵ်ႈတဝ်မႃးတႃသေႇ။
“သိုၵ်းမၢၼ်ႈၵႆႉမႃးထဵတ်ႈထၢမ်ၵူၼ်းဝၢၼ်ႈ ၶိုၼ်ႈသွၵ်ႈႁိူၼ်းၵူၼ်းဝၢၼ်ႈလႄႈ ၵူၼ်းဝၢၼ်ႈဢွၼ်ၵၼ်ပၢႆႈၶဝ်ႈထိူၼ်ႇ။ ႁဵတ်းႁႂ်ႈသိုၵ်းမၢၼ်ႈယိင်ႈၶႅၼ်းၸႂ်လမ်သေ ၸင်ႇမႃးၽဝ်ႁိူၼ်း ဢူးမွင်ႇထေး ၼႆႉၶႃႈဢေႃႈ။” – ၵူၼ်းဝၢၼ်ႈ ၵူၼ်းၼုမ်ႇၼၼ်ႉသိုပ်ႇလၢတ်ႈၼင်ႇၼႆ။
ႁိူၼ်းယေး ဢူးမွင်ႇထေးၼႆႉ ပဵၼ်ႁိူၼ်းဢုတ်ႇ သွင်ၸၼ်ႉ ၊ မီးၵူၼ်းႁိူၼ်းယူႇလူၺ်ႈၵၼ် 5 ၵေႃႉ ဝႃႈၼႆ။
သိုၵ်းမၢၼ်ႈၼႆႉ ၽဝ်ႁိူၼ်းၵူၼ်းဝၢၼ်ႈလႄႇၵၢႆးယဝ်ႉ 8 လင် ။ ပိၵ်ႉဢိုတ်းဝႆႉယဝ်ႉ 10 လင် ပႃးတင်းႁိူၼ်း ၽူႈၶဝ်ႈၸုမ်းပႃႇတီႇၼူၵ်းယုင်း NLD ။
