ပၢင်တေႃႇလွင်းလိူင်ႇၼမ် တီႈဝဵင်းၵဵင်းတုင်ၸိုင်ႈတႆးပွတ်းဢွၵ်ႇ ၵႂႃႇပိုတ်ႇထိုင်ၼႂ်းၵၢတ်ႇၽၵ်းၶဵဝ် ႁိုင်ၸမ်လိူၼ်ယဝ်ႉ ဢမ်ႇမီးၽႂ်/ၵေႃႉလႂ် ႁၢမ်ႈသင်ႇပိၵ်ႉဢိုတ်း ။
ပၢင်တေႃႇလွင်း ပိုတ်ႇမႃးၸဵမ်မိူဝ်ႈ ၵၢင်လိူၼ်ဢေႊပရိူဝ်ႊ 2022 ၼၼ်ႉမႃး တေႃႇထိုင်ယၢမ်းလဵဝ် တီႈၵၢတ်ႇၽၵ်းၶဵဝ် ဝၢၼ်ႈဝူဝ်း ၼႂ်းဢိူင်ႇမိူင်းလင်း တၢင်းၶိုၼ်ႈထၢတ်ႈ ၸွမ်လွႆး ၼႂ်းၸႄႈဝဵင်းၵဵင်းတုင် ၊ ပိုတ်ႇ ယၢမ်းႁူဝ်ၶမ်ႈ 5 မူင်း ထိုင် 9 မူင်း ၵူႈၶမ်ႈ ၵူၼ်းမိူင်း ပေႃႈမႄႈၵူၼ်းၼုမ်ႇ မႆႈၸႂ်ၵူဝ်ဢၵျၢင်ႉတၢင်းယၢမ်ႈလုၵ်ႈလၢင်းလူႉ ။
ၵူၼ်းၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ – “ ပေႃးယၢမ်းၵၢင်ၼႂ် ပဵၼ်ၵၢတ်ႇၽၵ်းၶဵဝ် ပေႃးႁူဝ်ၶမ်ႈသမ်ႉ ပဵၼ်ပၢင်တေႃႇ လွင်းၵၼ်ဢေႃႈ။ ၵူၼ်းၵႂႃႇတေႃႇ လဵၼ်ႈၵၼ်ၼမ်ဝႃႈၼမ် ၵိုၼ်းၶွၼ်ႈၵူႈၶမ်ႈ ၸဵမ်ၼၢင်းယိင်း၊ ဢွၼ်ႇယိင်းၼုမ်ႇ ၸိူဝ်းၼႆႉၵေႃႈ ၵႂႃႇ လဵၼ်ႈၵၼ်ၼမ်။ မၢင်ပွၵ်ႈ ၵူၼ်းမႃးလဵၼ်ႈတေႃႇ မဝ်းလဝ်း/ ယႃႈသေ ႁွင်ႉသႅၼ်ႇသဵင်လင် ။ ဢမ်ႇမီးၽူႈယႂ်ႇၵူၼ်းလူင် ၵေႃႉလႂ် ၵႂႃႇႁၢမ်ႈၸီႉသင်ႇပိၵ်ႉဢိုတ်းသင်ၶႃႈ”- ဝႃႈၼႆ။
ပေႃးၵဵပ်းပၢင်တေႃႇလွင်းယဝ်ႉ ဢမ်ႇၽဵဝ်ႈပႃး ယုၵ်းယၢၵ်း တဝ်ႈလဝ်ႈ တဝ်ႈယႃႈ ပွႆႇဝႆႉမၢၵ်ႇမိူဝ်။ ယၢမ်းၵၢင်ၼႂ်မႃး ၵူၼ်းၶၢႆၽၵ်းၶဵဝ် လႆႈၶိုၼ်းမႃးၽဵဝ်ႈပတ်းယဝ်ႉၸင်ႇသိူဝ်ႇၶၢႆၶူဝ်း၊ ႁဵတ်းႁႂ်ႈၸိူင်ႉၵၢတ်ႇၵၢၼ်ငၢၼ်း။
“ၵၢင်ၶမ်ႈသမ်ႉ ၶဝ်တေႃႇလွင်းၵၼ် ၵိၼ်ယဝ်ႉ ပႅတ်ႈမၢၵ်ႇမိူဝ် ၸွမ်းၼႂ်းၵၢတ်ႇ ၸဵမ်ယုၵ်းယၵ်း တဝ်ႈလဝ်ႈ ၸိူဝ်းၼႆႉ ပေႃးမၢၵ်ႇမိူဝ် လူင်ဝႆႉၶႃႈ ။ မၢင် ပွၵ်ႈၵူၼ်းမႃးၶၢႆၵၢတ်ႇ ပေႃးလႆႈမႃးၽဵဝ်ႈပႅတ်ႈပၼ်ၵေႃႈမီးဢေႃႈ”- ၵူၼ်းၵဵင်းတုင် သိုပ်ႇလၢတ်ႈၼင်ႇၼႆ။
ဢိင်ၼိူဝ် လွင်ႈပၢင်တေႃႇလွင်းၼႆႉသေ ယူႇတီႈၵူၼ်းပိုၼ်ႉတီႈ ၵႂႃႇတၢင်ႇလၢတ်ႈ တီႈၽူႈမီးပုၼ်ႈၽွၼ်း ၽူႈၵွၼ်းဝၢၼ်ႈ/ ဢိူင်ႇယူႇၵေႃႈ ဢမ်ႇမီးၽႂ် ဢဝ်ပုၼ်ႈၽွၼ်းမႃးၵႄႈလိတ်ႈပၼ်ႁႃသင် ဝႃႈၼႆ။
ပၢင်တေႃႇလွင်းၼႆႉ တႄႇဢဝ် ယၢမ်းႁူဝ်ၶမ်ႈ 5 မူင်း ထိုင် 9 မူင်းၵၢင်ၶမ်ႈ ၵမ်ႈၼမ် ဢၼ်တေႃႈလဵၼ်ႈၵၼ်သမ်ႉ ပဵၼ် ပၢင်ၽၢႆႉ၊ လေးၵွင်ႇၵျိၼ်ႇ လႄႈ ဢိၵ်ႇထႅင်ႈလၢႆလၢႆမဵဝ်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ