ၵူၼ်းမိူင်းႁူမ်ႈတုမ်ၶၢမ်ႈလႅၼ်လိၼ် ၶဝ်ႈမိူင်းထႆးၵူႈဝၼ်း ၊ ၶၢဝ်းတၢင်း 15 ဝၼ်း ၼႂ်းလိူၼ်မေႊၼႆႉၵူၺ်း ၾၢႆႇပလိၵ်ႈထႆး တီႉလႆႈ ဢမ်ႇယွမ်း 1500 ယဝ်ႉဝႃႈၼႆ။
ဢၼ်ပလိၵ်ႈထႆးတီႉလႆႈၼမ်လိူဝ်ပိူၼ်ႈၼႆႉ ပဵၼ်ၼႂ်း 4 ၸႄႈတွၼ်ႈ မိူင်းထႆးတွၼ်ႈၼိူဝ်၊ ပဵၼ်ၸႄႈတွၼ်ႈ တၢၵ်ႇ ၊ ၸႄႈတွၼ်ႈ ပရၵျူပ်ႇၶီႊရီႊၶၼ်၊ ၸႄႈတွၼ်ႈ ၵဵင်းႁၢႆးလႄႈ ၸႄႈတွၼ်ႈ ဢယုတ်ႉထယ ၊ သိင်ႊပူႊရီႊ ၊ ဢၢင်ႇထွင်း ၸိူဝ်းၼႆႉ ။ ၼႂ်းဝၼ်းသဝ်ပူၼ်ႉမႃးၼႆႉဝၼ်းလဵဝ် ပလိၵ်ႈထႆးတီႉလႆႈၵူၼ်းမိူင်းႁူမ်ႈတုမ် ဢမ်ႇယွမ်း 300 ၵေႃႉ ၸုမ်းၸွႆႈထႅမ်ႁႅင်းၵၢၼ်ယၢၼ်မိူင်း မိူင်းႁူမ်ႈတုမ် လၢတ်ႈ။
ပလိၵ်ႈထႆးၼႆႉ ၼွၵ်ႈလိူဝ်ပႂ်ႉတီႉၺွပ်း ၵူၼ်းၸိူဝ်းဢမ်ႇမီးဝတ်းဝႂ် ၼိူဝ်သဵၼ်ႈတၢင်းလူင်ၵူၺ်းဢမ်ႇၵႃး မိူၼ်ၼင်ႇတီႈ ၸႄႈတွၼ်ႈ သမုတ်ႇသႃႊၶွၼ်ႊ ၸႄႈဝဵင်းမႁႃၶျႆး ၸိူဝ်းၼႆႉၵေႃႈ ၶဝ်ႈသွၵ်ႈထိုင်ၼႂ်းႁွင်ႈ ၼႂ်းႁိူၼ်း၊ တီႉလႆႈၵူၼ်းဢမ်ႇမီးဝတ်းဝႂ် ၊ ၸိူဝ်းၶဝ်ႈမိူင်းထႆးမႂ်ႇမႂ်ႇ ၼိုင်ႈဝၼ်းဢမ်ႇယွမ်း 30-40 ဝႃႈၼႆ။
ယၢမ်းလဵဝ်ၵေႃႈ လူင်ပွင်ၸိုင်ႈထႆး တူၵ်းလူင်းၵၼ်တင်း သိုၵ်းမၢၼ်ႈသေ ႁွင်ႉၵူၼ်းႁဵတ်းၵၢၼ်/ႁႅင်းၵၢၼ်မႂ်ႇ၊ တေႁဵတ်းပၼ်ဝတ်းဝႂ် ၼင်ႇပၵ်းပိူင်ဝၢၼ်ႈမိူင်းမီးဝႆႉၼႆသေ တႄႇၶိုင်ၵၢၼ်ယူႇယဝ်ႉလႄႈ ၾၢႆႇထႆးတႄႉမုင်ႈမွင်းဝႃႈ တေၸၢင်ႈလူတ်းယွၼ်ႇပၼ်ႁႃ ၵူၼ်းမိူင်းမၢၼ်ႈ လၵ်ႉလွမ်ၶဝ်ႈမိူင်းထႆး တႄႉတႄႉဝႃႈဝႃႈယူႇ ဝႃႈၼႆ။
