တႄႇဢဝ်ႁူဝ်လိူၼ်မေႊမႃးၼႆႉ ၸုမ်းတူင်ႉၼိုင်လွင်ႈၵႅတ်ႇၶႄၽေးၵႃႉၶၢႆၵူၼ်းလႄႈ ႁႅင်းၵၢၼ်ယၢၼ်မိူင်း AAT ႁူပ်ႉထူပ်းၵူၼ်းမိူင်းသီႇပေႃႉ ပၼ်ပိုၼ်ႉႁူႉတႃႇႁႄႉၵင်ႈၼင်ႇႁိုဝ်တေဢမ်ႇထုၵ်ႇ လွၵ်ႈဢဝ်ၵႂႃႇၵႃႉၶၢႆ၊ ၼင်ႇႁိုဝ်တေၸၢင်ႈၸွႆႈထႅမ်ပၼ်ၵူၼ်းၸိူဝ်းတူၵ်းပဵၼ်ယိူဝ်ႇ ၵူၼ်းၵႃႉၵူၼ်းၸိူဝ်းၼႆႉ ဝႃႈၼႆ။
ဝၼ်းတီႈ 15/5/2022 ၸုမ်းတူင်ႉၼိုင်လွင်ႈၵႅတ်ႇၶႄၽေးၵႃႉၶၢႆၵူၼ်းလႄႈ ႁႅင်းၵၢၼ်ယၢၼ်မိူင်း (AAT) ႁူပ်ႉထူပ်း ၵူၼ်းမိူင်း တီႈဝၢၼ်ႈတႃႈတေႈ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ၊ ဢုပ်ႇၵုမ်ပၼ်ပိုၼ်ႉႁူႉ တႃႇၵႅတ်ႇၶႄၽေးလွင်ႈၵၢၼ်ၵႃႉၶၢႆၵူၼ်း ၊ သင်ဝႃႈ ၵႂႃႇႁဵတ်းၵၢၼ်ၼွၵ်ႈမိူင်း /မိူင်းႁိမ်းႁွမ်းသေ ထူပ်းတၢင်းယၢပ်ႇၽိုတ်ႇမႃး တေလႆႈၵပ်းသိုပ်ႇ ယွၼ်းတၢင်းၸွႆႈထႅမ် ၸိူင်ႉႁိုဝ် ၼႆၸိူဝ်းၼႆႉ။ တီႈဢုပ်ႇၶႆႈပၼ်ပိုၼ်ႉႁူႉၼၼ်ႉ မီးၽူႈၶဝ်ႈႁူမ်ႈ လဵပ်ႈႁဵၼ်းထွမ်ႇငိၼ်း မွၵ်ႈ 30 ၼႆႉ ဝႃႈၼႆ။
ၼၢင်းၶမ်းယၢတ်ႇ ၽူႈပၼ်ပိုၼ်းႁူႉ လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်ပၼ်ပိုၼ်းႁူႉၼႆႉ မိူဝ်ႈလဵဝ် ႁဝ်းၶႃႈ လူင်းပၼ်တၢင်းသီႇပေႃႉ၊ ၵျွၵ်ႉမႄး ႁူဝ် ၶေႃႈဢၼ်ဝႃႈ လွင်ႈႁႄႉၵင်ႈၽေးၵႃႉၶၢႆၵူၼ်း ၸိူဝ်းၼႆႉ။ ႁဝ်းၶႃႈ ပၼ်မႃးလၢႆလၢႆဝၢၼ်ႈယဝ်ႉ ယွၼ်ႉပိူဝ်ႈဝၢၼ်ႈမိူင်းပဵၼ်ဝႆႉၸိူင်ႉၼႆသေ မိူဝ်ႈလဵဝ်ၼႆႉ ၵူၼ်းၵႂႃႇတၢင်ႇတီႈ၊ တၢင်ႇတၢင်းၸိူဝ်းၼႆႉၵေႃႈ ၼမ်မႃးလိူဝ်ၵဝ်ႇ မၢင်ဝၢၼ်ႈတေႃႉတႄႉမီးၵူၼ်းထဝ်ႈၵူၺ်း ပႂ်ႉႁိူၼ်း မၼ်းပဵၼ်ဝႆႉၸိူင်ႉၼႆလႄႈ ၸင်ႇ လူင်းပၼ်ပိုၼ်းႁူႉၶႃႈဢေႃႈ”- ဝႃႈၼႆ။
ၸုမ်း AAT ၼႆႉ ၸွႆႈထႅမ်ပၼ် ပေႃးၵူၼ်းမိူင်းတႆး ၸိူဝ်း ၵႂႃႇႁဵတ်းၵၢၼ်ယူႇတၢင်ႇမိူင်း ထူပ်းတၢင်းယၢပ်ႇၽိုတ်ႇ ၊ ၺႃးလွၵ်ႇငိုတ်ႈ ပေႉၵိၼ်၊ ထုၵ်ႇလွၵ်ႇလႅၼ်ဢဝ်ၵႂႃႇၶၢႆ ၸိူဝ်းၼႆႉလႄႈသင် ဢမ်ႇၼၼ် သင်ဝႃႈၶႂ်ႈပွၵ်ႈၶိုၼ်းႁိူၼ်းၼႆ ႁႂ်ႈၵပ်းသိုပ်ႇယွၼ်းတၢင်းၸွႆႈထႅမ်မႃးတီႈၸုမ်းလႆႈယူႇ ဝႃႈၼႆ။
ၼၢင်းမွၼ်းမွၼ်းပဝ်း ၽူႈတူင်ႉၼိုင် တူင်ႇဝူင်းၵူၼ်း သီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “ပူၼ်ႉမႃး သွင်ဝၼ်းၼႆႉ လႆႈလူင်းတီႈပၼ်ပိုၼ်းႁူႉ တီႈ ဝၢၼ်ႈတႃႈတေႈ ႁဝ်းဝႃႈ ပေႃးမီးၵူၼ်းၵႂႃႇမိူင်းၶႄႇ တၢင်ႇမိူင်းၼႆ ပေႃးထူပ်းၺႃးတၢင်းယၢပ်ႇ ထုၵ်ႇပိူၼ်ႈၶၢႆၵိၼ်၊ ထုၵ်ႇပိူၼ်ႈပေႉၵိၼ် ၸိူဝ်းၼႆႉ ၶႂ်ႈ မႃးႁိူၼ်းသေဢမ်ႇမႃးလႆႈ ၸဵမ်ၸိူဝ်းၼႆႉ ယူႇတီႈၸုမ်း AAT ၸၢင်ႈတေၸွႆႈထႅမ်ပၼ်ႁဝ်းလႆႈ – ၼႆ ၶဝ် သပ်းလႅင်းၼႄ လွင်ႈၸိူဝ်းၼႆႉဢေႃႈ”- ဝႃႈၼႆ။
ပၢင်ပၼ်ပိုၼ်ႉႁူႉၼႆႉ ၸတ်းႁဵတ်း တီႈ ဝၢၼ်ႈတႃႇတေႈ၊ ၵုင်းသႃႇ၊ ၵုၼ်ၸၢင်ႈလဵၵ်း ၸိူဝ်းၼႆ့။ မီးၵူၼ်းၼုမ်ႇလႄႈ ၽူႈတူင်ႉၼိုင် တူင်ႇဝူင်း မႃးၶဝ်ႈႁူမ်ႈ။ ၼင်ႇႁိုဝ် တေၵႅတ်ႇၵင်ႈလႆႈ လွင်ႈၵႃႉၶၢႆၵူၼ်းၼႆ့ ယူႇတီႈ ၸုမ်း (AAT) ၶဝ် ယင်းမီးၽႅၼ်ၵၢၼ် တႃႇလူင်းပၼ် ပိုၼ်ႉႁူႉ ထႅင်ႈလၢႆတီႈယူႇ ဝႃႈၼႆ။
