မိူဝ်ႈဝႃး ဝၼ်းတီႈ 16/5/2022 ယၢမ်းႁူဝ်ၶမ်ႈ သိုၵ်းမၢၼ်ႈ ၶဝ်ႈဝၢၼ်ႈသွင်ၼမ်ႉၵႄး ဢိူင်ႇလွႆပဝ်း ၸႄႈဝဵင်းၾၢႆၶုၼ် ၸိုင်ႈတႆးပွတ်းၸၢၼ်း ၽဝ်ႁိူၼ်းယေးၵူၼ်းဝၢၼ်ႈၾႆးမႆႈမူတ်း။
ၵူၼ်းပိုၼ်ႉတီႈလၢတ်ႈတီႈၽူႈတွႆႇႁွၵ်ႈဝႃႈ – “တၢင်းထုင်ႉႁဝ်းၶႃႈၼႆႉ သိုၵ်း PDF လႄႈသိုၵ်းမၢၼ်ႈ ယိုဝ်းၵၼ် လႆႈ 2-3 ဝၼ်းယဝ်ႉ။ ၵူၼ်းဝၢၼ်ႈ သွင်ၼမ်ႉၵႄး ၵေႃႈ ပၢႆႈမူတ်းယဝ်ႉ ၵိုတ်းယူႇ ၵူၼ်းပႂ်ႉဝၢၼ်ႈ 2-3 ၵေႃႉၵူၺ်း ပဵၼ်ၵူၼ်းထဝ်ႈလၢႆလၢႆ။ သိုၵ်းမၢၼ်ႈၵေႃႈလႃႇလိူင်းလိူင်းၵမ်းလဵဝ်ယဝ်ႉၶႃႈ ဢမ်ႇၵဵင်ၸႂ်ၵူၼ်းထဝ်ႈၼႂ်းဝၢၼ်ႈ သင်။ ၼႄးဝႃႈ ဝၢၼ်ႈသွင်ၼမ်ႉၵႄး ၵမ်ႉထႅမ်သိုၵ်း PDF လႄႈ ၼႆသေ လႃႇလႃႇၽဝ်ၽဝ်ဢေႃႈ။ ”-ဝႃႈၼႆ။
ၵူၼ်းဝၢၼ်ႈလၢတ်ႈဝႃႈ သိုၵ်းမၢၼ်ႈဢၼ်မႃးၽဝ်ဝၢၼ်ႈၼၼ်ႉ လႅပ်ႈပဵၼ်သိုၵ်းမၢၼ်ႈ ဢၼ်ပိုတ်းယိုဝ်းၵၼ်တင်း သိုၵ်း PDF ၾၢႆၶုၼ်၊ သိုၵ်း PDF ၼွင်ႁၢႆးယႃႈ၊ သိုၵ်းၵႅတ်ႇၶႄၵူၼ်းမိူင်း တိူင်းပွတ်းၵၢင်၊ တပ်ႉၵွင် 1005၊ ၸုမ်းသိုၵ်းယၢင်းလႅင် KNDF (ဢၼ်ႁူမ်ႈၵၼ်ဝႆႉ) ၼႂ်းဝူင်ႈၼႆႉသေ ၊ ၾၢႆႇသိုၵ်းမၢၼ်ႈ တၢႆ 8 ၵေႃႉ ပႃးၽူႈၵွၼ်းတပ်ႉပၢင်သဝ်းသိုၵ်းမၢၼ်ႈ ၵေႃႉၼိုင်ႈ။ သိုၵ်း PDF ႁူမ်ႈပွင်း တၢႆၵေႃႉၼိုင်ႈၼၼ်ႉ – ဝႃႈၼႆ။
ၾၢႆႇသိုၵ်းမၢၼ်ႈတႄႉပိုၼ်ၽၢဝ်ႇၼႂ်းၼႃႈလိၵ်ႈဝႅပ်ႉသၢႆႉ ၶဝ်ဝႃႈ ဢၼ်ၶဝ်ႈမႃးၽဝ်ႁိူၼ်းယေးၵူၼ်းဝၢၼ်ႈ သွင်ၼမ်ႉၵႄးၼႆႉပဵၼ် ၸုမ်းၵူၼ်းၵေႃႇၵၢၼ်ႁၢႆႉ ဢၼ်မီးၸိုဝ်ႈ PDF ၼၼ်ႉ။ ၵူၼ်းဝၢၼ်ႈဢၼ်မီးၼမ်ႉၸႂ်သမ်ႉသူင်ႇၶၢဝ်ႇလၢတ်ႈသိုၵ်းမၢၼ်ႈ ထႅမ်ႁႅင်းၶဝ်ႈဝၢၼ်ႈလိုပ်ႈလမ်းသိုၵ်း ၵေႃႇၵၢၼ်ႁၢႆႉ ပၢႆႈၵႂႃႇတၢင်းၸၢၼ်းဝၢၼ်ႈဝႃႈၼႆဝႆႉ။
ၵူၼ်းဝၢၼ်ႈတႄႉလၢတ်ႈတီႈၽူႈတွႆႇႁွၵ်ႈဝႃႈ ပဵၼ်သိုၵ်းမၢၼ်ႈၵမ်းလဵဝ်ဢၼ်လႃႇလႃႇ ၽဝ်ၽဝ်ဝၢၼ်ႈ ။ ယင်းမီးသိုၵ်းဢၼ်ၼုင်ႈၶူဝ်းပျီႇတူႉၸိတ်ႉပဢူဝ်းပႃးလူးၵွၼ်ႇ ဝႃႈၼႆ။ (ၵူၺ်းၵႃႈလွင်ႈၼႆႉ ၽူႈတွႆႇႁွၵ်ႈတႄႉ ဢမ်ႇလႆႈၶေႃႈယိုၼ်ယၼ်တီႈၸုမ်းသိုၵ်း PNO ။)
“သိုၵ်းမၢၼ်ႈၵမ်းလဵဝ်ယဝ်ႉၶႃႈ ဢၼ်မႃးၽဝ်ဝၢၼ်ႈႁဝ်း။ လႃႇလႃႇၽဝ်ၽဝ်။ ပႃးတင်းသိုၵ်း ပျီႇတူႉၸိတ်ႉပဢူဝ်းသေဢေႃႈ။ ၵွၼ်ႇၼႃႈၶဝ်တေမႃးၽဝ်ဝၢၼ်ႈၼႆႉ ၶဝ်တတ်းသၢႆၾႆးၾႃႉ၊ ၶဝ်တတ်းသၢႆၾူၼ်း ဢိၼ်ႇတႃႇၼႅတ်ႉလူးၵွၼ်ႇဢေႃႈ။ ၽွင်းၼၼ်ႉသိုၵ်း PDF ၶဝ်ယင်းလၢတ်ႈၵူၼ်းဝၢၼ်ႈဝႃႈ ႁႂ်ႈႁၢင်ႈႁႅၼ်းၶူဝ်းလမ်ႇလွင်ႈဝႆႉ။ ၸၢင်ႈပဵၼ်ပၢင်တိုၵ်းလႄႈ သိုၵ်းမၢၼ်ႈၸၢင်ႈႁဵတ်းႁၢႆႉတေႃႇၵူၼ်းဝၢၼ်ႈ။ သင်ဝႃႈသဵင်ၵွင်ႈဢွၵ်ႇ ႁႂ်ႈၵူၼ်းဝၢၼ်ႈလႆႈပၢႆႈၵမ်းလဵဝ် ၼႆဝႆႉ။ ပေႃးသဵင်ၵွင်ႈတႅၵ်ႇၵေႃႈၵူၼ်းဝၢၼ်ႈၵေႃႈပၢႆႈတႄႉဢေႃႈ။ ” – ၵူၼ်းဝၢၼ်ႈထုင်ႉၼၼ်ႉလၢတ်ႈၼင်ႇၼႆ။
ဝၢၼ်ႈသွင်ၼမ်ႉၵႄးၼႆႉပဵၼ်ဝၢၼ်ႈၵယၢၼ်း(ပၢတ်ႈတွင်း)။ မီးလင်ႁိူၼ်းမွၵ်ႈ 50 ပၢႆ။ ယၢမ်းလဵဝ်တႄႉ လင်ႁိူၼ်းၵေႃႈၾႆးမႆႈမူတ်း။
ၵူၼ်းဝၢၼ်ႈ သွင်ၼမ်ႉၵႄးလႄႈဝၢၼ်ႈႁိမ်းႁွမ်း လၢႆလၢႆဝၢၼ်ႈ ၵမ်ႈၽွင်ႈၵေႃႈပၢႆႈၵႂႃႇတၢင်း ဝၢၼ်ႈယဵၼ်ႇ ၼွင်မွၼ် ၊ ၵမ်ႈၽွင်ႈၵေႃႈပၢႆႈၶိုၼ်ႈပၢင်လွင်းၵမ်းသိုဝ်ႈ။ ယူႇသဝ်းၸွမ်းႁိူၼ်းယေးပီႈၼွင်ႉ လႄႈၵူၼ်းႁူႉၸၵ်း။ ယၢမ်းလဵဝ်ဢၼ်ႁွတ်ႈတၢင်း ၼွင်မွၼ် မီးယူႇ 2300 ၵေႃႉပၢႆ ၵူၼ်းၼွင်မွၼ်လၢတ်ႈ။
