ဝၼ်းတီႈ 12/5/2022 ယၢမ်းၵၢင်ၼႂ်ၸဝ်ႉ 4 မူင်း သိုၵ်းမၢၼ်ႈတင်း ၸုမ်းၵႅတ်ႇၶႄၵူၼ်းမိူင်း PDF ဝဵင်းၾၢႆၶုၼ် ပဵၼ်ပၢင်တိုၵ်းၵၼ် ႁၢဝ်ႈ ႁႅင်း တီႈဝၢၼ်ႈထီရီႇ ၸႄႈဝဵင်းၾၢႆၶုၼ် ၸိုင်ႈတႆးပွတ်းၸၢၼ်း ၵူၼ်းဝၢၼ်ႈ ပၢႆႈၽေးသိုၵ်းႁွတ်ႈထိုင် ဝဵင်းသီႇသႅင်ႇ ဝႃႈၼႆ။
ၵူၼ်းၼႂ်းၸုမ်း PDF လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ သိုၵ်းမၢၼ်ႈတင်း PDF ႁဝ်းၶႃႈ ပဵၼ်ပၢင်တိုၵ်းၵၼ် ယၢမ်းလဵဝ် ႁဝ်းၶႃႈ လႆႈဢဝ်လွင်ႈႁူမ်ႇလူမ်ႈဝႆႉပၼ် ၵူၼ်းပၢႆႈၽေး ယူႇၶႃႈ။ ၵမ်ႈၼမ် ဢွၼ်ၵၼ်ပၢႆႈၸူးတၢင်း သီႇသႅင်ႇၶႃႈဢေႃႈ”- ဝႃႈၼႆ။
ၵူၼ်းပၢႆႈၽေးၵေႃႈတိုၵ်ႉထိုင်မႃးတီႈသီႇသႅင်ႇပႆႇထၢတ်ႇလႄႈ ႁူဝ်ႁုပ်ႈမီးၵႃႈႁိုဝ်တႄႉပႆႇၸၢင်ႈႁူႉလႆႈ။
မိူဝ်ႈဝႃး ၵူၺ်းၼင်ႇၵဝ်ႇ ယၢမ်းဝၢႆးဝၼ်း 2 မူင်း သိုၵ်းမၢၼ်ႈ တပ်ႉ 421 တင်း 336 ဢၼ်ပၵ်းဝႆႉ တီႈၼႂ်းဝဵင်းၾၢႆၶုၼ်ၼၼ်ႉ ယိုဝ်းမၢၵ်ႇလူင်သႂ်ႇၼႂ်း ဝၢၼ်ႈ တူၵ်းသႂ်ႇတီႈဝၢၼ်ႈလွႆပဝ်း 2 လုၵ်ႈလႄႈ တီႈႁိမ်းဝၢၼ်ႈလႃႈႁႄ လုၵ်ႈၼိုင်ႈ ၼႆယဝ်ႉ။
