သိုၵ်းၵႅတ်ႇၶႄၵူၼ်းမိူင်း PDF လႄႈသိုၵ်းမၢၼ်ႈပိုတ်းယိုဝ်းၵၼ်တီႈဝဵင်းမိူင်းပၢႆး သိုၵ်းမၢၼ်ႈယိုဝ်းၵွင်ႈလူင် သႂ်ႇၼႂ်းပွၵ်ႉၼႂ်းဝဵင်း ၊ ၵူၼ်းမိူင်းပၢႆႈဝႆႉလႄႈဢမ်ႇမီးလွင်ႈမၢတ်ႇၸဵပ်းလူႉတၢႆ။
ဝၼ်းတီႈ 10/5/2022 မိူဝ်ႈဝႃး တေႃႇထိုင်ယၢမ်းၵၢင်ဝၼ်း သိုၵ်းမၢၼ်ႈ ယူႇၼိူဝ်ၵွင်းလွႆယိုဝ်းၵွင်ႈလူင်လူင်း ၼႂ်းဝဵင်းမိူင်းပၢႆး ယိုဝ်းသႂ်ႇၼႂ်းပွၵ်ႉၼႂ်းၾၢႆႇ တုမ်ႉတိူဝ်ႉႁိူၼ်းယေးၵူၼ်းဝၢၼ်ႈ။
Mobye Rescue Team တႅမ်ႈတၢင်ႇဝႆႉတီႈၾဵတ်ႉသ်ပုၵ်ႉပေႉ ၶဝ်ဝႃႈ – သိုၵ်း PDF တႄႉၶိုၼ်ႈယိုဝ်းသိုၵ်းမၢၼ်ႈတီႈၵွင်းလွႆ ။ ၵူၺ်းၵႃႈသိုၵ်းမၢၼ်ႈသမ်ႉ ယူႇၼိူဝ်ၵွင်းလွႆသေ ယိုဝ်းၵွင်ႈလူင်လူင်းၸူးၼႂ်းဝဵင်း။ လွင်ႈမၢတ်ႇၸဵပ်းလူႉတၢႆဢမ်ႇ မီး ဝႃႈၼႆ။
တီႈဝဵင်းမိူင်းပၢႆး ၸိုင်ႈတႆးပွတ်းၸၢၼ်းၼႆႉ သိုၵ်းမၢၼ်ႈလႄႈ တပ်ႉသိုၵ်းၵႅတ်ႇၶႄၵူၼ်းမိူင်း PDF ပိုတ်းယိုဝ်းၵၼ်မႃး ၸဵမ်မိူဝ်ႈပီၵၢႆ။ ႁူဝ်ပီၼႆႉယဵၼ်ၵႂႃႇၵမ်းၼိုင်ႈသေ တင်ႈဢဝ် ႁူဝ်လိူၼ်မေႊမႃးၼႆႉ ၶိုၼ်း တႄႇပိုတ်းယိုဝ်းၵၼ်မႃး ၶိုၼ်းႁၢဝ်ႈႁႅင်း။