သိုၵ်းမၢၼ်ႈယိုၼ်ယၼ် ၸုမ်းယိပ်းၵွင်ႈ 9 ၸုမ်းတေၵႂႃႇဢုပ်ႇလွင်ႈငမ်းယဵၼ်

171

မိူဝ်ႈၼႆႉဝၼ်းတီႈ 9/5/2022 ပဵၼ်ဝၼ်းဢၼ်ၸွမ်ၸိၵ်းသိုၵ်းမၢၼ်ႈပိုၼ်ၽၢဝ်ႇပဵၼ်ဝၼ်းၶိတ်ႇသဵၼ်ႈတၢႆ ဝၼ်းလိုၼ်းသုတ်းတႃႇသူင်ႇသဵၼ်ႈၸိုဝ်ႈ တူဝ်တႅၼ်းၸုမ်းယိပ်းၵွင်ႈၵၢင်ႇ ၸိူဝ်းတေၵႂႃႇႁူပ်ႉဢုပ်ႇၵုမ်လွင်ႈငမ်းယဵၼ်ၸွမ်းသိုၵ်းမၢၼ်ႈ။

သိုၵ်းမၢၼ်ႈယိုတ်းမိူင်းႁူပ်ႉထူပ်းၸုမ်းၸၢဝ်းၶိူဝ်းမိူဝ်ႈလိူၼ်ၾႅပ်ႉပိဝ်ႊရီႊ 2022


ၸွမ်ႁၢၼ်ၸေႃႇမိၼ်းထုၼ်း ၽူႈၶၢၼ်ပၢၵ်ႇသိုၵ်းမၢၼ်ႈယိုတ်းမိူင်း ပိုတ်ႇလၢတ်ႈတီႈ ၸုမ်းၶၢဝ်ဢ VOM ဝႃႈ ၼႂ်းၸုမ်းယိပ်းၵွင်ႈၵၢင်ႇ ဢၼ်လူင်းလၢႆမိုဝ်းၵိုတ်းတိုၵ်းယဝ်ႉၼၼ်ႉတေမႃးၶဝ်ႈႁူမ်ႈ 6 ၸုမ်း လႄႈၸုမ်းပႆႇလႆႈလူင်းလၢႆးမိုဝ်းၵိုတ်းတိုၵ်းၼၼ်ႉ တေမႃး 3 ၸုမ်း တင်းမူတ်း ဢၼ်ယိုၼ်ယၼ်ဝႃႈတေမႃးႁူပ်ႉ ၸွမ်ၸိၵ်းသိုၵ်းမၢၼ်ႈ မီး 9 ၸုမ်း ဝႃႈၼႆ။

“ၼႂ်းၸုမ်းလူင်းလၢႆးမိုဝ်းၵိုတ်းတိုၵ်းဝႆႉၼၼ်ႉ ဢၼ်တေမႃးႁူပ်ႉမီး 6 ၸုမ်း။ ပဵၼ်သိုၵ်းယၢင်း DKBA, KNU (KNLA/PC), ၸုမ်းမွၼ်း MNSP, သိုၵ်းတႆး RCSS, သိုၵ်းရၶႅင်ႇ ALP, ပဢူဝ်း PNLO ။ ဢၼ်ပႆႇလူင်းလၢႆးမိုဝ်းၵိုတ်းတိုၵ်းသမ်ႉ တေမႃး 3 ၸုမ်း။ ပဵၼ် ၸုမ်းဝႃႉ UWSA မိူင်းလႃး NDAA လႄႈ သိုၵ်းတႆး SSPP။ တေႁူပ်ႉၵၼ်တီႈၼေႇပျီႇတေႃႇ။ ဝၼ်းတႄႉပႆႇၸၢင်ႈလၢတ်ႈတေပဵၼ်ဝၼ်းလႂ် ” ၸေႃႇ မိၼ်းထုၼ်းလၢတ်ႈတီႈ ႁွင်ႈၵၢၼ်ၶၢဝ်ႇ Voice Of Myanmar မိူဝ်ႈၼႆႉဝၢႆးဝၼ်း ၼင်ႇၼႆ။

ၸွမ်ႁၢၼ်ၸေႃႇမိၼ်းထုၼ်းလၢတ်ႈထႅင်ႈဝႃႈ တေဢုပ်ႇၶိုၼ်းၵမ်းၸုမ်းၸုမ်းသေ ၸင်ႇၶိုၼ်းတေပိုၼ်ၽၢဝ်ႇဝႃႈတေႁူပ်ႉၵၼ်ဝၼ်းလႂ်။ တေပဵၼ်ၼႂ်းလိူၼ်မေႊၼႆႉၵူၺ်း ဝႃႈၼႆ။

ႁဝ်းၶႃႈတႄႉ တိုၼ်းႁပ်ႉပၢၵ်ႇဝႃႈ တေႁဵတ်းၸွမ်းပိူင်မိူင်းႁူမ်ႈတုမ် ဢၼ်မီးၾႅတ်ႊတရႄႊလႄႈ တီႊမူဝ်ႊၶရေႊသီႊ ပဵၼ်ပိုၼ်ႉထၢၼ်ၼၼ်ႉၵူၺ်း။ ၸုမ်းၸိူဝ်းပိုၼ်ၽၢဝ်ႇဝႃႈ ဢမ်ႇမႃးၶဝ်ႈႁူမ်ႈၼႆတႅၵ်ႇလႅင်းၵေႃႈမီး ။ လႆႈႁူႉၵၢင်ၸႂ်ဢၼ်ၶဝ်ဝႆႉၼိူဝ် ၵူၼ်းမိူင်း၊ ဢၼ်ၶဝ်ဝႆႉၼိူဝ်လွင်ႈငမ်းယဵၼ်ၼၼ်ႉၶႃႈၼႃႇ” ၸေႃႇမိၼ်းထုၼ်းလၢတ်ႈထႅင်ႈၼင်ႇၼႆ။

ဢၼ်ပိုၼ်ၽၢဝ်ႇပဵၼ်တၢင်းၵၢၼ်ဝႃႈ ပေႃးဢမ်ႇပႃးၵူႈမူႇၵူႈၸုမ်း ၸိူဝ်းထုၵ်ႇလႆႈၶဝ်ႈႁူမ်ႈပႃးၸွမ်းၼၼ်ႉ တိုၼ်းတေဢမ်ႇဢုပ်ႇလွင်ႈငမ်းယဵၼ်ၸွမ်းသိုၵ်းမၢၼ်ႈ ၼႆတႄႉပဵၼ် ၸုမ်းသိုၵ်းယၢင်း KNU ၶၢင် KIO လႄႈတပ်ႉသိုၵ်းလုၵ်ႈႁဵၼ်း ABSDF ။

ပၢင်ႁူပ်ႉထူပ်းလွင်ႈငမ်းယဵၼ်ၵမ်းၼႆႉ တူဝ်ၸွမ်ၸိၵ်းသိုၵ်းမၢၼ်ႈ တေၵေႃႉႁူပ်ႉထူပ်းဢုပ်ႇၵုမ်ၵမ်းသိုဝ်ႈ ဝႃႈၼႆဝႆႉ။


ဢိင်ၶေႃႈမုၼ်း- VOM

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ