ၵၢၼ်ႁႃၵိၼ်လဵင်ႉတွင်ႉယၢပ်ႇၽိုတ်ႇမႃးၵူႈဝၼ်းလႄႈ ၵူၼ်းပိုၼ်ႉတီႈ တႃႈၶီႈလဵၵ်း – မႄႈသၢႆ ဢွၼ်ၵၼ် မွင်း ပိုတ်ႇၶူဝ်မိုတ်ႈၵိုဝ်းမၢႆ 1 လႅၼ်လိၼ်တႆး – ထႆး   ။  

လူင်ပွင်ၸိုင်ႈထႆးပိုၼ်ၽၢဝ်ႇဝႃႈ တႄႇဢဝ် ဝၼ်းတီႈ 1/5/2022 ၼႆႉ ၵႂႃႇပိုတ်ႇၽၵ်းတူမိူင်းၶိုၼ်းတင်းမူတ်း ပႃးၸဵမ်တၢင်းၼမ်ႉ၊ တၢင်းလူမ်း ၊ တၢင်းလိၼ်။   ၵူၺ်းၵႃႈ ၽၵ်းတူ လႅၼ်လိၼ်သမ်ႉ ပိုတ်ႇပၼ်တၢင်းမိူင်းၵမ်ႇပူးၶျႃး (ၵမ်ႇပေႃးတီး ယႃး)လႄႈ မိူင်းလၢဝ်း  ၵူၺ်း၊ ဢၼ်တိတ်းၸပ်းမိူင်းတႆး – မိူင်းမၢၼ်ႈတႄႉ ပႆႇပိုတ်ႇၶိုၼ်းသေတီႈလႄႈ ၵူၼ်းမိူင်းမွင်းတႃႇလႆႈၵႃႉၶၢႆႁဵတ်းၵၢၼ်ႁႃၵိၼ်လဵင်ႉတွင်ႉ။

ၵူၼ်းၼုမ်ႇတႃႇၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ – “ႁဝ်းၶႃႈ မွင်းပိုတ်ႇၶူဝ်ၼႃႇယဝ်ႉ။ မၼ်းယၢပ်ႇၽိုတ်ႇၸိူင်ႉႁိုဝ်ၼႆ ႁဝ်းၶႂ်ႈသိုဝ်ႉသင်၊ ၶႂ်ႈလႆႈ သင်ၼႆ တၢမ်တူဝ်ႁဝ်းၵႂႃႇသိုဝ်ႉ ၵႂႃႇလိူၵ်ႇဢဝ် ဢမ်ႇလႆႈ။ လႆႈပၼ်ၵူၼ်းတၢင်းပုၼ်ႉသိုဝ်ႉပၼ်သေ သူင်ႇမႃး  ။ သဵင်ႈငိုၼ်းၼမ်လိူဝ်ၵဝ်ႇ၊ ၵႃႈပိူၼ်ႈႁဵတ်းပၼ်ၵၢၼ်ႁဝ်း၊   ၵႃႈၶၢမ်ႈၶူဝ် ၸိူဝ်းၼႆႉ လႆႈပၼ်။ တႃႇတေမႃးထိုင်ၼႂ်းမိုဝ်းႁဝ်းၼႆႉ ပဵၼ်ဝႆႉလၢႆတေႃႇ သုၵ်ႉသၵ်ႉလိူဝ်ၵဝ်ႇ ။ မၼ်းဢမ်ႇငၢႆႈမိူၼ်တူဝ်ၵႂႃႇသိုဝ်ႉၵူၺ်းၶႃႈ”- ဝႃႈၼႆ။

ၸိူဝ်းပဵၼ် ၵူၼ်းပဵၼ်ၵူၼ်းထဝ်ႈ တၢင်းၾင်ႇတႃႈၶီႈလဵၵ်း ၵေႃႈ ၸူဝ်ႈပိၵ်ႉ ၶူဝ်ၼႆႉမႃး ဢမ်ႇၸၢင်ႈၵႂႃႇယူတ်းယႃတူဝ်တၢင်းၾင်ႇမိူင်းထႆး။ ဢမ်ယၢမ်ႈႁပ်ႉလွင်ႈယူတ်းယႃတၢင်းမိူင်းထႆးၵွၼ်ႇပႆႇပိၵ်ႉၶူဝ်ၸိူဝ်းၼၼ်ႉၵေႃႈ ဢမ်ႇၸၢင်ႈသိုပ်ႇယႃတူဝ်ထႅင်ႈလႄႈ လူႉတၢႆပႅတ်ႈၵေႃႈမီးတင်းၼမ် ။

ၵူၼ်း တႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်မေႃၼတ်ႉၵႂႃႇတူတ်ႇ၊ ၵႂႃႇဢဝ်ယႃမႃးၵိၼ်ၼၼ်ႉၵေႃႈ ႁိူဝ်ႇ- ဢမ်ႇၸၢင်ႈၵႂႃႇယဝ်ႉလႃႇ။ မၢင်ၵေႃႉ သင်ႇၵူၼ်းတၢင်းမႄႈသၢႆ ၵႂႃႇႁပ်ႉယႃ သိုဝ်ႉယႃ သူင်ႇမႃးပၼ်ယူႇသေတႃႉ  တူဝ်ၵူၼ်းပဵၼ်ဢမ်ႇၸၢင်ႈၵႂႃႇပၼ်မေႃၵူတ်ႇထတ်းပၢႆးယူႇလီ။ ၵွပ်ႈၼႆ တၢင်းပဵၼ်ၶႅၼ်းၵႂႃႇႁႃႉ ၼႃႇမႃးႁႃႉၼႆဢမ်ႇၸၢင်ႈႁူႉ  ”- ဝႃႈၼႆ။  

ဢၼ်တုမ်ႉတိူဝ်ႉႁႅင်းတႄႉပဵၼ်ပၢႆးပၺ်ႇၺႃႇလုၵ်ႈဢွၼ်ႇ ၸိူဝ်းယူႇတၢင်းၾင်ႇတႃႈၶီႈလဵၵ်းသေ ၵႂႃႇၶိုၼ်ႈႁူင်းႁဵၼ်းတၢင်းၾင်ႇမႄႈသၢႆ။  ၸူဝ်ႈပိၵ်ႉၶူဝ်ၼႆႉ လႆႈၵိုတ်းလိုဝ်ႈၵၢၼ်ႁဵၼ်းဝႆႉ 2 ပီယဝ်ႉ။

ၼၢင်းယိင်း ဢႃယု 30 ပၢႆ ၵေႃႉၼိုင်ႈ တႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ – “လုၵ်ႈဢွၼ်ႇၼႆႉ ၶၢတ်ႇၵၢၼ်ႁဵၼ်းၼမ်ၼႃႇၶႃႈ။ လုၵ်ႈဢွၼ်ႇ ၸိူဝ်းယူႇတၢင်းၾင်ႇၼႆႉသေ ၵႂႃႇၶိုၼ်ႈႁဵၼ်း တၢင်းၾင်ႇ မိူင်းထႆးမီးၼမ်ၼႃႇၶႃႈ။  ပႃးတင်းလၢၼ်ၶႃႈၵေႃႉၼိုင်ႈ”- ဝႃႈၼႆ။

ၽၵ်းတူလႅၼ်လိၼ်တၢင်ႇတီႈပိုတ်ႇယဝ်ႉသေတႃႉ ၽၵ်းတူလႅၼ်လိၼ်ဢၼ်တိတ်းၸပ်းတၢင်းမိူင်းမၢၼ်ႈပႆႇပိုတ်ႇၶိုၼ်းၼႆႉ လႅပ်ႈသိုၵ်းမၢၼ်ႈတေလၵ်ႉၵူဝ် ၵၢၼ်လၵ်ႉတေႃႉၶိူင်ႈၵွင်ႈၵၢင်ႇၶဝ်ႈၵေႃႈပဵၼ်လႆႈ။ ၾၢႆႇၼိုင်ႈ ၽၵ်းတူလႅၼ်လိၼ်ဢမ်ႇပိုတ်ႇသေတႃႉ တၢင်းၾင်ႇတႃႈၶီႈလဵၵ်းၼႆႉၵူၼ်းၵိုၼ်းၶွၼ်ႈလိူဝ်ႁႅင်း၊ ယွၼ်ႉပိူဝ်ႈၶႄႇမႃးလၵ်ႉယူႇသဝ်းသေ ပိုတ်ႇပၢင်တေႃႇလွင်းဝႆႉ ၵူၼ်းတႃႈၶီႈလဵၵ်းၵေႃႉၼိုင်ႈထတ်းသၢင်ၼႄၼင်ႇၼႆ။

“ၽႂ်ၽႂ်ၵေႃႈ မုင်ႈမွင်းၶႂ်ႈပိုတ်ႇၼႃႇၶႃႈယဝ်ႉ ၸဵမ်ၵူၼ်းတၢင်းမႄႈသၢႆ – တႃႈၶီႈလဵၵ်း ယူႇတီႈႁဝ်းၶႃႈ လၢမ်းၶၢတ်ႈတႄႉ ယူႇတီႈသိုၵ်းမၢၼ်ႈၼႆႉ ၶဝ်တေ ပႆႇၶႂ်ႈပိုတ်ႇ ၶဝ်ၵူဝ်ပိူၼ်ႈတေႃႉၶိူင်ႈၵွင်ႈၵၢင်ႇလၢၵ်ႈၼၢၵ်ႈၶၢမ်ႈမႃး တၢင်းၼႆႉ ၸိူင်ႉၼႆၵေႃႈ ပဵၼ်လႆႈ”- ၵူၼ်းတႃႈၶီႈလဵၵ်းလၢတ်ႈ။

မိူဝ်ႈဝၼ်းတီႈ 25/4/2022 ၾၢႆႇလိူမ်ႈလႆႇ မိူင်းထႆး မီးလွင်ႈလၢင်ႉၽဵဝ်ႈႁဵတ်းလွင်ႈမူတ်းသႂ်တီႈႁူဝ်ၶူဝ်လႄႈ ၵူၼ်းမိူင်းမႄႈသၢႆ – တႃႈၶီႈလဵၵ်း ဢွၼ် ၵၼ်ထၢင်ႇဝႃႈ တေပိုတ်ႇၶူဝ်ယဝ်ႉၼႆသေ လၵ်ႉလွမ်ၸူမ်းသိူဝ်းၵၼ်ဝႆႉ တင်းၼမ်။

ၶူဝ်မိုတ်ႈၵိုဝ်းလႅၼ်လိၼ် မႄႈသၢႆ – တႃႈၶီႈလဵၵ်းၼႆႉ ဢိင်ၼိူဝ်တၢင်းပဵၼ်ၶူဝ်ႊဝိတ်ႉ ၽႄႈလၢမ်းႁႅင်းမႃးသေ ၾၢႆႇထႆး တႄႇပိၵ်ႉမႃးၸဵမ်မိူဝ်ႈ ဝၼ်းတီႈ 23/3/2020 တေႃႇထိုင်ယၢမ်းလဵဝ် ပႆႇပိုတ်ႇ မီးၶၢဝ်းတၢင်း 2 ပီပၢႆယဝ်ႉ။

လႅၼ်လိၼ်ထႆး – မၢၼ်ႈ တိတ်းၸပ်းၵၼ်ၼႆႉ မီး 2,500 ၵီႇလူဝ်ႇမီႇတႃႇပၢႆ။ ၽၵ်းတူ ၶဝ်ႈဢွၵ်ႇလႅၼ်လိၼ် ဢၼ်ပဵၼ်တၢင်းၵၢၼ်သမ်ႉ မီး 10 ပၢႆ။