လုၵ်ႈၸၢႆးယွင်ႇမႃႈ ယွၼ်ႉယႃႈမဝ်းၵမ် လမ်းၾၼ်းပေႃႈတင်းမႄႈ – ပေႃႈတၢႆထင်တီႈ

လုၵ်ႈၸၢႆး ယွင်ႇမႃႈယိပ်းၽႃႉမိတ်ႈလမ်းၾၼ်း ပေႃႈမႄႈၸဝ်ႈၵဝ်ႇၶိုၼ်း တီႈၸႄႈဝဵင်းသီႇသႅင်ႇ ၸိုင်ႈတႆးပွတ်းၸၢၼ်း ၵေႃႉပဵၼ်ပေႃႈလႆႈလူႉတၢႆထင်တီႈ ဝႃႈၼႆ။

ဝၼ်းတီႈ 12/03/2018 ယၢမ်းၵၢင်ၶမ်ႈ မွၵ်ႈ 8 မူင်း ၸၢႆးထုၼ်းလိၼ်း(ႁွင်ႉ) ၵူဝ်ႇလိၼ်း ယူႇပွၵ်ႉသီႇရိ ၸႄႈဝဵင်းသီႇသႅင်ႇ ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း လမ်းၾၼ်းပေႃႈတင်းမႄႈ ၵေႃႉပဵၼ်ပေႃႈ လူႉတၢႆထင်တီႈ။ ၵေႃႉပဵၼ်မႄႈ မၢတ်ႇၸဵပ်းႁၢဝ်ႈႁႅင်း ၵူၺ်းၵႃႈ ဢမ်ႇထိုင်တၢႆ လႆႈႁၢမ်သူင်ႇႁူင်းယႃလူင် ၸဝ်ႈၸၢမ်ႇထုၼ်း ဝဵင်းတူၼ်ႈ တီးၵႂႃႇ ဝႃႈၼႆ။

ၵူၼ်းပိုၼ်ႉတီႈ ၸႄႈဝဵင်းသီႇသႅင်ႇ ၵေႃႉၼိုင်ႈ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ မၼ်းၸၢႆးၼႆႉ တိုၵ်ႉလုၵ်ႉ တီႈႁူင်းယႃပၢႆးၸႂ် တီႈတႃႈၵုင်ႈမႃး တၼ်းလႆႈ သၢမ်ဝၼ်းၵူၺ်း။ ယွၼ်ႉဝႃႈ မိူဝ်ႈၵူႈပွၵ်ႈ မၼ်းၸၢႆး ယွင်ႇမဝ်းယႃႈ လႄႈလႆႈသူင်ႇယူတ်းယႃတူဝ်တီႈႁူင်းယႃပၢႆးၸႂ်တႃႈၵုင်ႈ။ ဝၢႆးမၼ်းၸၢႆးပွၵ်ႈမႃးယူႇၶိုၼ်းႁိူၼ်းၼၼ်ႉ မၼ်းၸၢႆး တင်း ပေႃႈမၼ်း ၵႆႉၵႆႉၽိတ်းမေႃးထဵင်ၵၼ်ယူႇ” ဝႃႈၼႆ။

ယၢမ်းလဵဝ် ပလိၵ်ႈမၢၼ်ႈ ၵုမ်းၶင်တူဝ် ၸၢႆးထုၼ်းလိၼ်းဝႆႉသေ ပိုတ်ႇဢမူႉ(ၶၻီႊ) ၶႃႈႁႅမ်ၵူၼ်းတၢႆ ဝႆႉတီႈႁူင်းပလိၵ်ႈ ၸႄႈဝဵင်းသီႇသႅင်ႇ ဝႆႉယဝ်ႉ ဝႃႈၼႆ။

ၾၢႆႇပၵ်းတႃယႃႈမဝ်းၵမ်ၸိုင်ႈတႆး ၵေႃႈပိုၼ်ၽၢဝ်ႇဝႃႈ – ယႃႈမႃႉယႃႈမဝ်းၵမ်ၼႂ်းၸိုင်ႈတႆး လိူင်ႇၼမ်။ လုၵ်ႈဢွၼ်ႇ ဢႃယု 12 ၶူပ်ႇ ယင်းၵိၼ် ဝႃႈၼႆ။