ၵူၼ်းၵျွၵ်ႉမႄး 3 ၵေႃႉပေႃႈမႄႈလုၵ်ႈ ၵႂႃႇပိတ်းၼဵင်ႈသေ ပွၵ်ႈၶိုၼ်းႁိူၼ်း ၊ ၺႃးၸၢၵ်ႇၾႃႉၽႃႇ ပိၼ်ႈလူမ်ႉလိုမ်းတူဝ်ၵႂႃႇ တင်းသၢမ် ၵေႃႉ၊ လုၵ်ႈ ၸၢႆး လိုမ်းတူဝ်ၵႂႃႇ ၶိုၼ်းၼိုင်ႈ ။
ဝၼ်းတီႈ 2/5/2022 ယၢမ်းဝၢႆးဝၼ်း 2 မူင်း ၵူၼ်းဝၢၼ်ႈၸၢင်ႉႁိူၼ်း 3 ၵေႃႉ ပေႃႈမႄႈလုၵ်ႈ ၵႂႃႇပိတ်းၼဵင်ႈ ၼႂ်းသူၼ်သေ ပွၵ်ႈႁိူၼ်း ၺႃးသၢႆၾႃႉ ၽႃႇသိတ်ႈသႂ်ႇသေလူမ်ႉလိုမ်းတူဝ်ၵႂႃႇ တီႈၵၢင်ပၢင်ႇၸွမ်းတၢင်း ၼႂ်းၵႄႈသူၼ်ၼဵင်ႈတင်း ဝၢၼ်ႈၸၢင်ႉႁိူၼ်း တၢင်းၾၢႆႇႁွင်ႈဝၢၼ်ႈ ၼႂ်းဢိူင်ႇတေႃႉသၢင်ႇ ၸႄႈဝဵင်းၵျွၵ်ႉမႄး ၸိုင်ႈ တႆး ပွတ်းႁွင်ႇ သူၼ်ၼဵင်ႈၼၼ်ႉသမ်ႉ တေယၢၼ်ၵႆဝၢၼ်ႈ မွၵ်ႈ 1 လၵ်း ၼႆယဝ်ႉ။
ၵေႃႉပဵၼ်ပေႃႈလုင်း လုၵ်ႈဢွၼ်ႇၸၢႆး ၺႃးသၢႆၾႃႉၽႃႇၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ-“ ပဵၼ်မိူဝ်ႈသိုၼ်း ဝၢႆးဝၼ်း 2 မူင်း ၼႆႉဢေႃႈ။ ၶဝ် 3 ၵေႃႉ ပေႃႈမႄႈလုၵ်ႈၵႂႃႇပိတ်းၼဵင်ႈသေပွၵ်ႈၶိုၼ်း၊ ၾႃႉၽႃႇႁိမ်းၶဝ်ၶႃႈဢိူဝ်ႈ၊ ဝူင်းၸၢၵ်ႇမၼ်းသမ်ႉသိတ်ႈသႂ်ႇၶဝ်လႄႈ ပႃးၵၼ်လိုမ်းတူဝ်ၵႂႃႇဢိူဝ်ႈ။ ပေႃႈလႄႈမႄႈတႄႉ ႁူႉတူဝ်ၶိုၼ်းသေ ၼႅတ်ႈဢုမ်ႈဢဝ်လုၵ်ႈၶဝ် ပွၵ်ႈႁိူၼ်း။ လုၵ်ႈဢွၼ်ႇၼႆႉ ယူႇၶမ်ႈၼိုင်ႈၵေႃႈ ဢမ်ႇႁူႉတူဝ် ထိုင်မႃး မိူဝ်ႈဝႃး ဝၼ်းတီႈ 3 ၸင်ႇၵပ်းၸူးယွၼ်းတၢင်းၸွႆႈထႅမ် ၸုမ်းၼမ်ႉၶူင်းပရႁိတ မႃးႁပ်ႉဢဝ်ၵႂႃႇသူင်ႇႁူင်းယႃၶႃႈဢေႃႈ”- ဝႃႈၼႆ။
လုၵ်ႈဢွၼ်ႇဢၼ်လိုမ်းတူဝ်ၵႂႃႇၶိုၼ်းၼိုင်ႈၼၼ်ႉမီးဢႃယုမွၵ်ႈ 14 ပီ။ ၸုမ်းၼမ်ႉၶူင်းပရႁိတ ဢဝ်တူဝ်သူင်ႇႁူင်းယႃ လႆႈႁပ်ႉလွင်ႈယူတ်းယႃယဝ်ႉၸင်ႇႁူႉတူဝ်ၶိုၼ်း ဝႃႈၼႆ။
“ၽိူဝ်ႇဝႃႈ ႁွတ်ႈၽႅဝ် ႁူင်းယႃယဝ်ႉ မေႃယႃၶဝ် ၵူတ်ႇထတ်းၸႅတ်ႈတူၺ်း ပၼ်ၵိၼ်ယႃႈယႃသေ ၸင်ႇတေႁူႉတူဝ်မႃးၶိုၼ်း။ ၵူၺ်းၵႃႈ ႁူႉတူဝ်မႃး ယဝ်ႉၵေႃႈ မၢၵ်ႇတႃမၼ်းၸၢႆး ပႆႇမိုၼ်းလႆႈလီလီ။ လၢတ်ႈၵႂၢမ်းၵေႃႈ တိုၵ်ႉၵႂင်ၵႃး ပႆႇႁူႉတီႈပွင်ႇတီႈပဵၼ် လၢတ်ႈသၢႆႉပွင်ႇၶႂႃ လၢတ်ႈႁွင်ႇပွင်ႇၸၢၼ်း ပဵၼ်ဝႆႉၸိူင်ႉၼႆၶႃႈဢေႃႈ”- ၵေႃႉပဵၼ်လုင်း သိုပ်ႇလၢတ်ႈၼႄၼင်ႇၼႆ။
3 ၵေႃႉ ပေႃႈမႄႈလုၵ်ႈ ဢၼ်ၺႃးသၢႆၾႃႉၽႃႇသႂ်ႇၼၼ်ႉ ၵေႃႉပဵၼ်ပေႃႈ ၸိုဝ်ႈႁွင်ႉ ၸၢႆးထုၼ်းၸူဝ်ႇ မႄႈသမ်ႉ ၼၢင်းဢူင်းမိၼ်ႉ လုၵ်ႈၸၢႆး ၸၢႆး ထုၼ်းၸေႃႇ ဢႃယု 14 ပီ ပဵၼ်ၵူၼ်းဝၢၼ်ႈၸၢင်ႉႁိူၼ်း။ ယၢမ်းလဵဝ် ၵေႃႉပဵၼ်လုၵ်ႈၸၢႆးတႄႉ တိုၵ်ႉယူတ်းယႃတူဝ်ဝႆႉ တီႈႁူင်းယႃလူင်ၵျွၵ်ႉမႄးဝႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ