ပၢင်သွၼ်လိၵ်ႈတႆး ၶၢဝ်းမႆႈ တီႈဝဵင်းမိူင်းၼၢႆး ပီၼႆႉ ၸတ်းႁဵတ်းၵူႈဝၢၼ်ႈဢိူင်ႇ လုၵ်ႈဢွၼ်ႇၶဝ်ႈႁူမ်ႈၶိုၼ်ႈႁဵၼ်း တင်းမူတ်းမီး 1,800 ပၢႆ တိူဝ်း ၼမ်လိူဝ်မႃးၵူႈပီ ဝႃႈၼႆ။
တႄႇဢဝ်ႁၢင်လိူၼ်မၢတ်ႊၶျ်ၼၼ်ႉမႃး တေႃႇထိုင်ႁၢင်လိူၼ်မေႊ 2022 တေထိုင်ၼႆႉ ယူႇတီႈသင်ၶၸဝ်ႈ ႁူင်းႁဵၼ်းထမ်ႇမ ဢွၼ်ႁူဝ်ၼမ်းၼႃႈ ႁူမ်ႈပႃး ၵေႃလိၵ်ႈလၢႆးလႄႈၾိင်ႈငႄႈတႆး ၸႄႈဝဵင်းမိူင်းၼၢႆး ႁူမ်ႈၵၼ် ပိုတ်ႇပၢင်သွၼ်လိၵ်ႈတႆး ၶၢဝ်းမႆႈမႃး ၼႂ်းၸႄႈဝဵင်းမိူင်းၼၢႆး ၸႄႈ တွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း တင်းမူတ်း မီး 21 ပၢင် ၼႆယဝ်ႉ။
ၸဝ်ႈၶူး သုၼ်တရ ဝတ်ႉ/ၵျွင်းလွႆသႅင် ၽူႈမၢႆၵူႈလွင်ႈလွင်ႈႁူင်းႁဵၼ်းထမ်ႇမ ၼႂ်းၸႄႈဝဵင်းမိူင်းၼၢႆး လၢတ်ႈတီႈ ၽူႈတွႆႇႁွၵ်ႈဝႃႈ – “ပီၼႆႉ လုၵ်ႈႁဵၼ်းႁဝ်း ၶႃႈ မီး 1,803 လႆႈဝႃႈ ဢဵၼ်ႁႅင်းလုၵ်ႈႁဵၼ်းပီၼႆႉ ၼမ်လိူဝ်ၵူႈပီ ။ မိူဝ်ႈပီ 2021 ၼၼ်ႉ မီး 1,100 ၼႆႉၵူၺ်း။ ပီၼႆႉ ၼႂ်းဝဵင်းပိုတ်ႇတင်း 4 ပွၵ်ႉ လုၵ်ႈႁဵၼ်း မီးၸမ် 700 ယဝ်ႉ။ မိူဝ်ႈသွင်ပီ ပူၼ်ႉမႃးၼႆႉ လႆႈပိုတ်ႇပူင်သွၼ်ပၼ် ၸွမ်းဝၢၼ်ႈၼွၵ်ႈၼႃးပၢင်ႇၵူၺ်း ယွၼ်ႉၼႂ်းဝဵင်းသမ်ႉ မီးလွင်ႈ ႁၢမ်ႈတၢပ်ႈၼမ်လႄႈ ဢမ်ႇလႆႈပိုတ်ႇသွၼ်မႃး”- ဝႃႈၼႆ။
မိူဝ်ႈပီ 2020 – 2021 ၶၢဝ်းတၢင်း 2 ပီမႃးၼႆႉ ၼႂ်းဝဵင်းမိူင်းၼၢႆး ဢမ်ႇလႆႈပိုတ်ႇပၢင်သွၼ်လိၵ်ႈတႆး ၶၢဝ်းမႆႈမႃး ယွၼ်ႉငဝ်းလၢႆးတၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းႁႅင်းၵေႃႈပိူင်ၼိုင်ႈ၊ လွင်ႈၵၢၼ်မိူင်းသုၵ်ႉယုင်ႈ ၵေႃႈပႃး။ မိူဝ်ႈပီ 2021 တင်းမူတ်း ပၢင်သွၼ်မီး 16 တီႈ ။
ပီၼႆႉ ပၢင်သွၼ်လိၵ်ႈတႆး ၶၢဝ်းမႆႈ တီႈၸႄႈဝဵင်းမိူင်းၼၢႆး တင်းမူတ်းမီး 21 ပၢင်၊ လုၵ်ႈႁဵၼ်းမီး 1,803 ၵေႃႉ၊ ၸဝ်ႈၶူးသွၼ် မေႃသွၼ်ၸၢႆးယိင်း မီး 108 ၵေႃႉ။ ၸၼ်ႉလိၵ်ႈသမ်ႉ တႄႇဢဝ် ၸၼ်ႉငဝ်ႈ – ၸၼ်ႉႁႃႈ။ ပၢင်သွၼ်လိၵ်ႈတႆး ၶၢဝ်းမႆႈ ၸႄႈဝဵင်းမိူင်းၼၢႆးၼႆႉ ၸတ်းႁဵတ်းမႃးၵူႈပီ ၼႆ ယဝ်ႉ။
