ဢွၼ်ႇယိင်းၼုမ်ႇ ဢႃယုမွၵ်ႈ 20 ပီ ၵေႃႉၼိုင်ႈ ၵူၼ်းမူႇၸေႊ ၺႃးပလိၵ်ႈမၢၼ်ႈၾၢႆႇၸွပ်ႇၶၢဝ်ႇ သယၽ မႃးတီႉၺွပ်း/ ဢဝ်ၵႂႃႇၸႅတ်ႈထၢမ် တီႈႁူင်းပလိၵ်ႈ ၼႄးဝႃႈမၼ်းၼၢင်းတၢင်ႇ Post တီႈၽဵတ်ႉပုၵ်ႉသုၼ်ႇတူဝ်မၼ်းၼၢင်း ၵဵဝ်ႇလူၺ်ႈ လွင်ႈသၢၼ်ၶတ်းသိုၵ်းမၢၼ်ႈ ဝႃႈၼႆ။
မိူဝ်ႈဝႃး ဝၼ်းတီႈ 2/5/2022 ယၢမ်းဝၢႆးဝၼ်း 4 မူင်းၶိုင်ႈ ၵႃးသယၽ 3 လမ်း မႃးထိုင်တီႈႁိူၼ်းမၼ်းၼၢင်း တီႈပွၵ်ႉၸၢၼ်းမူႇၸေႊသေ တီႉၺွပ်း/ ႁွင်ႉဢဝ်တူဝ် မၼ်းၼၢင်းၵႂႃႇႁူင်းပလိၵ်ႈ ။
ပီႈၼွင်ႉၸမ်ၸႂ် ၼၢင်းယိင်းဢွၼ်ႇၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ – “သယၽ ၸိူဝ်းၼၼ်ႉ ၶဝ်ႈမႃးၽႅဝ်ၼႂ်းႁိူၼ်းသေ ဢဝ် Post ၼၼ်ႉမႃးၼႄယဝ်ႉ ႁွင်ႉဢဝ်မၼ်းၵႂႃႇ ။ ၼွင်ႉၸၢႆးမၼ်းသမ်ႉမႆႈၸႂ်သေၸွမ်းၵႂႃႇ။ ၽိူဝ်ႇထိုင်တီႈႁူင်းပလိၵ်ႈယဝ်ႉ ပလိၵ်ႈၸႂ်ႉၼွင်ႉၸၢႆးမၼ်းပွၵ်ႈၶိုၼ်းႁိူၼ်း။ ”- ဝႃႈၼႆ။
Post ဢၼ်ပလိၵ်ႈၶဝ်ဢဝ်မႃးၼႄသေပၼ်ၶေႃႈဢၢင်ႈသေတီႉမၼ်းၵႂႃႇၼၼ်ႉ ပဵၼ် Post သၢၼ်ၶတ်းသိုၵ်းမၢၼ်ႈယိုတ်းဢႃႇၼႃႇ ဢၼ်တၢင်ႇဝႆႉပီၵၢႆ၊ ပီၼႆႉ မၼ်းၶိုၼ်းၽုတ်းမႃးၶွပ်ႈတဵမ်ပီၵူၺ်း ။ ဢမ်ႇၸႂ်ႈဢၼ်မၼ်းၼၢင်းတၢင်ႇဢၼ်မႂ်ႇမႂ်ႇ ဝႃႈၼႆ။
“မၼ်းဝႃႈ ထၢင်ႇတႄႉ ပလိၵ်ႈမၢၼ်ႈၵူၼ်းၽိတ်းၵူၺ်း။ ၶဝ်ၵူတ်ႇထတ်းၼႂ်းၾူၼ်းမၼ်း ဢမ်ႇႁၼ်ၶေႃႈမုလ်း ဢၼ်ၽိတ်းပၵ်းပိူင်သင်။ ယွၼ်ႉၼၼ် ၶဝ်တေပွႆႇတူဝ်ၶိုၼ်းမိူဝ်ႈဝႃး။ ယွၼ်ႉၶမ်ႈယဝ်ႉလႄႈ ၶဝ်ၸႂ်ႉမၼ်း ၼွၼ်းတီႈၶွၵ်ႈ ၼၼ်ႉ ၶိုၼ်းၼိုင်ႈသေ မိူဝ်ႈၼႆႉမၼ်းၸင်ႇၶိုၼ်းထိုင်မႃးႁိူၼ်းဢေႃႈ”- ပီႈၼွင်ႉၸမ်ၸႂ် သိုပ်ႇလၢတ်ႈၼင်ႇၼႆ။
ဢွၼ်ႇယိင်းၼုမ်ႇ ဢၼ်ထုၵ်ႇတီႉၺွပ်း/ ႁွင်ႉၵႂႃႇ ၸႅတ်ႈထၢမ်ၼၼ်ႉ ၸိုဝ်ႈႁွင်ႉ ၼၢင်းၶမ်းၶွင်ႇ ဢႃယုမွၵ်ႈ 20 ပီ ပဵၼ်ၵူၼ်းပွၵ်ႉ ၸၢၼ်း ၸႄႈဝဵင်းမူႇၸေႊ လႆႈထုၵ်ႇပွႆႇတူဝ် ဢွၵ်ႇမႃးၶိုၼ်း မိူဝ်ႈၼႆႉ ဝၼ်းတီႈ 3/5/2022 ယၢမ်းဝၢႆးဝၼ်း 1 မူင်း ။
ဝၢႆးသိုၵ်းမၢၼ်ႈ ယိုတ်းမိူင်းမႃး ၶၢဝ်းတၢင်းပီပၢႆၼႆႉ ၶဝ်ၶဝ်ႈၵူတ်ႇထတ်းတီႉၺွပ်းၵူၼ်းမိူင်း/ ၵူၼ်းၼုမ်ႇ ၸိူဝ်းသၢၼ်ၶတ်းၶဝ်မႃး ။ ပိူင်လူင်ၶဝ်ၵႆႉၶဝ်ႈဢဝ် ယၢမ်းၵၢင်ၶမ်ႈၵၢင်ၶိုၼ်းလိုၵ်း ထိုင်ၼႂ်းႁိူၼ်းၼႂ်းယေး။
