မိူဝ်ႈၼႆႉ ဝၼ်းတီႈ 2/5/2022 ယၢမ်းၵၢင်ၼႂ် ၽူႈလၵ်ႉၶဝ်ႈႁိူၼ်းၵူၼ်းဝၢၼ်ႈပွၵ်ႉတေႃႇယွတ်ႈ ဝဵင်းမူႇၸေႊ လၵ်ႉဢဝ်ရူတ်ႉၶိူင်ႈ ၸဝ်ႈႁိူၼ်းၵႂႃႇ 3 လမ်း ။
ၵူၼ်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်ႁိူၼ်းၸၢႆးယုၼ်ႉ ပွၵ်ႉတေႃႇယွတ်ႈ။ မိူဝ်ႈၼႆႉ ၵၢင်ၼႂ်လုၵ်ႉမႃး ၽၵ်းတူ တီႈသိုင်ႇ ဝႆႉၵႃးၶဝ်ၼၼ်ႉ ၽုၺ်ႇဝႆႉ။ ရူတ်ႉၶိူင်ႈၶဝ် 3 လမ်း ႁၢႆ ။ မႃးလၵ်ႉၵႂႃႇၶၢဝ်းလႂ်တႄႉ ဢမ်ႇႁူႉ။ ရူတ်ႉၶိူင်ႈ တႃႇလမ်းၼိုင်ႈ တိုၵ်ႉသိုဝ်ႉမႃးမႂ်ႇၵူၺ်းၶႃႈ”- ဝႃႈၼႆ။
ရူတ်ႉၶိူင်ႈ 3 လမ်း ဢၼ် ႁၢႆၵႂႃႇၼၼ်ႉ ပဵၼ်ရူတ်ႉၶိူင်ႈ မိူင်းထႆး ၊ ဢၼ်ႁဵတ်းဝႂ်ၶွၼ်ႇ (လၢႆႊသဵၼ်ႊ) ယဝ်ႉတင်းမူတ်း ဝႃႈၼႆ။
“ရူတ်ႉၶိူင်ႈဢၼ်ႁၢႆၵႂႃႇၼၼ်ႉ တေပဵၼ်ရူတ်ႉၶိူင်ႈ Click, Scoopy i လႄႈ ထႅင်ႈလမ်းၼိုင်ႈတႄႉ ဢမ်ႇတွင်းၸိုဝ်ႈမၼ်းၶႃႈ။ ပဵၼ်ရူတ်ႉၶိူင်ႈဢၼ် ဢွၵ်ႇမႃးတၢင်းမိူင်းထႆးမူတ်း ယဝ်ႉၵေႃႈ မီးဝႂ်မူတ်းၶႃႈ။ ပေႃးပဵၼ်ရူတ်ႉထႆး မီးဝႂ်ၸိူင်ႉၼႆ ၼိုင်ႈလမ်းၼႆႉ ၵႃႈၶၼ်မၼ်း ဢမ်ႇတႅမ်ႇလိူဝ် 30 သႅၼ်။ ပေႃးဢွၵ်ႇမႂ်ႇ ပီ 2021 – 2022 ၸိုင် ၼိုင်ႈလမ်း 40 သႅၼ်ပၢႆ။ တင်ႈတႄႇ သိုၵ်းမၢၼ်ႈ ယိုတ်းမိူင်းမႃးၼႆႉ ၽူႈလၵ်ႉ ၵူၼ်းၸူၼ်ၼမ်လိူင်ႇတႄႉ တႄႉ တီႈမူႇၸေႊၼႆႉ ရူတ်ႉၶိူင်ႈၵူၼ်းမိူင်းၼႆႉ ၶႂ်ႈဝႃႈ ႁၢႆၵူႈဝၼ်းၶႃႈ ”- ၵူၼ်းမူႇၸေႊ သိုပ်ႇလၢတ်ႈၼင်ႇၼႆ။
ၸႄႈဝဵင်းမူႇၸေႊၼႆႉ ပဵၼ်ဝဵင်းဢၼ်တိတ်းၸပ်းလႅၼ်လိၼ်တႆး – ၶႄႇ ။ ဝၢႆးသိုၵ်းမၢၼ်ႈ ယိုတ်းမိူင်းမႃးၼႆႉ ၽူႈလၵ်ႉ ၵူၼ်းၸူၼ် ၼမ်လိူင်ႇမႃး ။ မိူဝ်ႈပူၼ်ႉမႃး ဝၼ်းတီႈ 11/4/2022 ၼၼ်ႉၵေႃႈ ၽူႈၸၢႆးသွင်ၵေႃႉ ပႃးၵွင်ႈပႃးလႅဝ်းသေ ၶဝ်ႈၸူၼ် ႁိူၼ်းယေး ၵူၼ်းဝၢၼ်ႈ တီႈပွၵ်ႉၸၢၼ်း ဝဵင်းမူႇၸေႊ ၸူၼ်လႆႈၵႂႃႇ ငိုၼ်းသွင်တိူၵ်ႈ။