လုၵ်ႈဢွၼ်ႇ လႅၼ်ၶႅၼ်ႈႁူဝ်ပူင်း လွၵ်ႉၸွၵ်ႇ ၵႂႃႇၵဵပ်းမၢၵ်ႇမႃးလဵၼ်ႈ တႅၵ်ႇသႂ်ႇတၢႆ 1 မၢတ်ႇ 4

မိူင်းတႆးပွတ်းၸၢၼ်း ၸႄႈတွၼ်ႈတူၼ်ႈတီး ၸႄႈဝဵင်းႁူဝ်ပူင်း ၼႂ်းဢိူင်ႇမိူင်ပဵင်း (လႅၼ်ၶႅၼ်ႈ ႁူဝ်ပူင်း-လွၵ်ႉၸွၵ်ႇ) ၼၼ်ႉ  လုၵ်ႈဢွၼ်ႇ ၵဵပ်းမၢၵ်ႇပွမ်းမႃးလဵၼ်ႈ၊ မၢၵ်ႇတႅၵ်ႇသႂ်ႇၶဝ်ႁႃႈၵေႃႉ   ဢွၼ်ႇၸၢႆး ဢႃယု 7 ၶူပ်ႇ တၢႆထင်တီႈ  ဢွၼ်ႇယိင်း ၵေႃႉၼိုင်ႈ လႆႈတႅပ်းပႅတ်ႈမိုဝ်းၶွၼ်ၼိုင်ႈ ။

မိူဝ်ႈဝၼ်းတီႈ 26/4/2022 ယၢမ်းၵၢင်ဝၼ်း လုၵ်ႈဢွၼ်ႇၵဵပ်း မၢၵ်ႇပွမ်းမႃးလဵၼ်ႈ၊ ၽွင်းတိုၵ်ႉလႅၼ်ႈယူႇၼၼ်ႉ မၢၵ်ႇတႅၵ်ႇတိူဝ်ႉသႂ်ႇၶဝ်လႄႈ ၸၢႆးပျေႉၸူင်ႇဢူး ဢႃယု 7 ၶူပ်ႇ  လူႉတၢႆထင်တီႈ၊ ဢွၼ်ႇယိင်း တိုၵ်ႉဢွင်ႇပူၼ်ႉၸၼ်ႉသိပ်း ၵေႃႉၼိုင်ႈ တိူဝ်ႉသႂ်ႇတီႈမိုဝ်းမၼ်းၼၢင်း မၢတ်ႇၸဵပ်းႁၢဝ်ႈႁႅင်းသေ လႆႈတႅပ်ႈပႅတ်ႈ၊ လိူဝ်ႈၼၼ်ႉ လုၵ်ႈဢွၼ်ႇ ထႅင်ႈ 3 ၵေႃႉ ၵေႃႈမၢတ်ႇၸဵပ်း ႁႅင်းလႄႈ လႆႈသူင်ႇယူတ်းယႃတူဝ် တီႈႁူင်းယႃလူင်ၸဝ်ႈၸၢမ်ႇထုၼ်း ဝဵင်းတူၼ်ႈတီး။

ၵူၼ်း ဢိူင်ႇမိူင်းပဵင်း လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ လုၵ်ႈဢွၼ်ႇၵဵပ်းလဵၼ်ႈ မၢၵ်ႇပွမ်းသေ တႅၵ်ႇသႂ်ႇ။ ဢွၼ်ႇၸၢႆး ဢႃယု 7 ၶူပ်ႇတႄႉ လူႉတၢႆ ထင်တီႈၵမ်းလဵဝ်။ ဢွၼ်ႇယိင်းၵေႃႉၼိုင်ႈ လႆႈတႅပ်းပႅတ်ႈမိုဝ်းၶွၼ်ၼိုင်ႈ။ တင်းမူတ်းမၢတ်ႇၸဵပ်း 4 ၵေႃႉ။ ယၢမ်းလဵဝ် လႆႈသူင်ႇ ယူတ်းယႃဝႆႉတီႈႁူင်းယႃ ၸဝ်ႈၸၢမ်ႇထုၼ်း တူၼ်ႈတီးဝႆႉ”- ဝႃႈၼႆ။

ဢွင်ႈတီႈ ပိူင်ပဵၼ်ၼၼ်ႉ ပဵၼ်တီႈႁႆႈ ႁိမ်းဝၢၼ်ႈၼမ်ႉမေႃႇၶူး လုၵ်ႈဢွၼ်ႇ ဢၼ်လႆႈမၢတ်ႇၸဵပ်း လူႉတၢႆၼၼ်ႉ ပဵၼ်လုၵ်ႈၸၢႆး ၸၢႆးထူၺ်ႉ လႄႈ ၼၢင်းၶိုဝ်း ၵူၼ်းဝၢၼ်ႈၼမ်ႉႁူးလႅင်။  မႃးၸွမ်းပေႃႈမႄႈမႃးႁဵတ်းႁႆႈ။  

ယၢမ်းလဵဝ် လုၵ်ႈဢွၼ်ႇ ဢၼ်လႆႈမၢတ်ႇၸဵပ်းဝႆႉ ၸိူဝ်းၼၼ်ႉ လႆႈသူင်ႇယူတ်းယႃတူဝ်ဝႆႉတီႈ ႁူင်းယႃ ၸဝ်ႈၸၢမ်ႇထုၼ်း ၸႄႈဝဵင်းတူၼ်ႈတီးဝႆႉ တႃႇ ဢွၼ်ႇယိင်း ဢႃယု 17 ပီ ဢွင်ႇပူၼ်ႉၸၼ်ႉသိပ်းဝႆႉၼၼ်ႉ မၼ်းၼၢင်းလႆႈတႅပ်းပႅတ်ႈမိုဝ်း ၽႃႇၶႂႃ ဝႆႉၶွၼ်ၼိုင်ႈ ယၢမ်းလဵဝ် လူဝ်ႇတၢင်းၸွႆႈထႅမ်ဝႆႉ။

“လုၵ်ႈဢွၼ်ႇ ဢၼ်လႆႈတၢႆၵႂႃႇၼၼ်ႉ တိုၵ်ႉပူၼ်ႉတူဝ်မိူဝ်ႈၼႆႉ။ ဢွၼ်ႇယိင်း ၵေႃႉယႂ်ႇၼၼ်ႉတႄႉ လႆႈတႅပ်းပႅတ်ႈမိုဝ်းၶွၼ်ၼိုင်ႈ ယွၼ်ႉတိူဝ်ႉသႂ်ႇ မၼ်း ၼၢင်းႁၢဝ်ႈႁႅင်း။ ယၢမ်းလဵဝ် ယၢပ်ႇၽိုတ်ႇဝႆႉ လွင်ႈငိုၼ်းတွင်း တႃႇယူတ်းယႃၶႃႈဢေႃႈ”- ၵူၼ်းပိုၼ်ႉတီႈ သိုပ်ႇလၢတ်ႈ ၼႄၼင်ႇၼႆ။

လုၵ်ႈဢွၼ်ႇ 4 ၵေႃႉ ဢၼ်တိူဝ်ႉၺႃးမၢတ်ႇၸဵပ်းသေ လႆႈသူင်ႇယူတ်းယႃဝႆႉတီႈ ႁူင်းယႃ ၸဝ်ႈၸၢမ်ႇထုၼ်း ဝဵင်းတူၼ်ႈတီး ဝႆႉၼၼ်ႉ ၵမ်ႈၼမ် ပဵၼ် လုၵ်ႈၵူၼ်းႁဵတ်းၵၢၼ်သူၼ်ႁႆႈၼႃးၵူၺ်းလႄႈ ယၢမ်းလဵဝ် ယၢပ်ႇၽိုတ်ႇဝႆႉ တႃႇၵႃႈယူတ်းယႃ ၼႆယဝ်ႉ။

တီႈၼႂ်းဢိူင်ႇမိူင်းပဵင်းၼႆႉ မီးၸုမ်းယိပ်းၵွင်ႈၵၢင်ႇတူင်ႉၼိုင်ၵႂႃႇမႃး မိူၼ်ၼင်ႇ ပျီႇတူႉၸိတ်ႉပဢူဝ်း၊ ၸုမ်းပျီႇတူႉၸိတ်ႉ ဢၼ်တူင်ႉၼိုင်ၸွမ်း ၸုမ်းသိုၵ်းမၢၼ်ႈၵုမ်းၵမ် တင်း ၸုမ်းဢူၺ်းလီ ပွတ်းႁွင်ႇ ၸိူဝ်းၼႆႉ။