မိူဝ်ႈၼႆႉ ဝၼ်းတီႈ 28/4/2022 ယၢမ်းဝၢႆးဝၼ်းမွၵ်ႈ 2 မူင်း လူမ်းလႅင်ႉၶဝ်ႈ ဝၢၼ်ႈၼႃးမၢၵ်ႇၶေႃ ၸႄႈဝဵင်း သီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ လင်ၶႃးႁိူၼ်းလူႉၵွႆၼမ် ။
ၵူၼ်း သီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၾူၼ်လူင်လူမ်းလူင်မႃးႁႅင်းၼႃႇၶႃႈ ၽတ်ႉပဝ်ႇ လင်ၶႃႈႁိူၼ်း ၽႃႁိူၼ်း ၵူၼ်း ဝၢၼ်ႈ တီႈဝၢၼ်ႈၼႃးမၢၵ်ႇၶေႃ လူႉၵွႆၵႂႃႇၼႆႉ တေမီးမွၵ်ႈ 50-60 လင်ၼႆႉ။ လွင်ႈလူႉသုမ်းၶေႃႈမုလ်းပႆႇႁူႉတႅတ်ႈတေႃးလီ ။ လွင်ႈၵူၼ်းမၢတ်ႇၸဵပ်းလူႉတၢႆၵေႃႈ ပႆႇလႆႈငိၼ်းဝႃႈႁိုဝ်ၶႃႈ တေႃႈလဵဝ် တိုၵ်ႉၵဵပ်းသဵၼ်ႈသၢႆမၢႆမၼ်းဝႆႉယူႇၼႆၶႃႈဢေႃႈ”- ဝႃႈၼႆ။
ယၢမ်းလဵဝ်ဢၼ်ႁၼ်တႂ်ႈတႃတႄႉ လင်ၶႃႈမုင်းႁိူၼ်းပိဝ် ၽႃႁိူၼ်း ယၢတ်ႇတူၵ်း တိူဝ်ႉပႃး လုမ်းၼႃႈဝၢၼ်ႈ လူႉၵွႆၸွမ်းထႅင်ႈ။ ဝၢၼ်ႈၼႃးမၢၵ်ႇၶေႃၼႆႉ တင်းမူတ်း လင်ႁိူၼ်းမီး 466 လင် ႁူဝ်ၵူၼ်းမီး 2 ႁဵင်ပၢႆ။ ပဵၼ်ဝၢၼ်ႈယႂ်ႇ မီးၾၢႆႇ ၸၢၼ်းဝဵင်း ၼႂ်းၵႄႈသီႇပေႃႉ – ၼမ်ႉလၼ်ႈ ယၢၼ်ၵႆဝဵင်း မွၵ်ႈ 30 လၵ်း ၼႆယဝ်ႉ။
မိူဝ်ႈဝူင်ႈပူၼ်ႉမႃးၼၼ်ႉၵေႃႈ မၢၵ်ႇႁဵပ်းတူၵ်းသႂ်ႇ ႁိူၼ်းယေး ၵူၼ်းဝၢၼ်ႈ တီႈဝၢၼ်ႈတူၼ်ႈၵႅင်း လူႉၵွႆၸွမ်း 3 လင်။ သူၼ်ထူဝ်ႇလိၼ် ၵူၼ်းဝၢၼ်ႈ လူႉၵွႆထႅင်ႈ မွၵ်ႈ 3 တူင်ႈ။
“ပူၼ်ႉမႃး ပၢႆႁိုင် မွၵ်ႈဝူင်ႈၼႆႉၵူၺ်း တီႈဝၢၼ်ႈတူၼ်ႈၵႅင်းၵေႃႈ မၢၵ်ႇႁဵပ်းတူၵ်းသႂ်ႇ လင်ၶႃးႁိူၼ်းၵူၼ်းဝၢၼ်ႈလူႉၵွႆ 3 လင်ၶႃႈ။ လိူဝ်ၼၼ်ႉ သူၼ် ထူဝ်ႇလိၼ် ၵူၼ်းဝၢၼ်ႈမွၵ်ႈ 3 တူင်ႈၼႆႉ ၵွႆမူတ်းၶႃႈဢေႃႈ။ ၵူၼ်းဝၢၼ်ႈၸဝ်ႈသူၼ် ဢွၼ်ၵၼ်တုၵ်ႉၶ ၶႃႈ။ တီႈၼၼ်ႈၵေႃႈ လူဝ်ႇတၢင်း ၸွႆႈထႅမ်ၶႃႈ”- ၵူၼ်းပိုၼ်ႉတီႈ သီႇပေႃႉ သိုပ်ႇလၢတ်ႈၼင်ႇၼႆ။
ၼႂ်း 2 ပီမႃးၼႆႉ ၵူၼ်းဝၢၼ်ႈ ၸဝ်ႈသူၼ် ၺႃးၽေးသိုၵ်းသိူဝ် ၽေးတၢင်းပဵၼ်ၵၢပ်ႈၵႃႇလၵူၺ်းဢမ်ႇၵႃး ၺႃးၽေးသၽႃႇဝ ထႅင်ႈလႄႈ ဢွၼ်ၵၼ် ထူပ်းတၢင်းယၢပ်ႇၽိုတ်ႇၵိၼ်းၸႂ်ႁႅင်း ၵၢၼ်ငၢၼ်း ဢမ်ႇဢွင်ႇ မၢၵ်ႇၶဝ်ႈတဝ်ႈၼမ်ႉၼႂ်းသူၼ် ဢမ်ႇၸၢင်ႈၶၢႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ