ၵေႃလိၵ်ႈလၢႆး ဝဵင်းၼမ်ႉၶမ်း ဢွၼ်ႁူဝ် ပိုတ်ႇပၢင်သွၼ်လိၵ်ႈတႆး ၶၢဝ်းမႆႈ တႃႇၶၢဝ်းတၢင်း လိူၼ်ပၢႆၽၢၵ်ႇ ဝႃႈၼႆ။
မိူဝ်ႈဝႃး ဝၼ်းတီႈ 25/4/2022 ယူႇတီႈၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းၼမ်ႉၶမ်း ဢွၼ်ႁူဝ်ၼမ်းၼႃႈသေ တႄႇပိုတ်ႇပၢင်သွၼ်လိၵ်ႈတႆး ၶၢဝ်းမႆႈၵႂႃႇ တီႈႁူင်းႁေႃလိၵ်ႈလၢႆး ၸႄႈဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆး ပွတ်းႁွင်ႇ ၼႆယဝ်ႉ။
ၽူႈပွင်ၵၢၼ် ၵေႃလိၵ်ႈလၢႆး ဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈယဝ်ႉၶႃႈ မိူဝ်ႈဝႃး တႄႇပိုတ်ႇပၢင်သွၼ် လိၵ်ႈတႆးယဝ်ႉၶႃႈ။ ယိူင်း ဢၢၼ်းဝႆႉ တေပူင်သွၼ်ၵႂႃႇ တႃႇၶၢဝ်းလိူၼ်ပၢႆၽၢၵ်ႇၶႃႈဢေႃႈ။ ဢွင်ႈတီႈပူင်သွၼ်တႄႉ တေပဵၼ်တီႈႁူင်းႁေႃ ၵေႃလိၵ်ႈလၢႆးၶႃႈ။ တေႁပ်ႉလုၵ်ႈ ႁဵၼ်းမွၵ်ႈ 100 ၵေႃႉၶႃႈ”- ဝႃႈၼႆ။
ပၢင်သွၼ်လိၵ်ႈတႆး ၶၢဝ်းမႆႈ တီႈဝဵင်းၼမ်ႉၶမ်းၼႆႉ တေႁပ်ႉလုၵ်ႈႁဵၼ်း မွၵ်ႈ 100 တေယႅၵ်ႈႁဵတ်း 3 ၸၼ်ႉသေ ပူင်သွၼ်ၵႂႃႇ ၼိုင်ႈၸၼ်ႉလႂ် တေဝႆႉ လုၵ်ႈႁဵၼ်း 25 – 30 ၵေႃႉ။ ၶၢဝ်းယၢမ်း ပူင်သွၼ်သမ်ႉ တႄႇဢဝ် ႁူဝ်ၶမ်ႈ 5 မူင်း ထိုင် 7 မူင်း ၵၢင်ၶမ်ႈ ၼႆယဝ်ႉ။
ယိူင်းဢၢၼ်း ၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းၼမ်ႉၶမ်း တမ်းဝၢင်းမီးဝႆႉ – ၵဵပ်းႁွမ်၊ သိမ်းပႅင်း၊ ယုၵ်ႉယွင်ႈ၊ လိၵ်ႈလၢႆးလႄႈ ၾိင်ႈ – ၼႆယဝ်ႉ။ ယဝ်ႉၵေႃႈ ပၢင်သွၼ်လိၵ်ႈတႆး ၶၢဝ်းမႆႈ တီႈဝဵင်းၼမ်ႉၶမ်းၼႆႉ လႆႈၸတ်းႁဵတ်း ပူင်သွၼ်မႃးၵူႈပီ ဝႃႈၼႆ။