တီႈဝဵင်းသူၺ်ႇၺွင်ႇ ၸိုင်ႈတႆးပွတ်းၸၢၼ်း ၸတ်းႁဵတ်းပၢင်တေႃႇလွင်း ၵိုၵ်းႁိူၼ်း မီးၵူၼ်းၵႂႃႇ တေႃႇလဵၼ်ႈ ၵိုၼ်းၶွၼ်ႈၵူႈၶၢဝ်း။
တႄႇဢဝ် ႁၢင်လိူၼ်ဢေႊပရိူဝ်း 2022 ၼႆႉမႃး တီႈႁိူၼ်းၵူၼ်း ဝၢၼ်ႈလင်ၼိုင်ႈ တီႈပွၵ်ႉမင်ႇၵလႃႇဢွင်ႇမေႇ (ပွၵ်ႉ 1) ဝဵင်းသူၺ်ႇၺွင်ႇ ၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်းၼၼ်ႉ ပိုတ်ႇပၢင်လေးၵွင်ႇၵျိၼ်ႇ တေႃႇလွင်းၵၼ်လွတ်ႈလႅဝ်း 24 ၸူဝ်ႈမူင်း ၵူၼ်းၵႂႃႇလဵၼ်ႈၵိုၼ်းၶွၼ်ႈၵူႈဝၼ်း။
ၵူၼ်းပိုၼ်ႉတီႈ လၢတ်ႈတီႈၽူႈတွႆႇႁွၵ်ႈဝႃႈ – “တီႈႁိူၼ်းလင်ၼၼ်ႉ မီးပၢင်တေႃႇလွင်း လေးၵွင်ႇၵျိၼ်ႇ သွင်ပၢင်။ ၽူႈယိင်းပၢင်ၼိုင်ႈ၊ ၽူႈၸၢႆးပၢင် ၼိုင်ႈ။ ပိုတ်ႇလဵၼ်ႈၵၼ် တင်းဝၼ်း တင်းၶိုၼ်းၶႃႈယဝ်ႉ။ ၸဝ်ႈႁိူၼ်းလႆႈငိုၼ်းၵႃႈၶွၼ်ႇမၼ်း တေႃႇဝၼ်း မိုၼ်ႇႁႃႈႁဵင်ပျႃး။ ယဝ်ႉၵေႃႈ ၶဝ်ပၼ် ၽူႈၵွၼ်းပွၵ်ႉ တေႃႇဝၼ်းသႅၼ်ႁႃႈမိုၼ်ႇပျႃး” – ဝႃႈၼႆ။
ပၢင်တေႃႇလွင်းၼႆႉ ပိုတ်ႇလဵၼ်ႈ 24 ၸူဝ်ႈမူင်း။ ၵူၼ်း မႃးတေႃႇလဵၼ်ႈ ၵိုၼ်းၶွၼ်ႈ ပဵၼ်ယၢမ်းႁူဝ်ၶမ်ႈ 5 မူင်း ပၢႆၵႂႃႇ ၼႆယဝ်ႉ။
“ပၢင်ၽၢႆႉ ၵေႃႈ မီး။ ၶဝ်လဵၼ်ႈၵၼ်ၼႆႉ ငိုၼ်းၼပ်ႉဢၢၼ်ႇႁူဝ်ပၢၵ်ႇသႅၼ်မၼ်းၶႃႈ။ ပၢင်တေႃႇလွင်းၼႆႉ တႄႇႁဵတ်းမႃး မီးၶၢဝ်းတၢင်း မွၵ်ႈ 5 ဝၼ်းၼႆႉယဝ်ႉ”- ၵူၼ်း ပိုၼ်ႉတီႈ သိုပ်ႇလၢတ်ႈၼင်ႇၼႆ။
မိူၼ်ၼႆ ၼင်ႇၵဝ်ႇ တီႈဝၢၼ်ႈၽြႃးလႅင် (ဘုရားနီကျေးရွာ) ၸႄႈဝဵင်းတူၼ်ႈတီးၼၼ်ႉၵေႃႈ မီးပၢင်တေႃႇလွင်း လေးၵွင်ႇၵျိၼ်ႇမႃး ၶၢဝ်း တၢင်း 2 လိူၼ်ပၢႆယဝ်ႉ ၼၼ်ႉၵေႃႈ ၵူၼ်းၵိုၼ်းၶွၼ်ႈၵူႈၶၢဝ်း မိူၼ်ၵၼ်။
ဝၢႆးသေ သိုၵ်းမၢၼ်ႈ ယိုတ်းမိူင်းမႃးၼႆႉ ပၢင်တေႃႇလွင်း ၼႂ်းမိူင်းတႆး ယိုင်ႈၶႅၼ်းလိူင်ႇၼမ်မႃးလိူဝ်ၵဝ်ႇထႅင်ႈ ၽူႈလၵ်ႉၵူၼ်းၸူၼ် လိူင်ႇၼမ် ၊ ၵၢၼ်ၵႃႉၶၢႆ သူႇသမ်း ယႃႈမဝ်းၵမ် ၸိူဝ်းၼႆႉၵေႃႈ လိူင်ႇၼမ်ထႅင်ႈ ဝႃႈၼႆ။
ၽွင်းသိုၵ်းမၢၼ်ႈ ယိုတ်းမိူင်းမႃးၼႆႉ တင်ႈၸႂ်ပွႆႇႁႂ်ႈမီးပၢင်တေႃႇလွင်းမႃး ၼႂ်းမိူင်းတႆးၶိူဝ်းယႂ်း ဢမ်ႇဝႃႈပွႆးလၢမ်းလႂ်၊ ပွႆးသၢင်ႇလွင်းလႂ် ၸိူဝ်းၼႆႉ မၢင်တီႈ ပၢႆပၼ်ၶႂၢင်ႉတေႃႇလွင်းၽႅဝ်ၼႂ်းႁူင်းပလိၵ်ႈမၢၼ်ႈ ၸိူဝ်းၼႆႉၵေႃႈမီး ။
 ဝဵင်းသူၺ်ႇၺွင်ႇ ၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်းၼၼ်ႉ ပိုတ်ႇပၢင်လေးၵွင်ႇၵျိၼ်ႇ တေႃႇလွင်းၵၼ်လွတ်ႈလႅဝ်း 24 ၸူဝ်ႈမူင်း ၵူၼ်းၵႂႃႇလဵၼ်ႈၵိုၼ်းၶွၼ်ႈၵူႈဝၼ်း။){kind=link}