ၽူႈလၵ်ႉၵူၼ်းၸူၼ်လိူင်ႇၼမ် ၼႂ်းၸႄႈဝဵင်းလႃႈသဵဝ်ႈ ဝၢႆးလင်သွၼ်းၼမ်ႉ  ထိုင်တီႈပႃးမိတ်ႈပႃးလႅဝ်း ပႂ်ႉၸူၼ်/လမ်း ၽၼ်းၵူၼ်းမိူင်းၵႂႃႇမႃး ၶီႇရူတ်ႉ ၶီႇၵႃးယိင်ႈၶႅၼ်းလႆႈမႆႈၸႂ် ။

ၵူၼ်း လႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပူၼ်ႉမႃး 2-3 ဝၼ်းၼႆႉ တီႈႁိမ်းဝၢၼ်ႈၸၢင်ႉၽႅတ်းၼၼ်ႉ မီးၵူၼ်းပႂ်ႉ ၸူၼ်ရူတ်ႉၶိူင်ႈ ၵူၼ်းဝၢၼ်ႈ လႆႈၵႂႃႇလမ်းၼိုင်ႈ။ ၸဝ်ႈၶွင်ရူတ်ႉၺႃးၽၼ်း  မၢတ်ႇၸဵပ်း။ မိူဝ်ႈဝႃး တီႈႁိမ်းဝၢၼ်ႈၼွင်မွၼ် ၵေႃႈ ပဵၼ်ထႅင်ႈၶႃႈဢေႃႈ။ ၼၼ်ႉၵေႃႈ ၽၼ်းၵူၼ်းသေ ဢဝ်ရူတ်ႉၶိူင်ႈၵႂႃႇၼႆၶႃႈ။ ၵူၼ်းႁၢႆႉၼႆႉ ၶဝ်မိူၵ်ႈႁႅင်းၼႃႇယဝ်ႉ ပႂ်ႉၸွမ်းတၢင်းသေ ၽၼ်းၵူၼ်း ႁိမ်ရူတ်ႉၶိူင်ႈ ႁိမ်ထူင်ငိုၼ်း ႁိမ်ၶမ်းၸိူဝ်းၼႆႉ မီးမႃးၶိူဝ်းယႂ်း ၼမ်ၼႃႇယဝ်ႉၶႃႈ တီႈလႃႈသဵဝ်ႈၼႆႉ”- ဝႃႈၼႆ။

တေႃႈၼင်ႇရူတ်ႉၶိူင်ႈ ဢၼ်မီးၸဝ်ႈၶွင်ယင်းပႂ်ႉပေႃႉထုပ်ႉၽၼ်းၸဝ်ႈၶွင်သေႁိမ်ဢဝ်ၵႂႃႇ။ ပေႃးပဵၼ်ရူတ်ႉၶိူင်ႈ ၊ ႁူဝ်ၸၢၵ်ႈ၊ ထေႃႈလႃႈၵျီႈ ဢၼ်ၵိုတ်းဝႆႉ ၸွမ်းသူၼ် ၸွမ်းႁိူၵ်ႈ တီႈႁၢင်ႇၵႆတႃၵူၼ်း ယိင်းၶႅၼ်းဢမ်ႇဝႆႉသင်။  ႁၢႆၵူႈဝၼ်း – ဝႃႈၼႆ။

“ တီႈပွၵ်ႉ 5 ႁိမ်းၵၢတ်ႇ ႁိမ်းႁူင်းယႃ တီႈၵူၼ်းၵိုၼ်း ပူၼ်ႉမႃး ပႆႇႁိုင်သင်ၼႆႉ ယၢမ်းၵၢင်ဝၼ်း ၾၢႆႇၼႃႈ ၶႃႈႁဝ်းၵမ်းလဵဝ်။ လၵ်ႉၸၼ်ဢဝ်ရူတ်ႉၶိူင်ႈ သေပၢႆႈ ၸဝ်ႈၶွင်မၼ်းႁွင်ႉႁႆႈၸွမ်းတင်းလင်ဢေႃႈၼႆႉ။ ၵူၼ်းႁၢႆႉၼႆႉ ၶဝ်ႁဵတ်းထိုင်တၢၼ်ႇၼႆႉ လွင်ႈႁူမ်ႇလူမ်ႈတႄႉ ဢမ်ႇမီးသင်သေဢိတ်းယဝ်ႉ။ ဢၼ်ၸူၼ်ႁႅင်း လၵ်ႉႁႅင်း ၼမ်မႃးလိူဝ်ၵဝ်ႇၼႆႉ ဝၢႆးလိူၼ်ႁႃႈၼႆႉမႃးယဝ်ႉ”- ၵူၼ်းပိုၼ်ႉတီႈ သိုပ်ႇလၢတ်ႈၼႄၼင်ႇၼႆ။

 ဢိင်ၼိူဝ်ပၢႆးမၢၵ်ႈမီး ဢမ်ႇပဵၼ်ၵၢၼ်၊ ၵႃႉၶၢႆဢမ်ႇဢွင်ႇမၢၼ်၊ ၸဝ်ႈသူၼ်ၸဝ်ႈႁိူၵ်ႈၵေႃႈ ဢမ်ႇၸၢင်ႈၶၢႆၶူဝ်းၵုၼ်ႇဢွၵ်ႇတၢင်းလႂ်ႁဵတ်းႁႂ်ႈႁႃၵိၼ်လဵင်ႉတွင်ႉယၢပ်ႇၵိၼ်းမႃးၵူႈဝၼ်း။ ဢၼ်ၵိၼ်းၸႂ်လိူဝ်ၵူၼ်းပိုၼ်ႉတီႈသမ်ႉပဵၼ် ႁႅင်းၵၢၼ်လႄႈၸိူဝ်းဢၼ်လုၵ်ႉတၢင်ႇတီႈမႃးယူႇသဝ်းႁႃၵိၼ်လဵင်ႉတွင်ႉ။ ၵူၺ်းၵႃႈ ၽူႈလၵ်ႉၵူၼ်းၸူၼ်ၸိူဝ်းၼၼ်ႉပဵၼ်ၽႂ် လုၵ်ႉလႂ်မႃးဢမ်ႇႁူႉ၊ ယွၼ်ႉဝႃႈ ပလိၵ်ႈဢမ်ႇလမ်းတီႉၺွပ်းႁႂ်ႈလႆႈသေပွၵ်ႈ။

ၼွၵ်ႈလိူဝ် ဢၼ်ပႂ်ႉၸူၼ်ႁိမ်ဢဝ်ရူတ်ႉၶိူင်ႈယဝ်ႉ ဢၼ်ၺႃးၽူႈလၵ်ႉၶိုၼ်ႈႁိူၼ်းယေး လၵ်ႉၶူဝ်းၶွင်ၵႂႃႇၵေႃႈမီးတင်းၼမ်။ၾၢႆႇၼိုင်ႈ ပၢင်တေႃႇလွင်း ၸိူဝ်းၼႆႉၵေႃႈပၼ်ပိုတ်ႇဝႆႉပဵၼ်တၢင်းၵၢၼ်  မီးယူႇၵူႈပွၵ်ႉ/ ၾၢႆႇ။  မၢင်ပွၵ်ႉ ပိုတ်ႇတေႃႇလဵၼ်ႈၵၼ် ၼႂ်းဝၢင်းႁိူၼ်း ႁိမ်းၶၢင်ႈတၢင်း ၸိူဝ်းၼႆႉထႅင်ႈလူးၵွၼ်ႇ ၊ မိူၼ် ပလိၵ်ႈမၢၼ်ႈ/ သိုၵ်းမၢၼ်ႈ  တင်ႈၸႂ်ပွႆႇႁႂ်ႈမၼ်းလိူင်ႇ ၼမ် ၊ ႁႂ်ႈၵူၼ်းမိူင်းသူၼ်ၸႂ်ၼႂ်းၵၢၼ်တေႃႇလွင်းသေ လိုမ်းလွင်ႈၵၢၼ်တေႃႇသူႈတႃႇပူၼ်ႉဢွၵ်ႇလွတ်ႈလွင်ႈတုၵ်ႉယၢၵ်ႈၵူၺ်း- ၵူၼ်းလႃႈသဵဝ်ႈလၢတ်ႈၼင်ႇၼႆ။