ၸွမ်ၸိၵ်းသိုၵ်းမၢၼ်ႈယိုတ်းမိူင်း မိၼ်းဢွင်ႇလၢႆႇ လၢတ်ႈၵႂၢမ်းပိုၼ်ၽၢဝ်ႇတီႈ MRTV မိူဝ်ႈၼႆႉဝၼ်းတီႈ 22/4/2022  ဝႃႈ ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၸုမ်းလႂ် ၶႂ်ႈႁူပ်ႉထူပ်းဢုပ်ႇၵုမ်တင်းသိုၵ်းမၢၼ်ႈၵေႃႈ ႁႂ်ႈတၢင်ႇယိုၼ်ႈမႃး ၼႂ်းဝၼ်းတီႈ 9/5/2022 ၼႆႉဝႆႉပဵၼ်ဝၼ်းလိုၼ်းသုတ်း ၊ တူဝ် မဢလ တေၵေႃႉႁူပ်ႉထူပ်းဝႃႈၼႆ။

တႃႇဢုပ်ႇဢူဝ်းလွင်ႈငမ်းယဵၼ်ႁႂ်ႈပေႃးထိုင်တီႈ ထိုင်တၢင်းလီငၢမ်းၼၼ်ႉ ယိုၼ်ႈမိုဝ်းမွၵ်ႇထိုင် ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း/မၢၼ်ႈ   ၸုမ်းလႂ်သေဢမ်ႇဝႃႈ ၼိုင်ႈၸုမ်း 2 ၵေႃႉ မႃးႁူပ်ႉလႆႈတီႈၼေႇပျီႇတေႃႇ  တူဝ်မိၼ်းဢွင်ႇလၢႆႇ တေၵေႃႉႁူပ်ႉထူပ်း ဝႃႈၼႆ။

လွင်ႈယိုၼ်းမိုဝ်းၸူး ၸုမ်းၸၢဝ်းၶိူဝ်းၸိူင်ႉၼႆ မိူဝ်ႈပၢၼ် တဵင်းၸဵင်ႇ ပဵၼ်ၸွမ်ၸိုင်ႈၼၼ်ႉၵေႃႉ ႁဵတ်းမႃးပွၵ်ႈၼိုင်ႈယဝ်ႉ ။ ၽွင်းၼၼ်ႉ မီးၸုမ်းၸၢဝ်းၶိူဝ်းလၢႆလၢႆၸုမ်း ၵႂႃႇႁူပ်ႉထူပ်းဢုပ်ႇၵုမ် ။ ပႃးတင်းၸုမ်း RCSS ၸုမ်းၼိုင်ႈ။ ထိုင်တီႈလႆႈလူင်းလၢႆးမိုဝ်းၵိုတ်းတိုၵ်းပတ်းပိုၼ်ႉတူဝ်ႈမိူင်း ၊ လူင်းလၢႆးမိုဝ်းလွင်ႈငမ်းယဵၼ် NCA ။ ၵူၺ်းၵႃႈ တေႃႇထိုင်ယၢမ်းလဵဝ် မီးမႃးၶၢဝ်တၢင်း 10 ပီၵေႃႈ သိုၵ်းမၢၼ်ႈလႄႈ သိုၵ်းၸၢဝ်းၶိူဝ်း NCA ယင်းတိုၵ်ႉပိုတ်းယိုဝ်းၵၼ်ယူႇၶိူဝ်းယႂ်း။

ၾၢႆႇၼိုင်ႈသိုၵ်းမၢၼ်ႈယိုတ်းမိူင်းၼႆႉ ပဵၼ်ၸုမ်းဢၼ်လုမ်ႈၾႃႉ ဢဝ်လိူင်ႈၸွႆးတြႃးဝႆႉတီႈလုမ်းတြႃး ICJ – လူၺ်ႈတၢင်းၽိတ်းၶႃႈႁႅမ်ၽဵဝ်ႈမူၺ်ႉၶိူဝ်းၵူၼ်း ရူဝ်ႊႁိၼ်ႊၵျႃႊ ၼႆဝႆႉ။ ၼႂ်းပိုၼ်းမိူင်းႁူမ်ႈတုမ် ပၢၼ်သိုပ်ႇပၢၼ်ၵေႃႈ သိုၵ်းမၢၼ်ႈ ၶဝ်ႈၸိုဝ်ႈပဵၼ်ၸုမ်းဢၼ် ပေႉၵိၼ်တဵၵ်းတဵင်သုၼ်ႇလႆႈၸၢဝ်းၶိူဝ်းမႃးတင်းၸူဝ်ႈတင်းၸၢတ်ႈ။ ယၢမ်းလဵဝ်ၵေႃႈ သိုၵ်းမၢၼ်ႈလိုပ်ႈလမ်းတီႉၺွပ်း ပေႃႉထုပ်ႉၶင်ၶွၵ်ႈ ၶႃႈႁႅမ်တၢႆ ယူႇၵူႈဝၼ်း။

လိူဝ်ၼၼ်ႉ သိုၵ်းမၢၼ်ႈ ႁႅၼ်းသိုၵ်းလေႃႇတိုၵ်းပိုတ်းယိုဝ်း ၸုမ်းသိုၵ်း PDF တၢင်းလႅၼ်လိၼ် တႆး-ယၢင်းလႅင် ၵူႈဝၼ်း ၊ ယင်းပၢႆဢဝ်ဢဝ်ၶိူင်ႈမိၼ်ယိုဝ်းသိုၵ်းမႃးယိုဝ်းၸွႆႈထႅင်ႈသေဢမ်ႇၵႃး ၶဝ်ႈတဝ်ၼႂ်းဝၢၼ်ႈ  သွၵ်ႈတဝ်ယႃႉၵဝ်း ၽဝ်ႁိူၼ်းယေးၵူၼ်းဝၢၼ်ႈတၢင်းယႂႃႇငၢၼ်ႇ ၸိုင်ႈတႆးပွတ်းၸၢၼ်းၼႆႉၵူႈဝၼ်း။