ၵူၼ်းၵဵင်းတုင်ၵေႃႉၼိုင်ႈ မီးၼီႈ ၊ ၺႃးၸဝ်ႈၼီႈတီႉၵႂႃႇလွၵ်ႇငိုတ်ႈယွၼ်းရူတ်ႉယွၼ်းႁိူၼ်း ၊ ၽိူဝ်ႇၵူၼ်းဝၢၼ်ႈလႄႈပလိၵ်ႈတီႉလႆႈၸုမ်းၸဝ်ႈၼီႈၼၼ်ႉမီးပႃး ၵူၼ်းမိူင်းၶႄႇ ဢၼ်ဢမ်ႇမီးဝတ်းဝႂ် မၢတ်ႈပူင်ႇတိၼ်ႇသင် ။
ဝၼ်းတီႈ 17/4/2022 မွၵ်ႈယၢမ်းဝၢႆးဝၼ်း 2 မူင်း လုင်းဢႃးမႄး ဢႃယု 60 ပီ ယူႇပွၵ်ႉဝဵင်းမႂ်ႇ ၵဵင်းတုင် ၺႃးၵူၼ်းၸုမ်းၼိုင်ႈဢဝ်ထူင်လမ်သုပ်းႁူဝ်သေ တီႉၺွပ်းႁွင်ႉဢဝ်မၼ်းၵႂႃႇၼႂ်းပႃႇႁဵဝ်ႈၶႄႇ ဢၼ်မီးတၢင်းဝၢၼ်ႈယၢင်းလေႃးယဝ်ႉ ယွၼ်းၼီႈတီႈမၼ်း၊ လွၵ်ႇငိုတ်ႈႁႂ်ႈ လုင်းဢႃးမႄးဢဝ်ရူတ်ႉၵႃး ႁိူၼ်းယေး မွပ်ႈပၼ်ၶဝ်တင်းမူတ်းဝႃႈၼႆ။
“ၽွင်းၼၼ်ႉ လုင်းဢႃးမႄးၵေႃႈၵူဝ်သေလၢတ်ႈဝႃႈ ၽွမ်ႉယူႇ တေပၼ်ၼင်ႇၶဝ်ယွၼ်းယူႇ ၼႆလႄႈၸင်ႇလႆႈပွၵ်ႈမႃးႁိူၼ်းၶိုၼ်းဢေႃႈ။ ၽိူဝ်ႇမၼ်းလႆႈပွၵ်ႈၶိုၼ်း မၼ်းၸင်ႇမႃးတိူင်ႇတီႈႁူင်းပလိၵ်ႈၼၼ်ႉၶႃႈၼႃႇ။ ပလိၵ်ႈလႄႈၵူၼ်းဝၢၼ်ႈ ႁူမ်ႈၵၼ်ၵႂႃႇတီႉလႆႈၸဝ်ႈၼီႈဢၼ်ဢဝ်လၢႆးႁၢႆႉသေယွၼ်းၼီႈၶိုၼ်းၼၼ်ႉဢေႃႈ ” ၵူၼ်းၵဵင်းတုင်ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈၼင်ႇၼႆ။
လုင်းဢႃးမႄး တွင်းရူတ်ႉၵႃးဢၼ်မႃးတီႉၺွပ်းမၼ်းၼၼ်ႉ ၵိုတ်းၸွတ်ႇဝႆႉၼႃႈႁူင်းႁႅမ်း ၽူႇလၢႆ ဢၼ်မီးတီႈ ပွၵ်ႉ 5 ၵဵင်းတုင်ၼၼ်ႉလႄႈ ပလိၵ်ႈတင်းၵူၼ်းလူင်ဝၢၼ်ႈ ၸင်ႇၵႂႃႇၸွပ်ႇထၢမ်တူၺ်းသေ တီႉၺွပ်းလႆႈ ၸဝ်ႈၼီႈဢၼ်မႃးတီႉၺွပ်းလုင်းဢႃးမႄး ၊ ၸိုဝ်ႈႁွင်ႉဝႃႈ မွင်ႇရႃႇၽႃႇ၊ ဝၢႆးၼၼ်ႉ ၸင်ႇလႆႈႁူႉဝႃႈ မီးထႅင်ႈ 2-3 ၵေႃႉဢၼ်ႁူမ်ႈတင်းမွင်ႇရႃႇၽႃႇသေၵႂႃႇတီႉၺွပ်းလုင်းဢႃးမႄး။
“တီႉလႆႈၸုမ်းၶဝ်ၵူၼ်း 3-4 ၵေႃႉဢေႃႈ တီႈႁူင်းႁႅမ်းၼၼ်ႉ။ ၶဝ်ၵေႃႈ ယွမ်းႁပ်ႉတီႈပလိၵ်ႈတင်းၵူၼ်းလူင်ဝၢၼ်ႈဝႃႈ ၶဝ်လႆႈ ပူၼ်ႉပႅၼ်ႁဵတ်းၽိတ်း တီႉၺွပ်းလုင်းဢႃးမႄးၼၼ်ႉၵႂႃႇလွၵ်ႇငိုတ်ႈယွၼ်းငိုၼ်းယူႇတႄႉ ၼႆဢေႃႈ။ ၼႂ်းၸုမ်းၶဝ်ၼၼ်ႉ သမ်ႉပႃး ၶႄႇ 4 ၵေႃႉ။ ဢမ်ႇမီးဝတ်းဝႂ်မၢတ်ႈပူင်ႇတိၼ်ႇမိူင်းႁဝ်း၊ ဢမ်ႇမီးပၢတ်ႉသပူတ်ႉ ဢမ်ႇမီးဝႂ်သင် တႃႇယူႇသဝ်း။ လႆႈဝႃႈၶဝ်လၵ်ႉမႃးယူႇမိူင်းႁဝ်းၶႃႈဢိူဝ်ႈၼေႃႈ” – ဝႃႈၼႆ။
ၼႂ်းၸုမ်း မွင်ႇရႃႇၽႃႇ ၶဝ်ၼၼ်ႉ ၵူၼ်းမိူင်းၶႄႇ မီး 4 ၵေႃႉ ၵူၼ်းၵဵင်းတုင်မီး 3 ၵေႃႉ ၼႂ်းၼၼ်ႉပႃး ၽူႈယိင်းၵေႃႉၼိုင်ႈ။ ယၢမ်းလဵဝ်ၸိူဝ်းၶဝ်ၺႃးတီႉၺွပ်းၶင်ၶွၵ်ႈဝႆႉတီႈႁူင်းပလိၵ်ႈၵဵင်းတုင်။
လွင်ႈမီးၼီႈတေႃႇၵၼ်တႄႉ မီးၼီႈၵႃႈႁိုဝ်ဢမ်ႇႁူႉ လႄႈ ပဵၼ်လွင်ႈတၢင်းၸိူင်ႉႁိုဝ်ဢမ်ႇလႆႈႁူႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ