ပူၼ်ႉမႃးဝၼ်းတီႈ 18/4/2022 ယၢမ်းၵၢင်ၶမ်ႈ သိုၵ်းမၢၼ်ႈ ၽဝ်ႁိူၼ်းယေးၵူၼ်းဝၢၼ်ႈ ၼပၢၼ်းၵျီး ၸႄႈဝဵင်းယႂႃႇငၢၼ်ႇ ၸိုင်ႈတႆးပွတ်းၸၢၼ်း။
ပဵၼ်ႁိူၼ်း ၵူဝ်ႇဝိၼ်းၶၢႆႇ ပူႇၵႄႇၵဝ်ႇ ဝၢၼ်ႈၼပၢၼ်းၵျီး ။ မၼ်းၸၢႆးၼႆႉပဵၼ်ၵူၼ်းတူင်ႉၼိုင်ၼႂ်းၵၢၼ်မိူင်း ၵူၼ်းၼုမ်ႇဝၢၼ်ႈ ၼပၢၼ်းၵျီးၵေႃႉၼိုင်ႈလၢတ်ႈ။
“ ၵူဝ်ႇဝိၼ်းၶၢႆႇၼႆႉ မၼ်းၵေႃႈပဵၼ်ၵူၼ်းတူင်ႉၼိုင်ၼႂ်းၸုမ်း NLD ၵေႃႉၼိုင်ႈၼင်ႇၵဝ်ႇ။ ၵွပ်ႈၼႆလႄႈသိုၵ်းမၢၼ်ႈၸင်ႇမႃးၽဝ်ႁိူၼ်းမၼ်းၶႃႈၵႂႃႈ ၊ သိုၵ်းမၢၼ်ႈမႃးၽဝ်မွၵ်ႈၶၢဝ်းယၢမ်း 8 မူင်းၵၢင်ၶမ်ႈၼႆႉၶႃႈယိုင် ” ၵူၼ်းၼုမ်ႇၼၼ်ႉလၢတ်ႈၽူႈတွႆႇႁွၵ်ႈၼင်ႇၼႆ။
ၼႂ်းဝူင်ႈပူၼ်ႉမႃး ရူတ်ႉၵႃးသိုၵ်းမၢၼ်ႈၺႃးၸုမ်းသိုၵ်း PDF ပိုတ်းယိုဝ်းၵၢင်တၢင်း ႁိမ်းဝၢၼ်ႈလႂႃႉၸိၼ်ႇ ၊ ဝၢႆးၼၼ်ႉသိုၵ်းမၢၼ်ႈ ၶဝ်ႈဢဝ်တီႈယူႇၼႂ်းဝၢၼ်ႈ ႁိမ်းႁွမ်းၼၼ်ႉ သေ သွၵ်ႈတဝ်ႁိူၼ်းယေးၵူၼ်းဝၢၼ်ႈ၊ တီႉၺွပ်းၵူၼ်းၼုမ်ႇ ဢၼ်ၶဝ်ထၢင်ႇထိူမ်။ ႁဵတ်းႁႂ်ႈၵူၼ်းဝၢၼ်ႈ ဢွၼ်ၵၼ်ပၢႆႈၵႂႃႇယူႇသဝ်းတၢင်ႇတီႈ တၢင်ႇဝၢၼ်ႈ။
ၵူဝ်ႇဝိၼ်းၶၢႆႇၶဝ်ၵေႃႈ ပၢႆႈတင်းႁိူၼ်း။ ၽွင်းသိုၵ်းမၢၼ်ႈမႃးၽဝ်ႁိူၼ်းၶဝ်ၼၼ်ႉ ဢမ်ႇမီးၵူၼ်းယူႇႁိူၼ်းသေၵေႃႉ။
လွင်ႈသိုၵ်းမၢၼ်ႈမႃး ပေႉၵိၼ်လူလၢႆတဵၵ်းတဵင်ၵူၼ်းမိူင်းယႂႃႇငၢၼ်ႇယူႇၸိူင်ႉၼႆၼႆႉ ႁႂ်ႈၸုမ်းယိပ်းၵွင်ႈၵၢင်ႇ ၸၢဝ်းၶိူဝ်းမႃးၸွႆႈထႅမ်ပၼ်ၵူၼ်းဝၢၼ်ႈသေၵမ်း ၵူၼ်းၼုမ်ႇယႂႃႇငၢၼ်ႇတႄႉ ဢွၼ်ၵၼ်တုၵ်းယွၼ်းၼင်ႇၼႆ။
