မိူဝ်ႈၼႆႉ ယၢမ်းၵၢင်ဝၼ်း ၵူၼ်းမိူင်းတႆး ၼႂ်းဝဵင်းလူင်မိူၼ်ၼင်ႇဝဵင်းတူၼ်ႈတီး ၊ လႃႈသဵဝ်ႈ၊ ၵျွၵ်ႉမႄး ၊ ၼွင်ၶဵဝ် ၶဝ်ႈထႅဝ်ပႂ်ႉသိုဝ်ႉၼမ်ႉမၼ်းၸၢၵ်ႈ ထိုင်တီႈ မၢင်ႁၢၼ်ႉ လႆႈပိၵ်ႉႁၢၼ်ႉပႅတ်ႈ။

တီႈဝဵင်းလူင်တူၼ်ႈတီး ၼႂ်ၼႆႉ ဢိင်ၼိူဝ်ၵူၼ်းမိူင်းႁိမ်ၵၼ်သိုဝ်ႉၼမ်ႉမၼ်းၸၢၵ်ႈသေ ၵႃႈၶၼ်ၼမ်ႉမၼ်းၵေႃႈ ပုင်ႈၶိုၼ်ႈသုင် 300-400 ၵျၢတ်ႉ တေႃႇၼိုင်ႈလိတ်ႉ။

“ၵွၼ်ႇၼႃႈသွၼ်းၼမ်ႉၼၼ်ႉ ႁဝ်းၶႃႈယင်းလီၸႂ်ဝႃႈ ၶၼ်ၼမ်ႉမၼ်းလူင်းမႃးယဝ်ႉၼႆ။ ၼႂ်ၼႆႉၶၼ်ၼမ်ႉမၼ်းၶိုၼ်းၶိုၼ်ႈ ဢေႃႈ။  တီႊသႄႊလ် 1 လိတ်ႉ 2430 ပျႃးထိုင် 2460 ပျႃး။ ၼမ်ႉမၼ်းထၢတ်ႈသီႇသမ်ႉ 92 – ၼိုင်ႈလိတ်ႉ 2160 ၊ 95 သမ်ႉ  2330 ပျႃးဢေႃႈ။ ၵူၼ်းႁိမ်ၵၼ်သိုဝ်ႉပေႇၸႂ်။ ၶၢတ်ႇၵႂႃႇ မူတ်းၵႂႃႇၼႆတႄႉဢမ်ႇမီးၼင်ႇၵဝ်ႇၶႃႈ။  ” ၵူၼ်းတူၼ်ႈတီးၵေႃႉၼိုင်ႈလၢတ်ႈ။

 တီႈဝဵင်းလႃႈသဵဝ်ႈသမ်ႉ တီႈႁၢၼ်ႉၶၢႆၼမ်ႉမၼ်းတီႈၼႃးမၢၵ်ႇၶေႃ မီးရူတ်ႉၵႃးလဵၵ်ႉယႂ်ႇ ပႃးၸဵမ်ရူတ်ႉၶိူင်ႈမႃးၶဝ်ႈထႅဝ်ၵၼ်ၶပ်ႉယႆပႂ်ႉသိုဝ်ႉၼမ်ႉမၼ်း။ ထိုင်တီႈ မၢင်ႁၢၼ်ႉလႆႈပိၵ်ႉၽၵ်းတူပႅတ်ႈ၊ ဝႃႈၼမ်ႉမၼ်းမူတ်း။

“ဢၼ်ပႃးပုင်းၵႂႃႇ ၶဝ်ဢမ်ႇၶၢႆပၼ်ၶႃႈလူင်။ ၶဝ်ၶၢႆပၼ် ထႅမ်ပၼ်ရူတ်ႉၵႃး လႄႈ ရူတ်ႉၶိူင်ႈၵူၺ်း။ ပေႃးပဵၼ်တၢင်းၼွၵ်ႈဝဵင်းဢိၼ်ႉတႄႉ  ၶၢႆပၼ်ၵႃးၼိုင်ႈလမ်းၼႆႉ ထိုင် 5 မိုၼ်ႇပျႃးၸိူဝ်းၼႆႉၵေႃႈမီးဢေႃႈ။ ပေႃးပဵၼ်သၢပ်ႇဝဵင်းတႄႉ ၶၢႆပၼ် ၼိုင်ႈလမ်းတႃႇမွၵ်ႈ 3 မိုၼ်ႇပျႃး၊ တီႈႁၢၼ်ႉၶၢႆၼမ်ႉမၼ်း တီႈတႃႈရူတ်ႉၼႃးမၢၵ်ႇၶေႃတႄႉ ၶၢႆပၼ်တႃႇ 2 မိုၼ်ႇပျႃးၵူၺ်းယဝ်ႉၵွၼ်ႇဢေႃႈ။ ဝၢၼ်ႈမိူင်းၼႆႉ သုၵ်ႉသၵ်ႉ ၵွႆၽီမၼ်းမူတ်းယဝ်ႉၶႃႈ  ”-ၵူၼ်းၼုမ်ႇလႃႈသဵဝ်ႈၵေႃႉၼိုင်ႈလၢတ်ႈ။

မိူၼ်ၼၼ်ၼင်ႇၵဝ်ႇ  တီႈဝဵင်းၵျွၵ်ႉမႄး၊ ၼွင်ၶဵဝ်ပႃးၸဵမ် ပၢင်ႇဢူႈလူင် ၸိူဝ်းၼႆႉ မီးၵူၼ်း မိူင်း ႁိမ်ၵၼ်သိုဝ်ႉၼမ်ႉမၼ်းၸၢၵ်ႈ ၼႂ်းဝဵင်းသမ်ႉပေႃးသူၼ်ႈသဵၼ်းသၢၼ်။

မိူဝ်ႈၼႆႉၵၢင်ဝၼ်း ယူႇတီႈ ၽွင်းလူင် ၾၢႆႇႁႅင်းထၢတ်ႈ ၾႆးၾႃႉ ၊ ၽွင်းလူင် ၾၢႆႇၼမ်ႉမၼ်းမဵၼ်  ဢွၵ်ႇလိၵ်ႈမႃးၽိုၼ်ၼိုင်ႈဝႃႈ – ၼမ်ႉမၼ်းၶၢတ်ႇ ၼင်ႇၶၢဝ်ႇလိုဝ်း ဢမ်ႇၸႂ်ႈ။ ဢိင်ၼိူဝ်မႅၼ်ႈၺႃးဝၼ်းသၢင်းၵျၢၼ်ႇလႄႈ ၼမ်ႉမၼ်းဢဝ်ၶဝ်ႈမႃးဢမ်ႇၶိုတ်းတၼ်းၵူၺ်း။ ယၢမ်းလဵဝ် ဢၼ်ႁွတ်ႈထိုင်ဝႆႉတီႈ တႃႈႁိူဝ်း သီႇလဝႃႇ မီးယူႇထႅင်ႈ ႁိူဝ်း 2 လမ်းယဝ်ႉ။ ၼမ်ႉမၼ်းတိုၼ်းဢမ်ႇၶၢတ်ႇ – ဝႃႈၼႆ။

ၾၢႆႇတေႃႉသူင်ႇၵႃႉၶၢႆၼမ်ႉမၼ်းတႄႉပိုၼ်ၽၢဝ်ႇဝႃႈ – ၼႂ်းၶၢဝ်းတၢင်းသိုၵ်းမၢၼ်ႈယိုတ်းဢႃႇၼႃႇမႃး ပီပၢႆၼႆႉ ၾၢႆႇၵဵပ်းၼမ်ႉမၼ်းတီႈတႃႈႁိူဝ်း လႆႈၸႅၵ်ႇၼမ်ႉမၼ်းပၼ်တႃႇတပ်ႉသိုၵ်းၸႂ်ႉ ၼိုင်ႈဝၼ်း ၼိုင်ႈမိုၼ်ႇၵႃႊလၼ်ႊ ဝႃႈၼႆ။